"NATAMANI KIPINDUPINDU KIFIKE IKULU" - MWANABLOGU IDYA

Anuani ya Makazi Mapya

2006-03-20T06:34:00.000-08:00

Nyumba mpya ya blogu hii inapatikana kwenye anuani hii: http://jikomboe.com
Au unaweza kubonyeza hapa.
Blogu hii itaendelea kuwepo kama kumbukumbu ya blogu yangu ya kwanza.

KWAHERINI...

2006-02-11T13:57:00.000-08:00

Kwaherini ndugu zanguni.

Kwaheri hii sio ya kuacha kublogu. Sio kama ile ambayo Michuzi aliyotupa hivi majuzi.
Kwaheri hii ni ya kuhama nyumba. Sio kuacha kublogu. Naamini mnafahamu kuwa sitakaa niache kublogu hata kwa mtutu. Nimekuwa siandiki sana na pia hata barua pepe nyingi (za wasomaji na marafiki) sijazijibu. Nilikuwa katika ujenzi wa nyumba mpya. Ujenzi wenyewe bado unaendelea. Unajua ukihamia kwako hata kama madirisha hayana vioo huwa hakuna noma. Hata gunia au bati utaweka maana ni kwako.

Wakati huo huo nimeendelea kuandika ule mwongozo wa wanablogu. Mwongozo huu daima utakuwa unaendelea kuandikwa kutokana na mabadiliko ya haraka ya teknolojia na kutokea kwa mambo mapya. Mwongozo huu umerekebishwa kwani ule wa mwanzo ulikuwa na makosa mengi hasa katika kodi za "HTML." Niliuandika wakati naanza kujihusisha na haya mambo. Baadhi yenu mlinishtua juu ya makosa yaliyokuwepo. Nimesahihisha na kuongeza mambo kadhaa. Kazi yenyewe bado sana. Niliyoandika hivi sasa ni kama asilimia tano.

Ingawa mwongozo huu unalenga hasa wale ambao wana nia ya kuanza kublogu, kuna mambo kadhaa ambayo yanaweza kusaidia hata wale waliobobea. Kama sio mambo yaliyoko hivi sasa basi baadaye kutakuwa na mambo ambayo unaweza kufaidika. Bonyeza hapa usome mwongozo huo.

Haya, sasa nachukua nafasi hii kuwataka mkaribie kwenye makazi yangu mapya kwa chai. Makazi hayo ni.....

Bonyeza hapa uyaone mwenyewe.

Mchezo wa kuigiza: Watanzania na Utanzania Wetu

2006-02-07T06:24:00.000-08:00

Mti Mkubwa (ambaye Michuzi anamuiita Mti Mkubwa Mkavu) ni mwanablogu ingawa sio mwanablogu. Suala la Mti Mkubwa kuwa mwanablogu ingawa sio mwanablogu ni moja ya mifano ambayo mimi huitazama kama ni faida za teknolojia ya blogu. Je ni mara ngapi umeona maoni ya wasomaji kwenye magazeti yamewekwa ukurasa wa mbele? Mti Mkubwa ni msomaji mzuri sana wa blogu na mtoa maoni changamoto. Mara nyingi maoni yake huwa yanakuwa mazito sana kiasi ambacho wanablogu huyaweka ukurasa wa mbele badala ya kuyaacha kwenye kidirisha cha maoni. Hii ni sawa na mhariri wa gazeti kuchukua maoni ya msomaji na kuyaweka kwenye ukurasa wa mbele. Kwahiyo utaona kuwa kutokana na maoni na taarifa mbalimbali anazotoa Mti Mkubwa kuweka ukurasa wa mbele za blogu zetu, unaweza kusema kuwa Mti Mkavu ni mwanablogu (ingawa sio moja kwa moja, kwa maana ya yeye kufungua blogu yake mwenyewe).

Maoni ya Mti Mkavu nimewahi kuyatumia kuandika makala katika safu yangu ya kila jumapili katika gazeti la Mwananchi. Maoni hayo ni yale aliyotoa akihoji mantiki ya kuomba mungu awabariki viongozi wetu (ambao wengi ni wezi, wazembe, waongo, n.k.). Sasa Mti Mkubwa kaja na kitu kingine ambacho nadhani hiki nacho nitamuomba ruhusu kutumia. Ameandika mchezo mfupi wa kuigiza wenye maonyesho manne. Nimeupata mchezo huu toka kwa Da Mija ambaye ameuweka ukurasa wa mbele. Nakuomba uusome kwa makini sana. Ingawa mchezo wenyewe, kwa ujumla, unatia huzuni, zipo sehemu ambazo lazima ucheke. Cheka usiogope, ila pata ujumbe wenyewe anaoutuma. Kisha mpe maoni yako kupitia hapo kwa Da Mija ulipo mchezo huu. Bonyeza hapa usome.

Michuzi...kisa ni nini hasa?

2006-02-07T04:20:00.000-08:00

Matukio mengi yanayotokea duniani hii leo hii. Michuzi anataka kuacha kublogu katika blogu yake tuipendayo ya picha. Nakuomba umsihi abadili uamuzi wake. Ingawa kuamua kublogu au kutoblogu ni uamuzi wa mtu binafsi, unaweza kublogu ikafika wakati ambapo uamuzi wa kuendelea au kuacha unakuwa sio wako binafsi. Hasa inapokuwa ni mtu ambaye blogu yake ni sawa na jumba pepe la makumbusho ya taifa kwa picha. Ina maana kuwa tuna haki na kumhoji atupe sababu za msingi. Sababu aliyotoa kwenye blogu yake haijaniridhisha. Labda atufafanulie zaidi. Bonyeza hapa umsome. Iwapo kuna mtu anamuunga mkono uamuzi wake, mtu huyo ana haki pia ya kutoa maoni yake kwenye kidirisha cha maoni hapo kwenye blogu ya Michuzi. Mimi binafsi simuungi mkono na unaweza kusoma maoni yangu hapo kwenye blogu yake.

Blogu Hadi Kasulu..

2006-02-04T09:22:00.000-08:00

Kama mapinduzi ya uandishi pepe unaona kuwa ni utani, fikiria tena. Kasulu nako kuna blogu. Ndugu yetu Njili Mwakoba amekata shauri. Ameanza kublogu. Mtembelee umkaribishe. Bonyeza hapa.

Natangaza Kuzaliwa Kwa....

2006-02-01T22:44:00.000-08:00

Je una habari za kuzaliwa kwa blogu hizi? Nitaandika machache kutokana na ujio wa wanablogu hawa wapya (ukiacha blogu ya watoto ambao ni ukurasa wa pili wa Da Mija). Watembeeleeni tafadhali na kuwaunga mkono. Kuna ndugu Lubuva, bonyeza hapa. Halafu Kisima cha Weledi, bonyeza hapa. Kutana na Jungu Kuu (lina ukoko au halina?), bonyeza hapa. Na masuala ya watoto kupitia Da Mija, bonyeza hapa.

Kasri halali akitafuta kila mbinu za kuleta wanablogu wapya. Msome mwenyewe kwa kubonyeza hapa kuhusu juhudi zake hizo na matunda yake.

Blogu Mpya, Nguvu za Teknolojia Mpya, na Kadhalika

2006-01-29T17:29:00.000-08:00

Kasri la Mwanazu o katuletea mwanablogu mpya. Juhudi zake nazipongeza. Mwanablogu huyo ni Mustapha ambaye amekuja na Hotspot. Mkaribishe na uwe unamtembelea. Bonyeza hapa uende nyumbani kwake. Kuja kwa Mustapha kumetokea dakika chache kabla sijakaa chini kuandika kifupi juu ya masuala ya teknolojia na vyombo vya habari. Huwa sichoki "kuhubiri" juu ya masuala haya kwani mapinduzi ya teknolojia ya habari, mawasiliano, na maarifa yananikuna sana. Mapinduzi haya faida zake kwa nchi kama zetu unaweza usizione lakini ukiwa unatazama mbali na una uwezo wa kuona "picha kamili" utajua kuwa mapinduzi haya yatabadili mambo katika nchi zetu kwa kiasi kikubwa. Kama sio sasa, ni hapo baadaye kidogo.

Moja ya mambo ambayo yanabadilika kutokana na teknolojia mpya ni mahusiano kati ya magazeti na wasomaji. Mahusiano kati ya wahariri, waandishi, na wasomaji wao. Kwa miaka mingi magazeti yamekuwa ni chombo cha habari cha mstari mmoja ulioonyooka ambapo habari, maarifa, na elimu vinatoka katika vyombo hivyo na kwenda kwa wasomaji. Mahusiano kati ya magazeti na wasomaji ni mahusiano kati ya mtoaji na mpokeaji. Magazeti yanatoa habari na maarifa, sisi wasomaji tunapoke. Wasomaji ni walaji. Barua za wasomaji tunaweza kusema kuwa ndio njia kuu ya kufanya mahusiano kati ya magazeti na wasomaji kuwa ya nipe nikupe. Magazeti yanatuambia jambo nasi tunapata nafasi ya kujibu, kuhoji, kuuliza, kusahihisha, kupongeza, n.k kupitia barua za wasomaji. Pia tunaweza kuandika kukemea jambo au kumtaka kiongozi afanye au aache kufanya jambo fulani. Zaidi ya hapo wasomaji hatuna sauti. Sisi ni magolikipa.

Kama hujawahi kufanya kwenye magazeti hutajua kuwa ni barua chache sana ambazo wasomaji wanaandika zinapata nafasi ya kusomwa na wahariri na kuchapishwa gazetini. Nyingi huishia kapuni. Na wakati mwingine, "barua za wasomaji" huandikwa na waandishi wa habari wenyewe! Kuna mambo ya ajabu sana ndani ya vyombo vya habari (ndio maana wakati mwingine mimi huviita vyombo vya uongo). Unaweza kusoma habari isemayo, "wananchi wengi waliohojiwa na gazeti hili..." ukaamini kabisa kuwa wananchi wengi waliohojiwa kumbe "wananchi" hao wako kichwani mwa mwandishi. Hajaenda kokote, hajahoji mtu yeyote.

Tofauti na magazeti-jadi ambapo msomaji ni msomaji, mtandao wa tarakilishi (Intaneti) umeleta jambo jipya. Mtandao huu, baadhi ya watu wanauita: soma-andika. Mtandao wa tarakilishi umejengwa kwa namna ambayo inaruhusu mtu kusoma na pia kuandika. Kwa mfano, kama umesoma jambo hapa kwenye blogu ukawa hukubaliani nalo au hukuelewa unaweza kuandika kupinga au kutaka ufafanuzi. Walaji na wazalishaji wanakuwa kitu kimoja. Wasomaji wanakuwa waandishi, waandishi wanakuwa wasomaji (wanasoma yaliyoandikwa na wasomaji wao). Mahusiano ya vyombo vya habari mtandaoni na wasomaji yanabadilika na kuwa ya mistari miwili ya nipe nikupe.

Ngoja nikupe mfano mdogo wa jinsi teknolojia inabadili mambo. Nimekuwa nikiandika magazetini rasmi toka mwaka 1992/93. Toka wakati huo hadi majuzi nilikuwa siwezi kujua wasomaji wangu wanawaza nini, ukiachia mbali wale ambao nilikuwa nakutana nao ana kwa ana. Lakini nilipoanza kuweka anuani yangu kwenye makala zangu nikaanza kuwa na mahusiano ya moja kwa moja na wasomaji wangu. Wasomaji wananiuliza maswali kutaka ufafanuzi, wananipa mapendekezo ya makala za kuandika, wananiunga mkono, wananishushua, wananiponda, wananikumbusha ahadi nilizoweka za kuandika kuhusu jambo fulani, n.k. Nimeandika makala nyingi kutokana na mapendekezo ya wasomaji. Hili ni badiliko kubwa sana.

Blogu zinatuwezesha kwa kiasi kikubwa kufanya mambo ambayo yamekuwa hayawezekani katika magazeti-jadi ya kuuzwa mtaani. Huku bloguni tunaandika. Wasomaji wetu nao wanaandika. Mara yanatokea majadiliano. Sio mtu mmoja tu anawaambia wengine ambao wanasoma bila kuwa na uwezo wa kujibu, kuunga mkono, au kuuliza maswali. Hapana. Blogu inawezesha nyanja ya habari kutoka kwenye zama za wasomaji kuwa kama watu wasio na mawazo, habari, au fikra. Watu wanaopaswa kusoma tu, kupokea bila kutoa. Tunatoka kwenye zama hizo na kuingia kwenye zama ambazo nyanja ya habari inakuwa ni aina fulani ya majadiliano. Mazungumzo. Nipe, nikupe. Mzalishaji ni mlaji na mlaji ni mzalishaji. Kila mtu anakuwa mwanahabari. Hili ndio linafanya blogu kupata umaarufu kwa haraka. Siku hizi zinatolewa hadi skolashipu kwa ajili ya kublogu. Sio mchezo. Bonyeza hap a uione (lazima uwe mwanafunzi wa chuo kilichopo Marekani).

Katika kujaribu kubadili mahusiano kati yake na wasomaji, kwa kutumia teknolojia mpya, magazeti kadhaa yanafanya majaribio ya aina mbalimbali. Kwa mfano, gazeti la Wisconsin State Journal linatumia wasomaji wake kuamua habari zipi ziwekwe ukurasa wa mbele. Wasomaji wanapiga kura. Bonyeza hapa usome kuhusu jaribio hili. Mwaka jana gazeti la Seattle Post-Intelligencer lilianzisha jaribio ambalo tahariri inaandikwa na wahariri wa gazeti hilo na wasomaji wake. Kongoli hapa na hapa kwa undani. Kuna gazeti kama News and Record ambalo limeanzisha ukurasa uitwao Town Square katika tovuti yake ambapo wasomaji wanapewa nafasi ya kuandika habari wenyewe. Bofya hapa uwatazame. Magazeti mengi yanachofanya hivi sasa ni kuwa na waandishi wao ambao wanakuwa na blogu. Blogu hizo zinakuwa ni uwanja wa majadiliano kati ya gazeti na wasomaji wake. Ukiachilia mbali maagazeti hayo, teknolojia mpya zimezalisha miradi mipya kabisa kwenye nyanja ya habari. Kwa mfano, kuna Wikinews, mradi ambao habari zinaandikwa na wasomaji. Zinaandikwa na mtu yeyote. Tazama hapa. Halafu kuna jamaa walioanzisha mradi kabambe wa uandishi wa umma huko Korea ya Kusini, Ohmynews. Ohmynews ina habari ambazo zinaandikwa na wananchi. Wasomaji wakisoma habari wakaipenda wanaweza kumlipa aliyeandika habari hiyo. Bonyeza hapa utazama toleo la kiingereza la Ohmynews.

Kwa ufupi, nilikuwa namkaribisha Mustapha , kumpongeza Kasri kwa kutuletea huyu ndugu, na kusema kuwa tunalofanya kupitia katika blogu zetu hizi ni sehemu ya mapinduzi ambayo yanabadili kabisa mahusiano kati ya watoa habari na wapokeaji.

Zaidi juu ya Creative Commons: kitabu cha bure na zoezi la pekee la kuhariri

2006-01-28T08:29:00.000-08:00

Huu ni mmoja wa mifano ya faida za Creative Commons. Majuzi kimetolewa kitabu cha kufundisha watu wa nchi zinazoitwa "zinazoendelea" juu ya ujenzi wa mtandao usiwaya (wireless network kwa kimombo). Kitabu hiki kimetolewa chini ya nembo ya Creative Commons. Kinapatikana bure. Na kuwakuwa kiko chini ya Creative Commons, mtu yeyote yule anaruhusiwa kukitoa kitabu hiki katika lugha yoyote ile (na hata kuongeza mambo ambayo anaona ni muhimu ila hayako katika kitabu mama). Yote hii unaruhusiwa kufanya bila kuomba ruhusa kwa mtu yeyote kwa masharti kuwa kitabu hicho usikitoe kwa minajili ya kibiashara na pia lazima toleo lako liwe chini ya Creative Commons. Kitabu chenyewe ukibonyeza hapa utakipata. Hapa kuna ukurasawa wa "wiki" wa kitabu hicho.

Kuna mfano mwingine wa mabadiliko makubwa yanayojitokeza kutokana na teknolojia mpya na vuguvugu kama la Creative Commons. Mwaka 1999, Larry Lessig, mwanzilishi wa vuguvugu hili, alitoa kitabu kizuri sana kiitwacho Code and Other Laws of Cyberspace. Hili lilikuwa ni toleo la kwanza. Toleo la pili, yaani Code v. 2, ni muendelezo na upanuaji wa hoja na uchambuzi ulioko katika toleo la kwanza. Kwa staili ya ki-Creative Commons, toleo hili la pili badala ya kuandikwa na Larry Lessig peke yake kama ilivyo kawaida katika nyanja ya vitabu, toleo hili linaandikwa/linahaririwa na watu mbalimbali. Ina maana kuwa hata wewe unaweza kushiriki katika kuandika toleo la pili la kitabu hiki. Bonyeza hapa uone zoezi hili la kipekee.

Mawaziri Kuapa kwa Biblia na Kurani: Imani tumezibebabeba tu?

2006-01-28T00:59:00.000-08:00

Wiki iliyopita, kwa ajili ya ukurasa wangu katika gazeti la Mwananchi, niliandika makala kuhusu mawaziri wapya kuapa kwa kutumia kitabu "kitukufu" na "kitakatifu" baada ya kuteuliwa. Soma baadhi ya hoja nilizotoa dhidi ya tendo la kuapa:

Baada ya rais mpya kuteua baraza jipya la mawaziri, kilichofuata kilikuwa ni tendo la kula kiapo. Tukio hili limezungumzwa sana mtaani hasa kutokana na kitendo cha Kingunge Ngombale Mwiru (nitampa zawadi ya jina zuri) kuapa kwa kunyoosha mkono bila kushika kitabu "kitukufu" au "kitakatifu" (kurani au biblia) kama wengine walivyofanya.

Wakati ambapo kwa watu wengi kuapa bila kutumia kitabu cha dini ilikuwa ni habari kubwa, kwangu mimi kitendo cha wafuasi wa Isa/Yesu kuapa ndio ilikuwa habari kubwa kabisa. Ni habari ya binadamu kuwa na tabia ya kufanya mambo kutokana na mazoea bila kutafiti kwa kina juu ya usahihi wa jambo lenyewe. Ni tabia inayotokana na utamaduni wa kuiga mifumo ya sheria, utawala, na demokrasia ya nchi nyingine tukidharau uwezo wetu wa kuunda mfumo wetu wenyewe.

Tendo la mawaziri kuapa wakitumia kitabu kitakatifu au kitukufu hatujaanzisha sisi. Utamaduni wa mashahidi kuapa mahakamani kwa kutumia vitabu hivyo hatujauanzisha sisi. Tumeiga toka kwa wengine kama ambavyo tumeiga karibu kila kitu.

Kwanini habari kwangu sio Kingunge kuapa mikono mitupu bali Wakristo na Waislamu kuapa? Jibu la swali hili liko katika kitabu cha Matayo, mlango wa 5, aya ya 33 hadi 37. Katika aya ya 34 Yesu/Isa anakataza wafuasi wake (Waislamu na Wakristo ni wafuasi wake) kuwa wasiape kamwe.

Hivi ndivyo asemavyo toka aya ya 33 hadi ya 37: "Tena mmesikia kuwa watu wa kale waliambiwa: `Usivunje kiapo chako, bali ni lazima utimize kiapo chako kwa Bwana. Lakini mimi nawaambieni, msiape kamwe; wala kwa mbingu, maana ni kiti cha enzi cha Mungu; wala kwa dunia, maana ni kiti chake cha kuwekea miguu; wala kwa Yerusalemu, maana ni mji wa Mfalme mkuu. Wala usiape kwa kichwa chako, maana huwezi kuufanya hata unywele mmoja kuwa mweupe au mweusi. Ukisema, `Ndiyo`, basi iwe `Ndiyo`; ukisema `Siyo`, basi iwe kweli `Siyo`. Chochote kinachozidi hayo hutoka kwa yule Mwovu."

Anasema kuwa ingawa huko nyuma kuna manabii waliwaambia wanadamu kuwa wanaweza kuapa, yeye anabadili na kusema kuwa usiape kamwe. Hii haikuwa kwa mara ya kwanza kwa Yesu/Isa kutengua mafundisho ya zamani. Unakumbuka, ingawa iliandikwa “jino kwa jino, jicho kwa jicho,” yeye alikuja na kusema geuza shavu. Mchukie adui yako akabadili kwa kutuambia kuwa tuwapende na tena tuwaombee. Aligeuza sheria ya kupiga mawe hadi kuwaua wanaokamatwa katika uzinzi. Alibadili sheria kuhusu talaka. Alibadili maana ya kuzini kwa kusema kuwa hata ukitamani umeshazini.

Nimetoa mifano hii kukupa picha kidogo ya baadhi ya mambo aliyobadili likiwemo suala la kiapo. Anatuambia kuwa kipimo cha ukweli wa kauli yetu isiwe ni kiapo. Anasema ukisema “ndiyo” iwe “ndiyo” na ukisema “hapana” iwe “hapana.” Ukisema utatii katiba na kutumikia wananchi, basi tii katiba na kutumikia wananchi. Hakuna la kuongeza wala kupunguza. Sema ukweli na simama kwenye hiyo kweli, usianze kuingiza jina la Mungu ili kutufanya tuone kuwa unayosema ni kweli.

Nimekuwa najiuliza kwanini wafuasi wa Mwalimu huyu wamekuwa hawafuati mafundisho yake? Je inawezekana kuwa ufuasi wao ni wa jina tu na sio imani ya dhati na uelewa wa mafundisho yake? Amesema waziwazi usiape. Wewe unaapa, tena kwa kutumia kitabu chenye maneno yake yanayokukataza. Je hili ni tatizo la kufuata tamaduni za wengine bila kuhoji? Au ni tatizo la kuwa wafuasi wa Isa/Yesu bila kusoma mafundisho yake?

Lakini tukiacha hoja hii ya kuwa Isa/Yesu amekataza wafuasi wake kuapa, kuna hoja nyingine ambayo niliwahi kuitoa huko nyuma. Nitairudia kwa kifupi. Haiwezekani kutumia Kurani au Biblia kuapa kuwa utalinda katiba ya nchi ukitegemea kuwa Mungu atakubariki na kukusaidia ili utimize kiapo hicho. Kwa sentensi chache sana nitakueleza ni kwanini kisha nitakuacha ili iwe tafakari yako siku hii ya mungu jua (ndio maana ya jumapili).

Kurani na Biblia zinasema kuwa Mungu ametoa amri kumi. Amri ya kwanza inasema, “Mimi ni Bwana Mungu wako usiwe na miungu wengine ila mimi.” Hili sio ombi. Inaitwa amri. Anasema wazi kuwa anataka umwamini na kumwabudu yeye tu. Yeye Yehova/Allah. Tuje kwenye katiba yetu: katiba yetu inatoa uhuru wa kuabudu. Ina maana kuwa unaweza kuabudu Mungu mmoja au miungu 10, hutakuwa umevunja sheria ya nchi. Sio hivyo tu, unaweza pia kutokuwa na imani yoyote na usiwe umevunja sheria ya nchi.

Kwa maneno mengine, wakati Yehova/Allah anakwambia, “Niabudu mimi” katiba inasema “Abudu chochote kile.” Je Mungu aliyekupa AMRI ya kumwabudu yeye tu, anaweza kukubariki ili uendeleze katiba inayosema abudu chochote kile? Yaani Mungu atakuwa anakubariki ili uendeleze mwongozo ambao unawapa wanadamu ruhusa ya kuvunja amri yake ya kwanza. Tena amri hii sio ya kumi bali ni ya kwanza. Kama katiba ingesema mwamini mungu mmoja ambaye ni Yehova/Allah, basi nisingeshangaa iwapo waumini wa Kikristo na Kiislamu wangekuwa wanamuomba mungu awasaidie kuilinda hiyo katiba. Lakini katiba haisemi hivyo. Inapingana kabisa na mafundisho ya Allha na Yehova. "Usiwe na miungu mingine ila mimi" sio sawa na kusema kila mtu ana haki na uhuru wa kuamini atakacho.

Kwahiyo kitendo cha kutumia kitabu kinachokutaka uwe na Mungu mmoja kuapa kuwa utalinda katiba inayokuruhusu uwe na mungu yoyote, mmoja au miungu wengi, au hata usiwe na imani kabisa, n.k. kinaonyesha kuwa huenda imani zetu tumezibebabeba tu. Au tumebebeshwa.

Juu ya Vuguvugu la Creative Commons

2006-01-27T04:32:00.000-08:00

Majuzi niliandika kuhusu Tanzania kukubaliwa rasmi kuanzisha tawi la Creative Commons na kuwa Paul Kihwelo, mkuu wa kitivo cha sheria, Chuo Kikuu Huria, ndiye mwongoza mradi upande wa kisheria. Baadaye tunatakiwa kutafuta mwongoza mradi upande wa uhamasishaji. Kama hukusoma niliyoandika siku hiyo, bonyeza hapa. Ukisoma sehemu ya maoni utaona kuwa Mark Msaki ameongelea suala moja ambalo kwa muda mrefu limekuwa lilibishaniwa katika duru za wanazuoni wa masuala ya sheria, sayansi ya jamii, uchumi, na falsafa. Hoja yenyewe ni kuwa sheria ya hatimiliki inachochea ubunifu na ugunduzi. Na kuwa kama kama hakuna faida za kiuchumi/kifedha, watu hawatabuni au kujihusisha na kazi za ugunduzi. Kwahiyo vuguvugu kama la Creative Commons ambalo linachochea watu kuachilia huru kazi zao (iwe ni vitabu, muziki, sinema, n.k.) na kuondoa ukiritimba wa maarifa na elimu, linaweza (vuguvugu hilo) kuondoa msukumo wa kubuni, kutunga, kugundua, n.k.

Hoja hii ina mapengo mengi sana. Mfumo wa hatimiliki una kazi zake. Tunaounga mkono vuguvugu la Creative Commons hatusemi kuwa mfumo wa hatimiliki uondolewe kabisa. Tunasema kuwa mfumo huu unahitaji kufanyiwa mageuzi ili kuendana na upepo wa wakati, teknolojia zilizopo leo hii, na kukidhi matakwa ya umma. Tunachosema ni kuwa tunaweza kutumia itikadi ya ujamaa kwenye kazi ambazo zimekuwa zikifungwa pingu na sheria ya hatimiliki ambayo inakidhi mahitaji ya msukumo wa soko. Msukumo wa soko, kama apendavyo kusema Desmond Tutu, sio mungu. Sio mwanzo na mwisho wa kila kitu.

Zipo faida mbalimbali kwa umma iwapo mfumo wa hatimiliki uliopo (duniani kwa ujumla) utafanyiwa marekebisho. Kwa mfano, tazama suala la dawa za kuongeza maisha ya wenye Ukimwi. Dawa hizi zimegunduliwa (makampuni mengi ya madawa huiba elimu ya jadi ya dawa toka nchi za Kusini) na makampuni ya Magharibi. Dawa zao ni ghali sana kiasi ambacho watu wachache sana wenye ugonjwa huu katika nchi za Kusini wana uwezo wa kuzinunua. Makampuni ya Brazili, India na kwingineko yanatengeneza dawa-chapa kama hizo kwa bei nafuu zaidi. Kutokana na sheria ya hatimikili kitendo cha kampuni hizi kutengeneza dawa hizo bila ruhusa ya makampuni ya Magharibi yaliyozigundua ni kosa. Kitendo cha dawa-chapa hizi kuwa za bei ambayo masikini wengi wanaweza kuimudu kuliko ile ya makampuni ya Kimagharibi hakina nafasi kwenye mjadala. Suala kuu ni hatimiliki na haki ya makampuni haya kufaidi kwanza kwa maiaka kadhaa kabla makampuni mengine hayajaruhusiwa kuzitengeneza. Kwahiyo kumekuwa na kesi mbalimbali ingawa makampuni ya Magharibi yanarudi nyuma kwakuwa yameona kuwa dunia inayaona kama wanyama vile kwa kutaka kuzuia masikini wasio na kipato kupata dawa wanazoweza kununua.

Mfano mzuri wa umuhimu wa vuguvugu la Creative Commons ni huu: Shirika la Habari la BBC linaruhusu Muingereza yoyote kutumia bure chochote BBC walichohifadhi. Kama kuna Muingereza anatengeneza filamu, katika filamu hiyo akawa anahitahi sauti ya simba au tembo au akawa anahitaji video ya mbuga fulani ya wanyama, badala ya kufunga safari kutafuta wanyama hao anaweza kutumia video za BBC. Bure. Kila Muingereza hulipa kodi ya kuendesha BBC. Kwahiyo kila Muingereza ana haki ya kufaidika na kazi za BBC. BBC wakifuata mfumo wa hatimiliki uliopo itabidi wazuie Waingereza ambao ndio hasa wanaoipa uhai BBC kufaidi. Ni sawa na Tanzania. Redio Tanzania inaendeshwa kwa fedha zetu. Je hatimiliki ya kazi zake na rekodi zake zote ni za Watanzania wote? Vuguvugu la Creative Commons linasukuma Redio kama Redio Tanzania kupanua hatimiliki ya kazi zake kuwa ya Watanzania wote ambao kodi yao ndio uhai wa redio hiyo. Bonyeza hapa usome kuhusu BBC kuamua kuweka kazi zao zote chini ya Creative Commons. Unaambiwa kuwa ili umaliza kutazama video walizonazo, unapaswa kutazama video hizo kwa miala 68, usiku na mchana (masaa 24)!

Kuna mtazamo kuwa hatimiliki husaidia sana wagunduzi, watunzi, wanamuziki, n.k. Sio mara zote. Tazama kwenye muziki. Wanamuziki wengi wanapata hela zao sio kwenye kuuza CD bali kwenye maonyesho ya hadharani, matangazo, n.k. Wanaofaidi hasa kazi za wanamuziki ni makampuni ya kurekodi. Utashangaa kuwa makampuni haya ndio huwa yanamikili haki za nyimbo za wanamuziki. Na ndio huchukua sehemu kubwa ya pato linalotokana na kuuza CD. Sasa katika mwelekeo wa ki-Creative Commons, imekuja kampuni inaitwa Magnatune. Kampuni hii inauza CD. Asilimia 50 inakwenda kwa mwanamuziki (hakuna kampuni inayompa mwanamuziki asilimia 50. Hata wanamuziki unaowaona matajiri wanapunjwa wote). Zaidi ya mwanamuziki kupata asilimia 50, mwanamuziki huyo ndiye anayemiliki haki za muziki wake na sio kampuni hiyo. Bonyeza hapa uone kampuni hiyo.

Profesa Kembrew ni mtu wa utani sana. Yeye ni kati ya wanazuoni wanaoandika sana kuhusu mapungufu ya mfumo wa hatimiliki uliopo hivi sasa. Katika kuonyesha mapungufu yake, Profesa Kembrew aliamu kusajili msemo wa kiingereza,"Freedom of Expression." Baada ya kuusajili msemo huu amepewa haki ya kuweka nembo ya "haki zote zimehifadhiwa". Yaani hivi: Freedom of Expression©. Kwahiyo hivi sasa yeye ndiye anayemiliki msemo huo. Bonyeza hapa usome kihoja hicho kwa undani.

Ujenzi wa Huduma cha Kublogu ya Kiswahili

2006-01-25T04:28:00.000-08:00

Moja ya matatizo ya huduma za kublogu tunazotumia hivi sasa ni lugha. Huduma hizi zimetengenezwa kwa udhanifu kuwa watumiaji ni wazungumzaji wa Kiingereza, Kifaransa, Kichina, Kishirazi, n.k. Kiswahili hakipo. Tatizo jingine ambalo lipo katika huduma kama blogger.com (ambayo wengi tunatumia) ni kukosekana kwa muundo wa kupanga kazi tunazoandika katika makundi ya kimaudhui. Hili ni tatizo kubwa sana hasa kama mtu unapanga kublogu kwa muda mrefu.
Ina maana hapo baaadaye ukitaka kutafuta habari uliyoandika miaka mitatu iliyopita, itakupasa ukumbuke mwezi na tarehe ili uweze kuipata kwa urahisi. Kama hukumbuki uliandika mwezi gani itakubidi utumie muda mrefu kuisaka. Fikiria, je ikiwa imepita miaka saba? Lakini pia kuna suala la wasomaji kuja kwenye blogu yako na kutaka kusoma habari ulizoandika huko nyuma. Kama wanataka kusoma habari ulizoandika kuhusu utamaduni, watazipataje? Au hadithi. Au labda umekwenda kwenye blogu ya Michuzi baada ya miaka miwili, ukawa unatafuta picha ya jiji la Dasalama au ya Mwanza. Utaipataje hiyo picha? Namna rahisi ya kuipata picha hiyo ni kama amehifadhi picha zake kutokana na maudhui. Kwa mfano, maudhui yanaweza kuwa ni: utamaduni, siasa, michezo, uchaguzi, mikoani, Ughaibuni, Rais, Wabunge, Wanawake, Muziki, Historia, Hadithi, n.k.

Nikienda kwenye blogu ya Makene, nikataka kusoma mashairi yake. Bila kujua aliandika lini na mwezi gani itakuwa vigumu sana. Lakini akiwa na uwezo wa kupanga mambo kwenye blogu yake kutokana na maudhui, kila akiandika shairi analiweka kwenye maudhui ya kundi ya ushairi. Hivyo msomaji akienda hapo anabonyeza kwenye maudhui ya ushairi na kuweza kuona mashairi yake yote. Ukija kwangu ukataka kusoma mambo niliyoandika kuhusu utamaduni au kuhusu blogu, utapata tabu sana maana hakuna mpangilio wa kimaudhui. Kunapokuwa na makundi haya yaliyopangwa kimaudhui kunasaidia msomaji kuweza kupata habari ulizoandika huko nyuma kwa urahisi. Inakusaidia hata wewe mwenye blogu kujua mambo uliyoandika yako wapi. Tunapaswa kutatua tatizo hili. Tutalitatua.

Sasa rafiki yangu Chris wa NonProfit Design (bonyeza hapa uone blogu yake) na mimi tunalipatia tatizo la lugha kwenye huduma za kublogu dawa ya kudumu. Kwa kutumia huduma huria ya kublogu ya Wordpress, tunaunda toleo la Kiswahili. Wordpress tayari ina matoleo ya lugha kadhaa. Kiswahili kwa sasa hakimo. Uzuri wa Wordpress ni kuwa ni programu huria hivyo iko wazi kwa mtu yeyote kufanya chochote atakacho (iwapo una ujuzi sahihi).

Mwisho wa wiki Chris alinitembelea tukaa pamoja kwa siku mbili (alikuja na mbwa wake aitwaye IO). Tulitazama kwa undani jinsi ambavyo tunaweza kusaidia wanablogu wote wa Kiswahili kuhama toka walipo hivi sasa na kuweza kuwa na mpangilio wa mambo waliyoandika katika makundi ya kimaudhui na pia hatua za kufuata ili kujenga toleo la Kiswahili la Wordpress. Katikati ya kucheza na kodi za programu mbalimbali za tarakilishi, tulikuwa tukicheza mpira wa meza (ambapo nilimfunga mabao yasiyohesabika. Kama unabisha muulize! Richard Shilangale, unakumbuka kuwa wewe ndiye ulinifundisha kucheza mpira wa meza?). Pia tuliongelea masuala ya Creative Commons maana shirika lake ndilo linalojenga tovuti ya tawi la Creative Commons Tanzania na pia kuihifadhi tovuti hiyo. Bonyeza hapa usome aliyoandika mwenyewe kuhusu toleo la Kiswahili la Wordpress.

**Da Mija: wewe ndio umenikumbusha neno maudhui. Lilinitoka kabisa. Kila nikilitafuta neno linalonijia ni hadhira! hadhira na maudhui wapi na wapi?

Karibu Sana Pambazuka

2006-01-25T03:58:00.000-08:00

Baada ya kimya cha muda mrefu ambacho kilinifanya nitake kuunda tume au kutumia makachero wa FBI kumtafuta, mwanablogu Nkya wa Pambazuka amerudi. Tena kwa kishindo na kasi mpya. Sijui hii kasi mpya kaambukizwa na Kikwete na wana mtandao? Ukienda katiba blogu yake utakuta ameandika juu ya madakitari ambao serikali iliwafukuza. Madakitari hawa walikuwa wakidai waongezewe mshahara na serikali ilikuwa ikisema, kama ilivyozoea, kuwa inashughulikia suala hilo. Sijui serikali yetu huwa inatumia miaka mingapi kushughulikia tatizo kama hilo. Toka tupate uhuru, kwa mfano, sirikali imekuwa ikishughulikia tatizo la mshahara usiotosheleza wa walimu. Hadi leo bado inashughulikia. Huenda ndio maana Sumaye alikuwa akituambia kila mara kuwa sirikali yetu hufanya kazi usiku na mchana. Sirikali mpya nayo sijui kama hufanya kazi usiku kucha. Nkya anasema kuwa kitendo cha kufukuza madakitari ni sawa na taifa kupoteza miaka 3,800 ya elimu. Kwa taifa kama Tanzania, kupoteza miaka yote hii sio jambo la mzaha. Bonyeza hapa uone alivyopata miaka hiyo. Nkya anatamani jambo moja: lini kipindupindu kitapiga hodi ikulu? Bonyeza hapa utajua kwanini. Nkya aliwahi kutoa msamiati mmoja. Aliita demokrasia "mkumbokrasia." Mfumo wa siasa na jamii ambapo wananchi wanashiriki kama washabiki. Sasa katika mambo mapya aliyoandika nimekuta ameviita vyama tuviitavyo vya upinzani, "vyama vya ushindani." Nadhani anamaanisha kuwa katika mfumo wa vyama vingi, kazi kubwa ya vyama ni kushindana (zaidi ya kupingana) kuweza kushawishi umma kuwa vina uwezo na mipango bora zaidi ya kuongoza nchi.

Unamjua Spika Wa Wanablogu?

2006-01-22T05:12:00.000-08:00

Nimeamka asubuhi hii na kwenda moja kwa moja kwenye ukumbi pepe wa mjadala kuhusu neno muafaka la Kiswahili la teknolojia hii ya blogu. Nikasoma mawazo mazuri sana ya wachangiaji, nami nikaweka neno langu. Napenda uende pale ili ujue mjadala umefikia wapi. Kuna masuala fulani ya kinadharia kuhusu lugha na kuhusu blogu ambayo yamejitokeza. Ila pia mjadala huu umetuletea Spika. Unajua Liberia wamepata rais mwanamke. Ujeremani wamepata Kansela mwanamke. Chile wamepata raisi mwanamke. Tanzania imepata waziri wa fedha mwanamke. Kuna jambo linatokea duniani hivi sasa. Nasi tumepata spika mwanamke. Ukitaka kumjua nenda kwenye ukumbi pepe wa majadiliano ya neno blogu. Spika huyu tumekuwa tukimwita Mheshimiwa ila napendekeza tumwite ndugu. Naona neno ndugu lina maana nzuri zaidi ya mheshimiwa. Watwawala wetu wanaitwa waheshimiwa...si ndio?

Haya, bonyeza hapa.

Creative Commons Tanzania!

2006-01-20T18:45:00.000-08:00

Furaha niliyonayo sijui nifanye nini. Au niseme nini.
Ngoja nianzie mwaka jana mwezi wa sita: mwezi wa sita mwaka jana nilikwenda jiji la Egoli/Jozi (au Johannersburg, kama hujui), Afrika Kusini, kwenye mkutano wa Commons-Sense kwenye chuo kikuu cha Wits. Mkutano huu ulikuwa ni wa ufunguzi wa tawi la shirika la Creative Commons nchini Afrika Kusini. Bonyeza hapa usome hisia nilizopata nilipotembelea hapo kwa Madiba.

Creative Commons in vuguvugu linaloendeleza mfumo wa hatimiliki mbadala (kwa kiingereza: "copyleft" badala ya "copyright"). Kwahiyo badala ya kazi zilizoko chini ya hatimiliki kusema "Haki Zote Zimehifadhiwa" kama ambavyo mfumo wa hatimiliki uliozoeleka ulivyo, Creative Commons inatoa nafasi kwa wamiliki wa kazi mbalimbali kuweza kusema, "Baadhi ya Haki Zimehifadhiwa," au "Hakuna Haki Zilizohifadhiwa." Kimsingi, mfumo huu, tofauti na mfumo wa hatimiliki uliozoeleka ambao una kila chembe za falsafa za kibepari, umejengwa juu ya falsafa kama vile Ujamaa au Ubuntu. Msingi wa Ubuntu ni huu: mtu sio mtu bila watu. (bonyeza hapa kusoma kwa kifupi kuhusu ubuntu). Kwahiyo sio vigumu sana kwa Waafrika kuelewa mantiki ya vuguvugu kama Creative Commons. Afrika Kusini ndio nchi ya kwanza Afrika kuwa na tawi.

Vuguvugu la Creative Commons nimekuwa nikilifuatilia kwa muda mrefu. Nilipokwenda mkutano wa Afrika Kusini na kukutana na wanaharakati wengine wa vuguvugu hili na pia "baba" wa Creative Commons, Larry Lessig (bofya hapa kuna blogu yake) mwili mzima ulinisisimka. Kabla ya hapo nilikuwa nimewagusia marafiki zangu kadhaa Tanzania juu ya vuguvugu hili ila hakuna aliyeonekana kujali. Walinisikiliza tu. Nikawaacha. Sasa mwezi Septemba nikiwa njiani kwenda Helsinki, Ufini (ambapo ndipo nilikutana na Michuzi na blogu yake kabambe ilipozaliwa...blogu yake ina uraia wa Ufini!), nikiwa uwanja wa ndege Uholanzi nikakutana na Paul Kihwelo, ambaye zaidi ya kuwa mshikaji wangu, ni mkuu wa kitivo cha sheria, Chuo Kikuu Huria Tanzania. Tukaongea kidogo nikamgusia kuhusu Creative Commons na umuhimu wa kujenga vuguvugu lake Tanzania. Hatukuwa na muda wa kutosha. Tukakubaliana kuandikiana. Basi kukutana kwetu pale uwanja wa ndege kumezaa matunda. Na ndio furaha yangu niliyonayo. Paul ni kati ya watu ambao akikwambia kuwa atafanya jambo, ujue kuwa atafanya.

Ombi letu kwa ofisi inayoshughulikia uanzishwaji wa matawi ya Creative Commons katika nchi mbalimbali kutaka kuanzisha Creative Commons Tanzania limekubaliwa. Kwahiyo shughuli rasmi ya kujenga tawi la Creative Commons na kuwezesha wasanii, watunzi, shule, vyuo, wanasayansi, n.k. kutoa kazi zao kupitia Creative Commons imeanza. Paul Kihwelo ndio mwanasheria muongozaji wa zoezi zima la kuanzisha tawi lake nchini Tanzania. Zoezi hili litakuwa chini ya kitivo cha sheria, chuo kikuu huria (moja ya masharti ya kuanzisha tawi ni kuwa lazima kuwe na taasisi ambayo ndio itasimamia). Jumapili tutawasiliana na Paul kuhusu ujenzi wa tovuti maana katika masharti ya mradi huu ni kwamba lazima kuwepo na tovuti. Tayari kuna mashirika mawili ambayo yako tayari kutoa nafasi ya bure ya kuhifadhi tovuti yetu. Kesho ninakutana na Chris Blow wa shirika la NonProfit Design, ambaye yuko tayari sio tu kuhifadhi tovuti hiyo bali pia kuiunda.

Ukibonyeza hapa utaona jina la Tanzania tayari limeingizwa katika nchi ambazo ziko mbioni kuunda Creative Commons (Tazama upande wa chini sehemu isemayo: Upcoming Project Jurisdictions).

Watu wengi ukiongea nao kuhusu masuala ya faida ya kuwa na hatimiliki ya "baadhi ya haki zimehifadhiwa" au "hakuna haki zilizohifadhiwa" badala ya mfumo wa "hazi ZOTE zimehifadhiwa," mawazo yao yanakuwa yanakwenda tu kwenye masuala kama ya muziki. Vuguvugu kama la Creative Commons linagusa maeneo mengi sana kwenye jamii. Hasa maeneo yanayohusu maarifa na elimu. Mfumo wa hatimiliki uliopo hivi sasa unapendelea watu wahodhi maarifa na elimu wakati ambapo Creative Commons inataka kuachilia huru maarifa na elimu. Kutokana na Creative Commons, kuna vitabu ambavyo unaweza kuvipata bure. Bila hata sumni. Kwa mfano, bonyeza hapa upate kitabu kimojawapo.

Lakini pia Creative Commons inaachilia huru maarifa ya vyuo vikuu kwa ajili ya faida ya watu wote hata kama sio wanafunzi waliolipa ada wa chuo chenyewe. Kwa mfano, chuo cha MIT kimeweka masomo yake wazi mtandaoni kwa watu wote wanaotaka kufaidi bure. Bonyeza hapa.
Hata chuo kikuu cha Rice nacho kinaunga mkono vuguvugu hili. Bonyeza hapa. Blogu yangu iko chini ya Creative Commons. Huenda umewahi kuona nembo ya Creative Commons ukashindwa kujua inafanya nini hapa. Ni kwamba kazi zilizoko hapa haziko chini ya mfumo wa "haki zote zimehifadhiwa." Ina maana kuwa kama unataka kuzitumia (iwe ni picha, makala, kisa, shairi, n.k.) sio lazima uiombe ruhusu au unilipe.

Bonyeza hapa ukitaka kusoma zaidi juu ya Creative Commons (kwa kiinglishi).

Mwanablogu Kimazichana....bado namchekicheki

2006-01-18T17:07:00.000-08:00

Mwanablogu mpya, Kimanzichana, bado nimnacheki kinamna. Sijui wewe. Mtembelee kwa kubofya hapa. Je ni mtu wa kejeli, dhihaka, sanifu, ucheshi, n.k.?

Karibu Ibrahim Bwire na Blogu Yako

2006-01-18T01:29:00.000-08:00

Ni kweli kuwa bado blogu za Kiswahili ni chache ukilinganisha, kwa mfano, na blogu za Kiingereza za Wakenya. Ni kweli kuwa ni Watanzania wachache hivi sasa wenye uwezo, nafasi, na ujuzi wa kutumia tarakilishi na mtandao wa tarakilishi. Ninafurahi kuwa ukweli huu hauzuii wenye nia ya kublogu kufanya hivyo. Ukitazama historia ya magazeti, kwa mfano, nchini Tanzania utakuta kuwa kuna wakati kulikuwa na gazeti moja. Kuna wakati magazeti yalikuwa machache mno na tena hayakuwa yakisambazwa nchi nzima. Na tena yalikuwa yakisomwa na watu wachache sana. Na tena kulikuwa na watu wengi wasiojua kusoma. Lakini mambo yamekwenda hadi tumefika wakati ambapo huwezi kusoma magazeti yote yanayotolewa kwa siku. Na magazeti hayo yanafikia watu wengi zaidi. Blogu nazo kuna siku tutakaa na kusema, "unakumbuka enzi zile watu walikuwa hawajui blogu ni nini?" Utafika wakati huo. Jitihada zinafanyika. Kwa mfano, blogu zetu siku si nyingi zitaanza kusomwa asubuhi redioni na kwenye luninga kwenye vipindi vile wanavyosoma magazeti ya siku. Yaani kama wanavyosoma magazeti ya siku ndivyo watakuwa wanasoma blogu zetu, jambo ambalo litasaidia tunayoandika kufikia watu wengi zaidi. Tunajua kuwa redio ndio chombo cha habari kinachofikia watu wengi zaidi duniani hivi sasa. Tutaingia kwenye chombo hicho. Kwahiyo upo uwezekano wa kutumia vyombo vya habari vinavyofikia watu wengi kusambaza cheche tunazotoa kwenye blogu zetu.

Tararira yote hiyo nilitaka kumkaribisha mwanablogu mpya, ndugu Bwire (asante sana Kasri la Mwanazuo kwa kutuletea). Bwire anasema kuwa weka kila kitu kando, fikra ndio mambo yote. Bonyeza hapa umtembelee.

Blogu ya mwongozo wa jinsi ya kublogu

2006-01-16T06:59:00.000-08:00

Kutokana na maswali ninayopata toka kwa watu wenye nia ya kublogu na hamasa kubwa waliyonayo watu wengi wenye kutaka kutumia teknolojia hii kutoa mawazo yao, kujieleza, na kuelimishana na wengine, nimeamua kujenga blogu maalum ya mwongozo kwa wanaotaka kublogu na pia wale ambao tayari wanablogu. Blogu hii itasaidia watu wa kawaida wanaotaka kublogu, itakuwa na eneo la waandishi wa habari wanaotaka kublogu, kutakuwa na ukurasa kwa ajili ya wanaharakati au wenye mashirika yasiyo ya kiserikali wanaotaka kublogu, ukurasa wa kusaidia wanasiasa wanaotaka kublogu, ukurasa wa kusaidia wanaoblogu jinsi ya kutangaza blogu zao, ukurasa wa maelezo kwa wale wanaotaka kublogu bila kujulikana kuwa wao ni akina nani (kwa mfano, kama unafanya ofisi ya rais na unaona mambo ambayo unadhani ni muhimu umma ukajua lakini hutaki rais ajue kuwa wewe ndiye unayetoboa siri!), n.k. Iwapo kuna suala ambalo ungependa liwe na ukurasa wake, usisite kuniambia. Majina ya kurasa zenyewe yako upande wa kuume wa blogu hiyo, chini ya orodha ya miezi. Blogu hiyo utaiona kwa kubonyeza hapa.

TUMKUMBUKE MARTIN LUTHER KING

2006-01-16T05:37:00.000-08:00

Leo ni siku ya kitaifa nchini Marekani ya kumkumbuka mpigania haki za watu weusi na binadamu wote, Dakta Martin Luther King. Ninakupa viungo kadhaa vya hotuba zake ambazo zilikuwa zinasisimua mno kutokana na ufundi wake wa kuhubiri. Bonyeza hapa uone video za hotuba zake. Hapa kuna video ya mahojiano. Bofya hapa kwa mkusanyiko wa video mbalimbali.

Kuna hotuba zake mbili muhimu sana kusikiliza: ya kwanza ni ile ya "Nina Ndoto." Bonyeza hapa usikilize. Hotuba ya pili ni ile ya "Nimefika Kileleni Mlimani" ambayo utaipata ukibonyeza hapa.

Mtanzania Aanzisha Huduma ya Kublogu Tanzania

2006-01-15T15:07:00.000-08:00

Mike Mushi, ambaye ndiye aliyeunda tovuti za Uchaguzi Tanzania na KikweteShein, ameunda tovuti inayotoa huduma kwa wanaotaka kuanzisha blogu zao bure. Bado ninaipitiapitia tovuti hii kuitazama inavyofanya kazi ili niweze kuifanyia marejeo. Bonyeza hapa uitembelee.

Vita ya Msituni Inahamia Kwenye Mtandao Pepe

2006-01-15T11:42:00.000-08:00

Jamaa wa gazeti la Washington Post wana habari moja nimeisoma dakika hii kuhusu wapiganaji wa msituni Afrika wanavyotumia zana mpya za mawasiliano (blogu zikiwemo) na pia jinsi ambavyo mtandao wa tarakilishi unavyoweza kusaidia wapinzani wa serikali zenye tabia ya kufungia magazeti na redio. Binafsi nadhani habari hii ni nzuri ila mwandishi hakuifanyia utafiti wa kutosha. Bonyeza hapa uisome.

Edison Hataki Kupitwa na Blogu

2006-01-14T09:53:00.000-08:00

Blogu zitatapakaa nchi nzima. Ingawa itachukua muda, hii isituzuie tusianzishe safari hiyo sasa ya wananchi kuwa waandishi. Edison hataki kupitwa na mapinduzi haya ya zana za kupashana habari. Kwa kutumia blogu yake mpya anasema kuwa "saa ya ukombozi ni sasa, tusingoje kesho." Isije ikawa huyu ni Mtikila amejipa jina jipya!

Edison karibu. Bonyeza hapa uende uwanjani kwake.

Jarida Pepe la MBONGO

2006-01-09T17:08:00.000-08:00

Unakaribishwa kwa mikono miwili na bilauri ya maji na ndugu yetu Semkae Kilonzo. Anakukaribisha kwenye tovuti ya habari iitwayo Mbongo (ambapo utakutana na kona ya Michuzi). Kilonzo kaniambia jambo moja la msingi sana. Anasema kuwa ni jambo la busara iwapo tutaunganisha nguvu za blogu na tovuti katika kujenga jamii mpya. Nadhani swali moja ambalo ndugu yetu hawaweza kuliepuka toka kwetu ni lugha inayotumika kwenye tovuti ya Mbongo. Kilonzo, mbona?

Bonyeza hapa utembelee tovuti hiyo.

Nikisomwa na Mwalimu Mmoja Kama Bwaya Inatosha

2006-01-09T02:39:00.000-08:00

Bwaya kaniuliza swali swali zuri sana. Anataka kujua kama makala zangu (ambazo baadhi ziko ndani ya blogu hii, upande wa kuume chini ya picha yangu) na za wengine zinasomwa na Watanzania? Bonyeza hapa usome aliyoandika. Bofya hapa usome swali lake jingine kuhusu makala zangu.

Sijui nijibu swali lake la makala zinasomwa au la kwa upande gani. Ngoja niseme hivi: historia ya mabadiliko ya jamii duniani inaonyesha kuwa kundi dogo sana huwa ndio linaongoza mabadiliko hayo. Kwahiyo unapotaka kuleta mabadiliko unaweza kuwa umegusa watu wachache sana. Muhimu ni aina ya watu uliowafikia. Kwa mfano, walimu kama wewe. Kitendo cha kuwa wewe utakuja kuwa na kazi ya kutengeneza fikra na akili za vizazi vijavyo kimenifanya nifurahi sana kujua kuwa unasoma makala zangu. Hata kama nchi nzima ni wewe peke yake unazisoma, nitaridhika kabisa maana najua kuwa idadi ya watakaosoma makala zangu kupitia wewe (yaani kutokana na mafunzo na maarifa utakayowapa uliyoyapata kwenye makala zangu) ni wengi. Ninatazama jambo hili kwa misingi hiyo.

Lakini pia makala inaweza kusomwa na watu watatu, ila kwakuwa tunaishi kwenye jamii ambayo bado ina utamaduni wa gumzo mtaani, kwenye mabasi, majumbani,n.k., wako wengi ambao hawajaisoma hiyo makala lakini watapata yaliyoko kwenye makala hiyo kupitia wale watatu waliosoma.

Nakubaliana na Bwaya kuwa watu wetu hawapendi sana kusoma masuala nyeti. Wanataka habari nyepesi nyepesi. Lakini napenda tuwatambue wale wachache wenye moyo wa dhati wa kujisomea masuala mazito. Wapo na wanaongezeka. Wapo na wanawavuta wengine. Wapo na kila siku nasoma barua zao pepe wanazoniandikia wakishukuru, wakitaka ufafanuzi zaidi, wakitoa mapendekezo ya mada wanazotaka niandike, wakinikumbusha mada nilizowahi kusema kuwa nitaziandikia na kadhalika.

Kuna wanafunzi ambao wanasoma makala zangu na kujadili katika vilabu walivyoanzisha viitwavyo Jikomboe. Kuna walimu wanaotumia makala hizo kufundishia. Kuna wazazi wananiambia kuwa wanazijadili na familia zao. Wako vijana wameanzisha vikundi mtaani vya kusoma makala zangu kwa pamoja na kuzichanachana (kuzichambua). Wako ambao pia wameitikia wito ambao nimekuwa nautoa mara kwa mara kwa vijana kuunda makundi ya kujadili masuala nyeti ya katiba, utamaduni, historia, n.k. Kundi moja la vijana hawa limeniandikia hivi karibuni kunikumbusha jambo nililozungumzia katika makala moja niliyoandika miaka mitatu iliyopita!

Kwahiyo makala zangu (na zile za akina Boniphace na Jeff) wanaweza wasisome Watanzania wote, ila kumbuka kuwa wale wanaosoma wanaishi miongoni mwa Watanzania ambao kwa namna moja au nyingine wanakuwa kama wamezisoma kupitia mijadala, mabishano, gumzo, n.k., na wale waliozisoma.

Lakini narudia kusema kuwa watu wachache ndio huleta mabadiliko. Au niseme, watu wachache huongoza mabadiliko. Halafu niseme kuwa kama ninasomwa na mwalimu mtarajiwa Bwalya...ninajisikia kuwa kazi yangu sio bure. Hata wasiponisoma Watanzania wote. Mwalimu mtarajiwa mmoja anatosha kabisa.

Kuhusu utamaduni wa kujisomea, kweli hili ni tatizo kubwa nchini kwetu. Utatuzi wake unahitaji juhudi zetu binafsi kwenye familia, juhudi za watunga sera, taasisi, na serikali. Ukitaka kujenga utamaduni wa kujisomea wa nchi nzima utakata tamaa. Usianze na nchi. Anza na waliokuzunguka. Kama hujaweza kujenga utamaduni wa kujisomea wa watoto jirani zako au ndugu zako, huwezi kuanza kufikiria nchi. Utamaduni wa kujisomea wa nchi unaanza kujengwa majumbani, mitaani, nyumba kumikumi, n.k., kasha unakuja kuwa utamaduni wa taifa. Nakumbuka mimi kaka yangu alinisaidia sana kuwa na ari ya kujisomea. Nikiwa darasa la pili alinipeleka maktaba ya mkoa mjini Moshi akaniandikisha nikawa mwanachama. Toka wakati huo hadi leo nimekuwa “mgonjwa” wa kujisomea. Siku hizi nasoma kitabu zaidi ya kimoja kwa wakati mmoja (sina maana dakika hiyo hiyo).

Basi kitendo cha kaka yangu kunifanya nitambue utamu ulioko ndani ya kurasa za vitabu. Nikatumbukia kwenye kujisomea vitabu hadi ikafika wakati nikawa najifanya kuwa naenda shule kumbe nakwenda maktaba, shule siendi. Maktaba nilikuta vitabu ambavyo vilinigusa sana tofauti na vitabu vya shuleni. Masomo shuleni na vitabu tulivyokuwa tukitumia vilikuwa kama pombe ya mbege iliyotiwa maji. Masomo shuleni yalikuwa hayanipi changamoto. Sisemi kuwa huu ni mfano wa kuigwa ila nataka kuonyesha tu jinsi ambavyo nilijawa na hamasa ya kujisomea baada ya kaka yangu kunifungua macho. Toka wakati huo, ukitaka kunipata nenda maktaba au maduka ya vitabu. Utanikuta kwenye kona nimejikalia sakafuni ninachimba. Mji wowote ninaokwenda. Nchi yoyote ninayokwenda.

Kwahiyo tuna wajibu wa kuanza kubadili wale watu waliotuzunguka. Watoto wa jirani yako, watoto wa kaka yako, ndugu wa kuzaliwa tumbo moja, washikaji zako mtaani, n.k. Nikifanya hivyo, na yule akafanya hivyo, na wale nao, ndivyo tunabadili nchi.

Lakini pia tusidharau kabisa nguvu ya vyombo vya uongo (habari). Kuna nguvu nne duniani ambazo ndizo zinatufanya tuwe kama tulivyo. Nguvu hizi ndio zinatujengea mtazamo tulio nao kuhusu maisha: vyombo vya uongo/habari, dini, utamaduni-maarufu, na mfumo wa elimu.

Nje ya hapo hakuna kitu. Sasa tunaweza pia kutumia nguvu hizo hizo kupindua hali ilivyo na kujenga jamii mpya. Tunaweza kujenga hiyo jamii mpya hata tukifikia asilimia 0.5 ya Watanzania wote. Hasa walimu kama Bwalya. Fikiria mwalimu mmoja anafundisha wanafunzi wangapi katika uhai wake. Sasa ukifikia mwalimu mmoja ni sawa na kufikia idadi ya wanafunzi atakaowafundisha. Na hao wanafunzi atakaowafundisha kuna ambao watakuwa walimu. Nao watafundisha wanafunzi wangapi? Na kuendelea.

Uzuri wa Ugonjwa Huu ni Kuwa Una Dawa. Tutautibu!

2006-01-08T17:28:00.000-08:00

Nimesoma aliyoandika Chemi akitushauri kupenda urembo wa asili. Amezungumzia pia yale mashindano ya "miss world." Sijui nitasema nini katika waraka huu ila najisikia kuandika kidogo kuhusu hili suala na mengine yanayohusiana nalo. Bonyeza hapa usome Chemi aliyoandika Chemi. Chemi amehoji vigezo vinavyotumika kuchagua mwanamke mmoja kuwa ni mrembo kuliko wote duniani.

Kitendo tu cha dunia yetu ya leo kutumia muda na fedha ili watu washindane kuwa nani mzuri zaidi kinahitaji kuchambuliwa kwa kina zaidi. Ukiingia ndani sana katika uchambuzi wa suala hili utakuta masuala ya mwili wa mwanamke kufanywa kama chombo cha biashara, burudani (kwa macho na tamaa za mwili za wanamume), na mwili huo kuwa ni matangazo ya biashara. Kuna itikadi inayofanya yote hayo. Katika itikadi hii mwanamke anakuwa ni chombo kinachojumuisha tu mwili (matiti, miguu, macho, nywele, rangi ya ngozi, kucha, tabasamu, mwendo, n.k.). Akili na nafsi havina nafasi. Mfumo wa ubepari ulivyo na uchu wa kufanya kila kitu kuwa bidhaa umehamisha ukandamizaji wa wanawake kwa kuupa sura ya kibiashara ambayo inaficha makucha ya ukandamizaji au kuyapa sura mpya inayofanana na ukombozi. Utaona kuwa mwanamke wa nchi za magharibi anadhani kuwa haki zake keshazipata na kuwa mwanamke anayekandamizwa ni yule aliyeko nchi za Kiislamu au Afrika wakati ambapo mwili wake (mwanamke huyo wa magharibi au yule wa Afrika anayetaka kujifanyakama huyo wa magharibi) umekuwa ni malighafi ya mfumo wa kibepari ambao bado unaongozwa na itikadi ya mfumo dume. Kama jinsi ambavyo mashirika ya umma yanavyobinafsishwa ndivyo mwili wa mwanamke unabinafishwa katika mfumo wa soko. Kinachobakia ni kuwa mwanamke anaonekana katika jamii kutokana na mwili wake na mwanaume anaonekana kutokana na anayofanya na fikra zake. Mtazamo huu unaotokana na kasumba ya mfumo dume ndio unafanya magazeti mengi kutoa safu maalum kwa waandishi au wanasafu wanaume. Na wanawake wachache wanaopewa safu wanatakiwa kuandika tu masuala ya haki za wanawake (ambapo kwa upande mmoja sio jambo baya lakini kunakuwa na mtazamo kuwa wanawake hawawezi kuongelea masuala mengine mazito kwenye jamii zaidi ya haki za wanawake).

Sasa turudi kwenye dhana kuwa dunia inaweza kumpata mwanamke mrembo duniani. Swali linakuja: mwanamke huyo atapatikanaje wakati ambapo vigezo vya urembo vinatofautiana katika mataifa na tamaduni mbalimbali? Wakati unawaza kuhusu swali hilo utajikuta ukisema kuwa tatizo sio tu vile vigezo vya kimagharibi vinavyochukuliwa kama ndio vigezo vya "dunia." Utaanza kuhoji pia mantiki ya mwanamke kupita mbele ya wanaume na wanawake na nguo ya kuogelea (tena wakati akiwa haendi kuogelea!). Au kama nilivyosema hapo awali, mantiki nzima ya kushindana eti nani mzuri zaidi duniani. Tunarudi kwenye hoja ya mwanamke kuwa ni chombo. Kuwa bidhaa kama vile mche wa sabuni au gari. Chini ya msukumo wa soko na mfumo wa utamaduni-beberu unaoendesha mashindano kama "miss world" falsafa ya mtazamo kuwa mwanamke ni chombo cha burudani kwa mwanaume na pia ni kama bidhaa sokoni imejificha chini utamaduni-maarufu unaotufanya tuone kuwa mashindano hayo ni sehemu tu ya burudani inayofurahisha na kutufanya tufurahie maisha. Na wakati mwingine anayeshinda au kukaribia kushinda akiwa ni mtu wa kwetu, tunajenga imani nzito kabisa kuwa mashindano hayo ni tukio muhimu sana duniani. Utamaduni huu unafanya sehemu kubwa ya maisha kuwa ni kama vile tamthilia ndani ya luninga, maisha ni aina ya kujirusha katika bahari ya umagharibi. Utamaduni huu unafanya itikadi ya soko na utamaduni-beberu vinakuwa sio rahisi kuonekana.

Katika dunia hii ambayo maisha yanakuwa sawa na tamthilia ya kwenye luninga au kituko fulani, masuala ya maarifa, heshima ya utamaduni mseto, mijadala ya masuala ya msingi kwa wanadamu na jamii endelevu havina nafasi yoyote. Ndio maana inakuwa rahisi kwetu kufuatilia mashindano ya "miss" world kwa karibu zaidi kuliko Mkutano wa Jamii-Habari uliofanyika Tunisia mwaka jana. Ndio maana ni rahisi kwetu kufuatilia kwa furaha na hamasa iliyokaribia kuwa uendawazimu vituko vya kwenye luninga kama Big Brother au habari za udaku magazetini. Ndio maana ni rahisi zaidi kujua nani kashinda mashindano ya “miss” Tanzania zaidi ya jina la mwanafunzi aliyepata maksi za juu kabisa kwenye mtihani wa kidato cha nne. Ndio maana ni rahisi kufuatilia kwa shauku nani atashinda “miss” world kuliko nani atapata tuzo ya Nobeli ya Amani.

Kuna itikadi ndani ya haya yote. Itikadi hii ndio iliyofanya kifo cha Diana (aliyewahi kuwa mke wa mwana wa mfalme wa Uingereza, Charles) kuwa ni tukio kubwa kabisa kwa zaidi ya wiki moja huku kifo cha Mama Tereza (aliyefariki kipindi hicho hicho) kuwa ni habari za ukurasa wa ndani kwenye magazeti na habari za sekunde au dakika kadhaa kwenye luninga zilizokuwa zikirusha matangazo ya Diana asubuhi, mchana, jioni. Ni falsafa hii, tunaporudi kwenye suala la mwanamke, inafanya matangazo mengi ya biashara kuwa yana picha za wanawake maana miili yao ni kama kitega uchumi kwenye mfumo wa soko. Miili yao inaweza kuongeza idadi ya wateja wako, kama wanavyoamini watengeneza matangazo.

Turudi kwenye suala la Chemi la vigezo. Nani kasema kuwa dunia inaweza kufikia makubaliano juu ya uzuri wa mwanamke na hata wa mwanaume? Tafsiri na vigezo vya uzuri vinatokana na utamaduni, mazingira, na wakati. Tamaduni tofauti zina vigezo tofauti. Katika vigezo hivi hakuna kigezo bora zaidi ya kingine. Kwahiyo vigezo vya ulimbwende ni tofauti kati ya jamii na jamii ila sio kuwa kuna bora zaidi ya kingine maana kila kigezo kinakidhi mahitaji ya jamii yake. Vigezo vya jamii moja vinaweza visiwe na maana yoyote ukivihamisha kwenye jamii nyingine. Ila kigezo ni bora kwa yule aliyeko kwenye utamaduni uloizalisha kigezo kinachotumika. Inaweza ikatokea kutokana na sababu za utumwa kitamaduni na kifikra, jamii moja ikadhani kuwa vigezo vyake ni vya ovyo na kutaka kuiga vigezo vya wengine kama tunavyofanya sisi. Huu ni ugonjwa, tena mbaya sana lakini uzuri wake ni kuwa una dawa.

Kama mnavyojua, wazungu na waarabu kwenye jamii za mwambao wamekuwa wakitupeleka puta miaka na miaka. Puta hii wamemkuwa wakitumia mbinu na mifumo mbalimbali. Karibu ukitazama kila upande utaona putaputa hii ya wazungu na waarabu. Putaputa ya kutufanya tujisahau, tujione kuwa sisi si kitu, sisi ni washenzi, na wao ni bora na mfano wa kuigwa. Kwahiyo mila na desturi zao zinafaa kuigwa zote bila kujali kama zina faida au la. Dini zao ni za kweli na zetu ni za uongo. Manabii wao ni wa kweli na wa kwetu ni wa uongo.

Juzi nimeweka maoni kwenye picha ya baraza la mawaziri iliyoko kwenye blogu nzuri ya picha ya Michuzi. Katika picha hiyo mawaziri wetu walivyovaa ukikata vichwa vyao ukaulizwa useme mawaziri hao ni wa serikali ya nchi gani huwezi kujua. Hawaonyeshi kabisa kuguswa na hisia za utaifa na azma ya kutangaza na kuheshimu utamaduni wetu kupitia mavazi. Gadaffi, ambaye ni mwarabu, siku hizi anatangaza mavazi yetu zaidi ya sisi wenyewe. Maoni niliyotoa hapo ni haya:

Mavazi ya mawaziri wetu yanasema mengi kuhusu fikra zao, athari za elimu (maana sio unaona kuna madokta na maprofesa?), athari za msukumo wa utamaduni-maarufu wa magharibi na mustakabali wa utamaduni utaifa wetu. Hata waziri wa utamaduni naye pia?? Lakini sijui nashangaa nini wakati jina lake (Seif Khatib) linaonyesha amevaa begani mwake utamaduni wa akina nani

.
Utaona kuwa nilikuwa nashangaa kuwa hata waziri wa kulinda na kuendeleza utamaduni wetu hakuvaa vazi la utamaduni anaotakiwa kuulinda na kuuendeleza. Lakini katika kushangaa huko nikakuta najishangaa mwenyewe kwa kumshangaa waziri huyo kwani hata jina lake mwenyewe halijatoka katika utamaduni anaotakiwa kuulida na kuuendeleza. Kama jina lake tu ni la kuazima kwanini nitegemee avae mavazi ya kutukuza utamaduni usio na jina linalomfaa? Anaitwa Seif Khatib. Yaani waziri wetu wa utamaduni amebeba jina la kiarabu huku akiwa “anaendeleza na kulinda” utamaduni wetu. Ugonjwa huu, uzuri mmoja, unatibika. Tutautibu kwa njia yoyote ile. Bonyeza hapa uone picha hiyo kwa Michuzi.

Tutazame mifano zaidi ya gonjwa hili baya lenye dawa. Mifano: unaweza kwenda Rombo ndani ndani kabisa, ukakuta duka limepewa jina la kiingereza wakati ambapo mwenye duka na wateja wake hawafahamu kiingereza sawasawa. Tazama vikundi vya sanaa za maonyesho. Wakati vikundi hivi kazi yake, kama katiba zao zinavyosema, ni kuendeleza utamaduni wa Mtanzania na Mwafrika, majina yao ni ya kiingereza. Unakutana na Tanzania One Theatre, Muungano Cultural Troupe, OYA Theatre Group, Chemchem Art Group, Albino Revolution Cultural Troupe, Chang'ombe Youth Center, Nyunyusa Dancing Troupe, Roots and Kulture, n.k.

Kitendo cha kudai kuendeleza utamaduni wa Mtanzania au Mwafrika na kushindwa kabisa kupata jina la kundi toka katika utamaduni unaouendeleza ni kielelezo cha jinsi gani ugonjwa unaotokana na ukoloni mamboleo, ukoloni uchwara, na ubeberu wa kitamaduni ulivyotuathiri. Kwahiyo usishangae unapoona eti "miss" Afrika akiwa ni yule mrembo aliyechaguliwa na wazungu na kwa kutumia vigezo toka katika tamaduni zao na msukumo wa soko na itikadi za kibepari. Msukumo huu wa soko unatoka pande nyingi ikiwemo pamoja na makampuni ya nguo, vipodozi, kampuni za madawa, mahospitali (yanayofanya upasuaji wa kupunguza watu unene), makampuni ya matangazo, vyombo vya uongo (habari), n.k. Makampuni yote haya yanafaidika kwa namna moja au nyingine dunia inapokuza vizazi vyake kwa ndoto kuwa mwanamke mwembamba ndiye kilele cha uzuri. Kwa maneno mengine, mfumo wa kibeberu unafaidika sana na ugonjwa tulionao Waafrika. Na kama mnavyojua mfumo huu umekuwa ukitutumia na kutumia rasilimali zetu miaka na miaka huku ukijibadili kutokana na upepo wa wakati. Kulikuwa na wakati wa ukabaila, ubepari, na ubeberu. Mifumo hii ndio ilizalisha utumwa, ukoloni, ukoloni mamboeo, utandawizi (kuna tofauti kati ya utandawazi ambao ni mpana zaidi na utandawizi ambao ni mfumo unaoendeshwa na itikadi inayotaka dunia nzima kutawaliwa na kundi dogo la wanaume wa kizungu wanaoishi Ulaya na Marekani).

Niishie hapa. Siku kama leo ni zile siku ninapoandika bila kujua hasa ninaelekea wapi na nitaishia wapi. Kama nimezurura huku na kule bila kuishika mada sawasawa nisamehe. Huu ulikuwa ni mtiririko wa hisia na fikra. Kumbuka hii ni jumapili jioni na ninamsikiliza Bob Marley kwa sauti ya juu! Uhuru!

Somo, Ngoma, na Tambiko la Kwanzaa

2006-01-07T21:26:00.000-08:00

Nikifundisha watoto (unajua tena samaki mkunje angali mbichi) maana ya Kwanzaa na umuhimu wake kwa watu wenye asili ya Afrika. Katika picha nyingine hiyo: huyo ni Barry akifungua somo la Kwanzaa kwa ngoma baada ya kutoa tambiko. Barry ni Mmarekani Mweusi ambaye amejifunza kupiga ngoma aina ya Djembe katika nchi ya Guinea, Afrika Magharibi. Mikono yake migumu kama tairi la nyuma la trekta aina ya Kubota (hivi Makubota yaliishiaga wapi?). Juu ya Kwanzaa soma niliyoandika hapo chini na pia bonyeza hapa.

Bonyeza juu ya picha zenyewe uzione kwa karibu zaidi.

Kwanzaa: Meza ya Umoja (na kanga za Mnazi Mmoja!)

2006-01-07T21:04:00.000-08:00

Nadhani baadhi mnafahamu kuwa mimi husherehekea sikukuu ya Kwanzaa. Moja ya mambo yanayofanywa wakati wa kusherehekea sikukuu hii inayoenzi maadili ya Kiafrika ni kuandaa meza ya Kwanzaa inayojumuisha vyakula, mishumaa, kikombe cha umoja, n.k. Unaona mwenye kwenye picha hii. Unaweza kuwa uliwahi kuona kanga hizi zikiuzwa pale Mnazi Mmoja. Meza hii niliandaa kwenye mhadhara ambao nilifundisha watoto weusi juu ya sikukuu hii na umuhimu wake kwao kama watu wenye asili ya Afrika. Baada ya tambiko, mafundisho, na ngoma, tulijumuika katika karamu. Neno karamu (ambalo liko katika wimbo wa Lionel Richie wa All Night Long) ndio hutumika wakati wa sikukuu ya Kwanzaa. Pia wakati wa sikukuu hii wamarekani weusi wanaojali Uafrika wao husalimiana "habari gani." Kutegemea na maadili ya siku hiyo (yako saba) mtu atajibu. Kama ni siku ya ujima, ukimsalimu atajibu, "Ujima."
Bonyeza hapa usome zaidi kuhusu Kwanzaa.

Bonyeza juu ya picha ili uzione vizuri zaidi.

Mkutano wa Podikasiti: podikasiti darasani

2006-01-07T14:34:00.000-08:00

Mkutano ndio unafikia mwisho. Umebaki muda wa mvinyo, kujuana zaidi na kubadilisha kadi. Mada tuliyokuwa tukiijadili awali ya matumizi ya podikasiti kufundishia unaweza kuiona kwa kubonyeza hapa. Kiungo nilichotoa hapo chini kinaweza kukupa shida kuipata. Hiki cha sasa kinakupeleka moja kwa moja. Unaweza kuona mfano wa kazi ya watoto wa shule waliyofanya kwa kutumia teknolojia ya podikasiti. Bonyeza hapa.

Kinachofuata sasa ni Jikomboe kupanuka. Kwa sasa Jikomboe, yaani blogu hii, ni kama gazeti pepe langu. Sasa itapanuka kuwa sio gazeti pepe tu bali redio pepe na luninga pepe (podikasiti ya video). Mwambieni Mengi akae chonjo, wanablogu tunaingilia nyanja ya habari kwa ari mpya na nguvu mpya (nakopa maneno yaliyotumika kutufanya tuamini kuwa tunajenga nchi mpya kwa sura zile zile au sura mpya zenye mtazamo kama zile sura za zamani).

Kama tusemavyo kule Moshi ninawaambia, "Watashaa." Kama hujui maana yake muulize Mtafiti.

Matumizi ya Podikasiti Kufundishia

2006-01-07T12:20:00.000-08:00

Hivi sasa tunajadili matumizi ya teknolojia ya podikasiti kufundishia wanafunzi. Unaweza kusoma yote tunayojadili katika ukurasa huria wa "wiki" kwa kubonyeza hapa.
Kuna wahudhuriaji zaidi ya mia moja katika mkutano huu kuhusu podikasiti. Unadhani watu weusi tuko wangapi? Huwezi kuamini...Kama zama za mapinduzi ya viwanda zilitupita, tusikubali zama za maarifa na habari zitupite. Haiwezekani.

Umemuona mwanablogu huyu?

2006-01-07T09:04:00.000-08:00

Niko ndani ya ukumbi panaponyikia mkutano huu niliouzungumzia jana. Mara naona waraka pepe toka kwa Silvery Duttu akiniambia kuwa blogu yake iko tayari kutangazwa. Usisumbuke na kiingereza alichokiweka hapo, hii itakuwa blogu ya Kiswahili ili kuenzi lugha anayoitumia asubuhi, mchana, jioni. Bonyeza hapa umtembelee kumkaribisha.

Mtandao wa Tarakilishi na Ustawi wa Lugha

2006-01-06T03:57:00.000-08:00

Moja ya sababu kubwa zilizonifanya nianze kublogu kwa Kiswahili ni imani kuwa ili dunia ya leo na kesho (ambayo ni ya zama za habari na maarifa) iwe yetu sote, tunapaswa kutumia teknolojia mpya za habari na mawasiliano kukuza, kuhifadhi, na kuendeleza lugha mbalimbali za wana dunia. Dunia yetu ina lugha kama 6000 hivi lakini ni lugha 12 tu ambazo zinatawala katika mtandao wa tarakilishi. Na katika hizo 12 ni lugha mbili au tatu ambazo hasa ndio zinatumika kueneza habari na maarifa. Wakati huo huo wataalamu wa lugha wanatangaza kila mwaka idadi ya lugha zinazokufa. Lugha inapokufa ni sawa na kuungua kwa moto kwa maktaba kubwa kuliko zote duniani. Unajua lugha, zaidi ya kuwa ni chombo cha mawasiliano, ni hazina au benki ya maarifa, mila, na utamaduni. Maarifa ya jamii huhifadhiwa kwenye lugha. Ili ujue dawa za mitishamba zinazotumiwa na Wa-Kahe, kwa mfano, unapaswa kujua Kikahe. Kikahe kikifa basi na elimu hiyo ya dawa inakufa (nimetumia mfano huu maana ni watu wachache wanajua kuwa Kikahe ni lugha na pia kwakuwa hii ni kati ya lugha ambazo zinapotea). Njia mojawapo ya kuhifadhi lugha ni kuitumia. Lakini ninalopenda kusisitiza hapa ni kuwa unapoitumia lugha au kitu chochote katika teknolojia pepe au elektroniki unakuwa umehifadhi milele na milele. Kublogu ni tofauti na kuchapisha kitabu ambapo kinaweza kuungua, kupotea, kuliwa na mchwa au panya, kuibiwa, n.k. Unapohifadhi mambo kwa njia za elektroniki au pepe unakuwa umehifadhi daima.

Kwahiyo visa tunavyoandika, mashairi, habari, maoni, n.k. vinachangia kuiweka lugha yetu katika mtandao pepe. Zaidi ya kuwa tunahifadhi tunayoandika na pia kuwezesha wengine kuyasoma wakati wowote, popote pale, tunaongeza idadi za lugha mtandaoni na hivyo kufanya mtandao usiwe tu ni mahali pa wale wenye kuzungumza Kiingereza, Kifaransa, Kichina, Kijapani, Kijerumani, n.k. Jitihada zetu ni moja ya jitihada za kufanya mtandao pepe kuwa wa kidemokrasia na unaojumuisha sauti za tamaduni na lugha mbalimbali. Kama mtandao pepe ni kijiji cha dunia, basi hicho kijiji kisiwe na lugha moja tu bali lugha mbalimbali za wanadunia.

Basi nilipoanza kublogu kwa Kiswahili nilikuwa nikisema jambo moja kwenye kila mahojiano niliyokuwa nikifanya. Wakati ule ilikuwa ni habari nzito. Eti, "kuna jamaa anablogu kwa lugha ya Kiafrika." Walikuwa wakiniuliza kwanini ninablogu kwa Kiswahili ninawambia kuwa ninaendeleza kazi waliyokuwa wakiifanya akina Ngugi na Chinweizu. Ngugi, kama unakumbuka, aliandika kitabu chake kiitwacho "Decolonising the African Mind." na Chinweizu (Mloyi unakumbuka maandiko yake ya Negro negropobia?) aliandika Decolonising African Literature. Katika vitabu hivi walikuwa wakitutaka tuondoe ukoloni mamboleo na ukoloni uchwara katika akili zetu. Walikuwa wakizungumzia hasa fasihi andishi. Wakati ule mapinduzi ya teknolojia za mawasiliano yalikuwa hayajafika katika hatua tuliyoko hivi sasa. Kwahiyo wakati ule ukiongelea fasihi andishi unazungumzia vitabu. Hivi sasa tuna ulimwengu mpya ambao umetuletea maandishi pepe, fasihi pepe, riwaya pepe, n.k. Tuna mtandao pepe. Kinachofanyika hivi sasa ni muendelezo wa kazi za akina Ngugi na Chinweizu. Muendelezo huu, katika mahojiano, nilikuwa nikisema, "I am simply decolonising the Internet."

Na hiyo ilikuwa ni moja ya sababu zilizonifanya nianza kunyonya titi la mama hata kama la mbwa kwa kutumia teknolojia ya blogu. Sasa sio mimi peke yangu au sisi wenyewe tunaoona umuhimu wa kuwa na lugha mbalimbali katika mtandao pepe. Shirika la Sayansi, Elimu, na Utamaduni la Umoja wa Mataifa (UNESCO) limetoa ripoti kuhusu matumizi ya lugha mbalimbali katika mtandao wa tarakilishi. Shirika hili linaamini kuwa dunia itakuwa bora zaidi pale ambapo lugha nyingi zaidi zitaanza kutumika katika mtandao wa tarakilishi. Katika ripoti yake limesema:

UNESCO has been emphasizing the concept of “knowledge societies”, which stresses plurality and diversity instead of a global uniformity in order to bridge the digital divide and to form an inclusive information society. An important theme of this concept is that of multilingualism for cultural diversity and participation for all the languages in cyberspace.

Kusoma ripoti nzima (katika pdf) bonyeza hapa.

Naanza Mwaka wa Kirumi kwa Mkutano

2006-01-06T02:28:00.000-08:00

Kesho naenda mkutanoni katika chuo kikuu hiki hapa. Mikutano haitakaa iishe dunia hii. Unadhani? Naanza mwaka wa Kirumi kwa mikutano. Mkutano huu ni tofauti kidogo na mikutano mingi tuliyoizoea. Kuna aina ya mikutano ambayo siku hizi inayoitwa "mikutano huria" au wakati mwingine wanatumia neno ambalo nimelishindwa kulitafsiri: unconference. Ni kama kusema vile "mkutano usio mkutano"! Mkutano huria ni mkutano ambao hauna watoa mada na wapokea mada. Wahudhuriaji wote ni watoa mada. Kila mmoja ni mshiriki. Kila mmoja anachukuliwa kuwa ni mtalaamu na ana jambo la kusema au kuchangia. Hii ni tofautina mikutano ambayo kunakuwa na wasikilizaji wanaoketi kimya huku "mtaalamu" au "msomi" "akiwaelimisha" juu ya jambo fulani.

Katika mkutano huria, wanaohudhuria ndio wanaoamua nini kijadiliwe au mada zipi ndio muhimu. Na ndivyo mkutano ninaohudhuria kesho ulivyoandaliwa. Bonyeza hapa usoma kuhusu mikutano huria. Mkutano huria ninaodhudhuria kesho unahusu masuala ya podikasiti. Soma kwa kifupi kuhusu podikasiti hapa. Mkutano unaitwa Podcastercon 2006. Bonyeza hapa usome tovuti kuhusu mkutano huo na hapa usome blogu ya mkutano huo.

Nitaandika zaidi juu ya mkutano huo nikiwa mkutanoni hapo.

Unajua Jinsi Ya Kuandika Kuhusu Afrika?

2006-01-06T01:01:00.000-08:00

Binyavanga Wainaina ameandika makala moja nzuri sana ambayo inatumia kejeli kutazama jinsi ambavyo watu weupe wanavyolitazama bara la Afrika. Katika makala hii anatoa ushauri wa jinsi ya kuandika habari za Afrika. Lakini, kama nilivyosema hapo awali, ushauri wenyewe ni kejeli fulani hivi. Bonyeza hapa usome makala yenyewe.

Binyavanga ni mwanzilishi wa jarida la fasihi nchini Kenya liitwalo Kwani?, ambalo unaweza kulisoma kwa kubofya hapa. Pia unaweza kusoma zaidi juu yake kwa kubonyeza hapa.

Asante Kenyan Pundit kwa makala hii.

Ethan Zuckerman Kafurahia Blogu ya Mwandani

2006-01-05T06:05:00.000-08:00

Mwandani kaandika kisa kimoja kikali sana. Nilipokuwa namsoma nilikuwa najisemea, "Hivi bila blogu habari kama hii Tunga angeitoa wapi?" Ingebidi labda atafute gazeti au labda atume barua pepe kwa marafiki zake. Kisa murua sana maana kinaonyesha masahibu ya kuishi Ughaibuni na pia madhara ya vyombo vya habari vya magharibi ambavyo habari za Afrika kwao ni zile zinazohusu maafa au ufedhuli wa watwawala. Pia kisa hiki kinaonyesha jinsi ambavyo wananchi wengi wa magharibi wana ufahamu mdogo sana wa dunia iliyowazunguka.

Furaha yangu imekuwa kubwa zaidi nilipogundua kuwa sisi wazungumzaji tu wa Kiswahili waliofurahia aliyoandika Mwandani bali pia wazungumzaji wa Kiingereza. Rafiki yangu na mmoja wa waanzilishi wa mradi wa Sauti za Dunia, Ethan Zuckerman, amependa sana aliyoandika Mwandani. Amemzungumzia Mwandani kwenye blogu yake (na niliposoma pale kuna msomaji mwingine alishatoa maoni na kusema amependa sana). Bonyeza hapa usome aliyoandika Ethan kuhusu Mwandani. Bonyeza hapa usome alichoandika Mwandani.

Mjadala wa Neno Muafaka la Teknolojia ya Blogu Unaendelea

2006-01-02T13:43:00.000-08:00

Ule mjadala wetu kuhusu neno muafaka la teknolojia hii ya blogu bado unaendelea. Maneno ambayo yamependekezwa hadi hivi sasa ni haya:
Duru, Kasiri, Lipuli,Vuga, Dondoo, Lipuli, Vuga, Uwanja wa Fikra Komavu, Gazeti Tando, Ngwanga, Bawazi, Dimba, Pukutu, Dafinapepe, na Ungo.

Bonyeza hapa ili usome sababu za kupendekezwa kwa maneno haya. Mtu yeyote anaweza kushiriki kwenye mjadala huu hata kama sio mwanablogu.

Hukujua Kuwa Michuzi Anaimba Sauti ya Nne?

2005-12-30T17:40:00.000-08:00

Michuzi sio tu ana ujuzi wa kupiga picha bali pia ni mwimbaji mashuhuri sana hasa akiwa nchi za nje. Katika picha hii Watanzania tuliokuwa katika mkutano kuhusu utandawizi na demokrasia katika jiji la Helsinki, Ufini mwezi Septemba, tunatumbuiza. Siku hii ilikuwa ndio mwisho wa mkutano. Tukiwa katika tamasha la kuaga wana mkutano, Mama Maria Shaba ghafla alitufuata mimi na Michuzi nje. "Watanzania lazima tuwakilishe."
Nikamuuliza, "Tuwakilishe vipi?"
Akasema, "Toka tuje wanaoimba na kutumbuiza ni Wafini, kwani sisi hatuna sauti? Lazima tukaimbe."

Basi akatukusanya Watanzania mmoja mmoja. Hakuna kukataa. Hao jukwaani. Mnajua tuliimba wimbo gani? Buni....tuliimba Malaika. Michuzi akiwa ndio sauti ya nne. Katika picha unamuona Mama Shaba akiwa ameshika kipaza sauti. Pia unaweza kumuona Mama Mwingira wa Tango kushoto kwa Maria Shaba. Mimi nadhani nilikuwa naimba sauti ya 60! Baada ya kumaliza wimbo wa Malaika, tuliaga jukwaa, huku tukishangiliwa kwa nguvu, kwa wimbo wa Bob Marley: Get Up, Stand Up. Wimbo huu ndio wimbo rasmi wa shirika la kutetea haki za binadamu la Amnesty International.

Ili uione picha kwa uzuri zaidi bonyeza juu ya picha yenyewe (peleka mkono wa kipanya cha tarakilishi yako).

Kikosi Kamili Chini ya Kocha Fide Pale Helsinki

2005-12-30T17:33:00.000-08:00

Sio muda mrefu nimemaliza kuonga na Jeff Msangi ambaye alikuwa akimzungusha mjini Toronto Boniphace Makene. Katika maongezi yetu tuligusia umuhimu wa kuanza kupanua matumizi ya blogu zetu kwa kuweka picha pale panapofaa na hata kuingilia blogu za sauti na video. Wakati wake utafika.

Baada ya kuongea na Jeff kuhusu picha nikatembelea kamera ya Michuzi nikakuta amewaka picha ambayo imenikumbusha picha ambazo nilisahau kabisa kuziweka kwenye blogu. Bonyeza hapa uone picha aliyotupiga Michuzi nikiwa na mzee mwenyewe Mti Mkubwa (ambaye amebatizwa jina jipya: Mti Mkubwa Mkavu). Basi ndipo nikaanza kuchimba picha nilizonazo toka Helsinki.

Nimeweka picha ya kikosi kamili cha Watanzania wanaoishi Helsinki na wale ambao tulikuwa tuko ziarani hapo. Utamuona Michuzi mwenyewe na Mti Mkubwa Mkavu wakitabasamu. Picha hii ilipigwa na rafiki yangu, Vikii wa jarida la mtandaoni la nchini Malaysia, Malaysiakini. Hapa tulipokuwa ni eneo la kujidai la Watanzania wanaoishi jijini hapo (Fide: klabu ile inaitwa nini tena?).

Ukitaka kuiona picha hii vizuri, peleka mkono wa kipanya chako juu ya picha kisha bonyeza.

**Nyongeza:

Ametokea mtu akaweka majina ya walioko kwenye picha hii kwenye sehemu ya maoni. Pia jina la klabu yenyewe, Chelsea Sports Pub. Majina ya walioko kwenye picha haya hapa:

Pichani kutoka kushoto ni Lwitiko Mwalukasa, Benard Kakengi, Mapinduzi Mwankemwa, Mzee Kimaro, ? , Raymond Mutafungwa, ? , Dennis Londo, Muhidin Issa Michuzi, F MtiMkubwa Tungaraza, Ndesanjo Macha, Magonera Malima, na Kisakisa Kiwara. Picha ilipigwa ndani ya Sports Pub Chelsea. Ukifika Helsinki usiwe na wasiwasi wa kuwapata Watanzania fika Chelsea Sports Pub utawakuta wakinywa na kusogoa masuala mbali mbali ya kijamii, kisiasa, na kiuchumi.

Unaifahamu Afrika Kwa Kiasi Gani?

2005-12-30T05:02:00.000-08:00

Mmoja wa waanzilishi wa Mradi wa Sauti za Dunia, Ethan Zuckerman, ameaandaa ka-mtihani kadogo kuhusu Afrika. Jaribu kufanya mtihani huo uone unafuatilia masuala ya Afrika kwa kiasi gani. Nimekosa swali moja kwa ujinga! Tena swali lenyewe linahusu jambo ambalo ninalifuatilia kwa karibu sana, matumizi ya simu za mkono Afrika. Bonyeza hapa ujaribu bahati yako. Kisha bonyeza hapa usome aliyoandika kuhusu ka-mtihaki hako na maoni ya waliojaribu. Iwapo hutaki "kuibia" nakushauri ufanye mtihani wenyewe kabla ya kusoma maoni ya watu maana pale utapata baadhi ya majibu. Ukifanya hivyo utakuwa unajidanganya mwenyewe. Ukipata F tuambiane!

Huko nyuma niliwahi kutoa jaribio jingine lilloandaliwa na mradi wa SchoolNet. Jaribio lao, kama ambavyo utaona, linakupa nafasi ya kuchagua unataka maswali magumu au mepesimepesi. Kama umetoka Afrika, chagua maswali magumu kabisa. Chini ya ramani utakayoiona ukibonyeza kiungo nitakachokupa ndio kuna sehemu ya kuchagua kama unataka mteremko au la. Bonyeza hapa ujaribu. Kama umepata sifuri tuambie usifiche!

Isikilize Sauti ya Baragumu

2005-12-29T16:33:00.000-08:00

Zamani kulikuwa na gazeti Tanzania lililoitwa Baragumu (labda limefufuka tena, sijui). Baragumu ninayozungumzia sio hilo gazeti bali ni blogu mpya ya ndugu yetu ambaye alikuwa mwanablogu hata kabla hajawa na blogu yake mwenyewe kutokana na ushiriki wake kupitia maoni yake katika blogu mbalimbali. Huyu ni ndugu Mwaipopo anayeblogu toka Alabama. Bonyeza hapa ukamsabahi.

Kumbe Kaka Pori naye anablogu?

2005-12-26T16:25:00.000-08:00

Jua ndio linachomoza kwenye uwanja wa blogu za Kiswahili (huku tukiwa bado tunatafuta neno muafaka la chombo au uwanja huu...Da Mija ameweka kiungo cha uwanja wa kuendesha mjadala huu). Napenda kumtangaza mwanablogu mpya, Kaka Pori. Kwa maneno yake mwenyewe anasema kuwa lengo la blogu yake ni:

"Tumetawaliwa kiakili kiasi kwamba tumesahau kabisa sisi ni akina nani. Sasa basi, kwa kupitia blogu hii, tutaamshana, kukumbushana na kupeana hamasa ya kujitambua kwa kupeana habari chanya na mawazo jengevu. Ili tuweze kujenga jamii chanya, tunahitaji umoja, mshikamano, kujielewa na kuelewana, kuhabarishana, n.k. Nipo nanyi nyote na ninaomba kujiunga nanyi."

Bonyeza hapa umtembelee na kumkaribisha. Utamaduni wa kukaribishana ni mzuri sana na ninaombe tuuendeleze.

Kiungo nilichoongelea hapo juu cha kibanda cha kubunga bongo kuhusu neno muafaka la blogu utakipata ukibonyeza hapa.

Mbona Kasheshe Bloguni?

2005-12-23T09:00:00.000-08:00

Majuzi nilikuwa nafanya mahojiano kuhusu blogu zetu za Kiswahili. Jambo moja ambalo nilisema kuwa napenda kuona likitokea ni kuwepo kwa blogu za watu wenye fikra mbalimbali zinazotofautiana. Kujadiliana na watu wanaofikiri kama wewe ni sawa ila unaweza usikue kifikra na pia usipate changamoto ya kuhoji fikra zako mwenyewe na kutafuta maarifa zaidi. Sio vyema tukiwa na blogu za watu wote wanaokubaliana. Kwahiyo nchi kama Irani (ambayo ina blogu zaidi ya laki moja) na Marekani ambapo zipo blogu za wananchi wenye fikra za mrengo wa kushoto, katikati, kulia, n.k. Hapo utakuta mawazo ya watu wanaotetea mfumo na mambo yalivyo hivi sasa na blogu zenye kunyooshea kidole mfumo wa utawala, utamaduni, elimu, n.k. Utakuta pia blogu za vichekesho na kejeli, blogu za fasihi, n.k. Pia unakuta zipo blogu za picha, za video, za sauti (podikasiti), n.k. Unaweza pia kuona kuna blogu nyingine za kufundishia, za kutangazia biashara, za wasafiri, wanamichezo, n.k.

Chemi Che Mponda alipoandika juu ya matako makubwa nikaona kuwa huenda huo ndio mwanzo wa blogu zinazozungumzia masuala ambayo hatupendi kuyazungumzia hadharani. Bonyeza hapa usome. Ndugu Swai naye alianzisha blogu yake akawa anaandika masuala kwa staili yake na masuala ambayo wanablogu wengine hatuandiki. Lakini amekuwa kimya kwa muda. Bonyeza hapa uone blogu yake.

Sasa amekuja mwanablogu wa picha ambaye bado sijamuelewa hasa mwelekeo au nia yake. Pia hajaandika jina lake na anasema anaishi "cybercity." Yaani mji wake uko kwenye mtandao wa kompyuta. Utaona kuwa huyu bwana ni mtu wa utani sana. Hii ni staili nyingine ya blogu (naamini kuwa waliopigwa picha wametoa ruhusu picha zao kutumia. Katika mwongozo mpya wa wanablogu wapya ninaoandika, ninazungumzia masuala ya kisheria kuhusu blogu zetu hizi. Nitagusia kuhusu matumizi ya picha) ya picha tofauti na ile blogu ya kwanza ya picha ya Issa Michuzi. Itazame hapa.

Huyu bwana nimeanza kuhisi kuwa ni nani. Ila kwakuwa hajapenda kujitangaza jina sio vizuri kumtaja hata kama unamfahamu. Katika mwongozo ninaoandika, ninaongelea pia kuhusu namna ya kublogu kama hutaki ujulikane kuwa wewe ni nani. Kuna mbinu za kiufundi ambazo unatakiwa kutumia maana hata usipotumia jina lako, ni rahisi mtu kujua kompyuta unayotumia na huduma za intaneti unazipata toka kwa nani. Kila kompyuta ina namba ambayo ni rahisi sana kuipata. Njia hii imetumiwa majuzi huko China kumtia jela kwa miaka 10 mwandishi wa habari wa China. Yahoo! iliisaidia serikali ya China kumtambua mwandishi huyu. Bonyeza hapa usome habari hiyo.

Bonyeza hapa umuone mwanablogu mpya wa picha.

*****************************

Ninasafiri kwa siku mbili tatu hivi kimapumziko. Nitakuwa nachungulia mtandaoni kwa chati. Nadhani jumatatu ndio nitaweza kuandika tena nikiwa nimetulia. Kama nitaandika kabla ya hapo itakuwa ni juujuu au jambo la muhimu sana.

********************************

Wakati huo huo: ninajiandaa kusherehekea sikukuu ya Kwanzaa. Sikukuu hii husherehekewa kwa kukumbuka na kuenzi nguzo saba. Bonyeza hapa uzione. Zaidi juu ya sikukuu hii baadaye. Kwa sasa bofya hapa usome kuhusu sikukuu hii.

TAFAKARI YA MAISHA: Mwanablogu mwingine aingia uwanjani

2005-12-21T19:44:00.000-08:00

Nani alisema kuwa kule Musoma hakuna wanablogu? Acha utani...yupo mwanablogu mpya wa Tafakari ya Maisha toka Musoma. Anauliza ni kitu gani cha muhimu kati ya uhai na kuvaa? Sasa kama kawaida yetu tumkaribishe. Bonyeza hapa umtembelee na kumpa maneno mawili matatu ya kishikaji.

Blogu Ziitwe Ngwanga?

2005-12-20T09:01:00.000-08:00

Mjadala huu huwa unazuka na kutokomea. Jeff ameuanzisha tena. Bonyeza hapa usome aliyoandika. Pia tazama sehemu ya maoni. Soma changamoto ya Mwaipopo (ambaye nasikia ataingia rasmi kwenye blogu hivi karibuni). Da Mija akapokea wito wa Jeff. Anapendekeza neno Ngwanga litumike badala ya neno "blogu" ambalo baadhi wanaona kuwa neno hili tumelichukua kutokana na uvivu tu. Yaani tumechukua neno la Kiingereza "blog" tukaongeza "u." Bonyeza hapa. Pia tazama maoni yaliyotolewa hapo kwa Da Mija. Unaweza kuchangia hapo kutokana na pendekezo la Da Mija.

Nafasi ya Fasihi Andishi, Simulizi katika Blogu za Kiswahili

2005-12-20T07:30:00.000-08:00

Kama unatazama blogu za Kiswahili kwa karibu, utagundua kuwa kuna jambo moja zuri sana linajitokeza. Blogu zinakuwa sio tu eneo la kujadili masuala ya kisiasa, kiutamaduni, na kijamii bali pia ukumbi wa kutoa kazi za fasihi andishi: riwaya, tamthilia, visa, mashairi, n.k. Hili ni jambo kubwa sana. Nimelizungumzia majuzi kwenye muhtasari niliouandika kwenye blogu ya Sauti za Dunia. Bonyeza hapa uusome. Katika muhtasari huo nilisema hivi (kwa Kiingereza):

It is a common practice among Swahili poets to challenge each other using various poetry techniques and deep Swahili. For example, one poet writes a poem and another poet responds to that poem through a poem of his/her own. This practice has long been associated with Uhuru, the only Tanzanian newspaper that for many years provided a space for Swahili poets to publish their work. Two poet bloggers, Kasri la Mwanazuo and Fasihi za Ufasaha are moving this practice to cyberspace through their blogs.

This is a particularly interesting moment in the Kiswahili blogosphere. The possibility that blogging can become one of the ways in which Tanzanian writers and poets can bypass problems related to cost of publication and economics of distribution is an exciting one. For example, because of limited distribution, Swahili novels are mostly read in Tanzania and Kenya. If Swahili literary works are available online in digital format, making them globally accessible, Swahili speakers in Oman, India, the US, China, Mexico, South Africa and elsewhere will be able to read them. Utilizing this opportunity, Kasri la Mwanazuo is planning on releasing his first novel on his blog.

Utaona kuwa katika muhtasari huo ninasema kuwa kazi za fasihi andishi hata fasihi simulizi za Kiswahili (tukianza kutumia blogu za sauti [podikasiti]) ambazo kawaida husomwa Afrika Mashariki tu (hasa nchi mbili, Kenya na Tanzania) zinaweza kuanza kusomwa na wasomaji zaidi ya milioni 100 wa Kiswahili ambao wametapakaa sehemu mbalimbali duniani. Kwa kuwa mzungumza Kiswahili anayependa fasihi ya Kiswahili anayeishi India au Oman hawezi kununua vitabu vilivyoko pale TPH, mtaa wa Samora, kazi hizi za fasihi zikipatikana katika mtandao wa Intaneti (kupitia blogu, podikasiti, fasihi pepe, n.k.) mtu huyo ataweza kujisomea. Kwa maana hiyo fasihi ya Kiswahili haitakuwa ni fasihi ya kikanda bali ya dunia. Tunajua kuwa wachapishaji wetu wanakabiliwa na tatizo la mtaji wa kuweza kusambaza kazi za Kiswahili duniani.

Jambo jingine ni kuwa kuna watu wengi ambao ni watunzi wazuri sana wa riwaya, mashairi, au tamthilia lakini kutokana na gharama kubwa za kuchapa vitabu, kazi zao zinabaki kwenye shajara au madafatari yao binafsi. Wanazisoma wenyewe. Teknolojia ya blogu inaweza kusaidia, kwa kiasi fulani, baadhi ya watunzi hawa kwa kuwapa eneo la kuchapa kazi zao kwenye mtandao wa Intaneti. Hata kama mtunzi mwenyewe hana utaalamu wa masuala ya kompyuta anaweza kutumia ndugu au marafiki au wakereketwa ili waweke kazi zake mtandaoni.

Upo pia uwezekano wa kazi za fasihi zilizotolewa mtandaoni kutolewa katika muundo wa vitabu kwa ajili ya wasomaji wasio na mtandao wa Intaneti au wanaotaka kusoma kazi hizo katika vitabu. Kwa mfano, mwablogu Salam Pax wa Iraki amechapisha yaliyoko kwenye blogu yake kwenye kitabu ambacho kimepata umaarufu sana. Bonyeza hapa uone kitabu chake na hapa ili usome habari zake.

Kama ulifuatilia tuzo, ambayo niliitangaza hapa, ya blogu duniani utakumbuka kuwa aliyeshinda (ukiacha blogu ya Sauti za Dunia ambayo ilishinda kwa upande wa Kiingereza) kwa blogu za lugha zote zilizoshiriki ni blogu ya kifasihi ya Kihispania ambayo inaelezea maisha ya familia moja. Blogu hiyo inaitwa, Heshima Kidogo, Mimi ni Mama Yako. Bonyeza hapa uone tangazo la kushinda kwake. Bonyeza hapa uone blogu yenyewe.

Kwahiyo kama mnafahamu watunzi ambao wanatafuta njia ya kuweka kazi zao mikononi mwa wasomaji ila hawana namna, waelezeni kuwa blogu ni moja ya njia ambazo hazihitaji gharama kubwa. Sio mwanzo na mwisho ila ni moja ya upenyo.

Ninawaombeni pia mufuatilie kazi zilizopo hivi sasa mtandaoni za fasihi. Majuzi nilimtangaza mwanablogu mshairi Ustaadh, Rashid Mkwinda(ngominenga)(Malenga wa Kilwa). Nikamrushia dongo mshairi mwingine, Makene, kuwa akae chonjo. Bonyeza hapa usome tangazo hilo. Makene, mzee wa Kasri la Mwanzuo, akajibu kwa mashairi mawili ya haraka haraka katika sehemu ya maoni. Nami nikaweka shairi fupi la Ustaadh Mkwinda jibu kwa Makene na mimi. Bonyeza hapa usome mashairi hayo. Makene hakuishia hapo, akakaa chini na kumkaribisha Mkwinda kwa shairi. Bofya hapa usome shairi hilo. Mkwinda naye akamwandikia Makene. Bofya hapa na pia tazama sehemu ya maoni kwa mashairi la Makene. Mkwinda akaandika pia shairi jingine kwa Makene na mimi. Bofya hapa. Nadhani nitamjibu Mkwinda kwa Kichagga!

Mkwinda kaandika shairi, baada ya mchezo wa kuigiza wa uchaguzi Tanzania, akiuliza kama ulikuwa ni uchaguzi au uchakuzi. Lisome hapa. Makene kabla hajaondoka kwenye Kanada aliandika shairi la salamu kwa wanablogu wa Kiswahili. Bofya hapa ulione. Kinachotokea katika mashairi haya ya nipe nikupe ni sawa na hali ambayo imekuwepo kwa miaka mingi katika ukurasa wa mashairi wa gazeti la CCM, Uhuru. Bonyeza hapa uone ukurasa huo, Uga wa Malenga.

Huko nyuma Mwandani aliwahi kuandika mshairi kadhaa (ninatafuta viungo vyake...Tunga unavyo haraka haraka unipatie?). Ukiacha mashairi kuna kazi nyingine za kusisimua kama aliyoandika Jeff hivi karibuni. Kazi yake hii: Nyerere Yuko Wapi?, nimeipenda sana. Isome kwa kubonyeza hapa. Makene naye ana kazi yake iitwayo Safari ya Mashua. Bonyeza hapa kwa sehemu ya kwanza na hapa kwa sehemu ya pili. Jana ameandika kisa kilichomtokea ndotoni. Bofya hapa. Kasri la Mwanazuo tuliongea siku si nyingi juu ya kufungua ukurasa wa Fasihi Pepe za Kiswahili (Makene, sijasahau nilichokuahidi!).

Kwangu mimi mambo haya ni kile kitu ninachopenda kuita, "ishara ndogo za mambo makubwa." Hizi ni ishara ndogo za mambo makubwa yanayokuja mbeleni. Ninatazama mambo haya ninatabasamu. Tunafanya jambo moja kubwa sana bila wenyewe kujua. Au pengine tunajua...

Samaki Mkunje Angali...

2005-12-17T19:58:00.000-08:00

Samaki jamani lazima umkunje mapema mapema. Ndio anavyokunjwa mwanamapinduzi wa kesho, Ukweli Ndesanjo, kama unavyomuona hapo kwenye picha ya juu. Hiyo ilikuwa ni Oktoba mwaka huu wakati wa maandamano ya Vuguvugu la Mamilioni na Zaidi. Hapo anamtazana na kumshangilia mwanamuziki aliyehamia Marekani toka Haiti, Jean Wycleaf. Picha ya chini yakea ndio Wycleaf mwenyewe anaonekana kwenye luninga (iliyokuwa ikirusha matangazo kwa walioko mbali na jukwaa kuu). Ingawa anamshangilia Wycleaf kwa furaha, Ukweli anawapenda zaidi Fela Kuti na Bob Marley. Masikini, hatakaa awaone wakitumbuiza hadharani.

Tuko Tayari Dakika Hii...

2005-12-17T19:54:00.000-08:00

Naendelea kuweka picha zaidi nilizopiga wakati wa maandamano ya Vuguvugu la Watu Milioni na Zaidi kule Washington, DC, Oktoba mwaka huu. Hawa ni wanachama wa kundi la New Black Panther Party (tofauti na lile kundi la wazee wengine wa shoka la Black Panther). Hapa unaona mwenyewe wanaume wa shoka wako tayari tayari kwa lolote lile. Joji Kichaka, we endelea kuleta za kuleta...

Picha hiyo hapo chini ndio kiongozi wao, Malik Zulu Shabazz. Huyu bwana analindwa na utitiri wa wanaume wa shoka sijapata kuona. Bonyeza hapa usome kwa kifupi juu yao.

Wanaume wa shoka....

2005-12-16T18:21:00.000-08:00

Wanaume hawa wa shoka ni akina nani? Hawa ni walinzi wa kiongozi wa kundi la New Black Panther Party, Malik Zulu Shabazz. Malik ambaye ni mwanasheria ni machachari sana kwa siasa zake kali ziilizojengwa juu ya falsafa za akina Malcolm X, Marcus Garvey, Kwame Toure, n.k. Malik Zulu Shabazz ndiye aliyeko mbele katika picha hii. Picha hii niliipiga siku ya maandamano ya Vuguvugu la Watu Zaidi ya Milioni, Washington, DC.

Kanye West na Joji Kichaka

2005-12-16T18:19:00.000-08:00

Hii picha niliipiga wakati wa maandamano ya Vuguvugu la Mamilioni na Zaidi kule Washington, DC. Kama unakumbuka, mwimbaji Kanye West alipokuwa akitumbuiza kwenye tamasha kwa ajili ya waliathirika na Katrina alisema kuwa Joji Kichaka hana habari na watu weusi. Swali kwenye picha hiyo linatokana na kauli hiyo ya Kanye West.

Kurunzi la Ndugu Mark Hiloooo: Blogu Mpya!

2005-12-14T06:24:00.000-08:00

Mark Msaki ni mwanafunzi wa udakitari katika chuo kikuu cha Kwa Zulu Natal kule Afrika Kusini. Amesema kuwa ingawa yeye sio mwandishi wa habari, ana nasaha na maoni ambayo anapenda kuyatoa hadharani. Na chombo ambacho anamependa kukitumia kufanya hilo ni blogu. Kaanzisha blogu yake ambayo ameiita Kurunzi. Bonyeza hapa usome na kumkaribisha.

Waulizeni Kituo cha Haki za Binadamu, hao "binadamu" ni akina nani?

2005-12-13T11:18:00.000-08:00

Majuzi niliandika kuhusu Tuzo ya Haki za Binadamu ya Majimaji aliyopewa Jaji James Mwalusanya. Kama hukusoma niliyoandika, bonyeza hapa usome. Tuzo hiyo ilitolewa na Kituo cha Sheria na Haki za Binadamu. Niliwapongeza kwa kumpa Jaji Mwalusanya tuzo hiyo kutokana na mchango wake katika ujenzi wa demokrasia Tanzania kupitia maandiko yake na hukumu mbalimbali ambazo amewahi kutoa.

Lakini nikawanyooshea kidole wanaharakati hawa wa Kituo cha Sheria na Haki za Binadamu kwa kosa ambalo linatokana na ugonjwa ambao inaelekea ni mbaya kuliko ambavyo wengi tunadhani. Ugonjwa huu ni ule unaotufanya kutumia lugha ya kiingereza hata pale ambapo walengwa wetu lugha yao kuu ni Kiswahili. Tazama majina ya mashirika yasio ya kiserikali, vyama vya upinzani, kampuni za kibiashara, maduka, baa, bendi, na hata vikundi vya utamaduni. Utakuta majina ya kiingereza ndio yanaonekana kuwa ni bora zaidi.

Achilia mbali majina, tuje kwenye tovuti. Nimeongelea kwa muda mrefu kuhusu tovuti ya ikulu, waziri mkuu, bunge, tume ya uchaguzi, mwanablogu mmoja (sijui alikuwa ni Nkya au Egidio) akatukumbusha pia tovuti ya Makumbusho ya Taifa, n.k zina taarifa muhimu kwa Watanzania kwa lugha ya kiingereza. Niliwahi kusema kuwa iwapo Rais akiongea na Watanzania anatumia kiingereza basi sitalalamika iwapo tovuti ya ikulu ni ya kiingereza. Iwapo wabunge ni wawakilishi wa wananchi ambao lugha wanayotumia asubuhi, mchana, na jioni ni Kiswahili, kwanini tovuti ya bunge lao na miswada ya sheria iwe ni ya kiingereza? Kama huu sio ugonjwa ni nini?

Sasa nilipokuwa naongelea kuhusu Kituo cha Sheria na Haki za Binadamu, nikauliza: kuna sababu gani ya tovuti ya kituo hiki kuwa ya kiingereza wakati ambapo wanatuambia kuwa lengo lao kuu ni kuwawezesha Watanzania wasiojiweza kiuchumi, kijamii, kiutamaduni, na kiroho kwa kuwapa mafunzo ya haki za binadamu na kuwapatia msaada wa kisheria? Kama nia ya kituo hiki ni kuwasaidia hao Watanzania, kwanini watumie lugha ya watu wengine na sio lugha wanayotumia Watanzania masaa 24?

Soma mwenye lengo kuu la kituo hiki (kwa kiingereza). Nimetoa kwenye tovuti yao (wino mzito nimeuweka mwenyewe):

The primary task of the Legal and Human Rights Centre is to create legal and human rights empowerment amongst the socially, economically, culturally and spiritually disadvantaged and marginalized groups within the Tanzania society through legal and human rights training, provision of legal aid, information generation and dissemination through publications and radio programmes, research on legal and human rights issues and networking and alliance building with other institutions which share this mission.

Nilipoandika kuhusu hili, mwanablogu Jeff, akatoa maoni yake akitaka kujua kama "binadamu" wanaozungumziwa na kituo hiki ni pamoja na babu na bibi yake kule Kilimanjaro. Alisema, "Huenda wanadamu wanaoongelewa hapa sio babu yangu na bibi yangu kule Kilimanjaro."Wanadamu" hawa nadhani ni wale ambao tayari wanazijua baadhi ya haki zao za msingi.Kituo kinafanya kuwakumbusha tu pale wanapoonekana kuzisahau."

Mwanablogu Da Mija akatoa wazo: "Mimi naona tuanze kuwaandikia moja kwa moja kuwauliza kwanini wanatumia kiingereza kuwaandikia waswahili, je wanajua madhara yake?"

Suala hili la lugha wengine wanaweza kuona kuwa ni jambo dogo sana. Hapana. Kama ambavyo tovuti ya shirika lisilo la kiserikali Uingereza haitakuwa ya Kiswahili maana hawatumii lugha hii ndivyo hivyo tunaamini kuwa tovuti ambayo inatoa taarifa, elimu, na maarifa kwa Watanzania haina haja ya kuwa ya kiingereza. Hili ni suala la kujikwamua. Kama tovuti hizi zinatengenezwa kwa ajili ya wafadhili, tuambiwe. Ila kama zinatengezwa kwa ajili ya kutoa taarifa na elimu kwa Watanzania, basi hakuna sababu ya kukopa lugha ambayo wengi tunaielewa kijuujuu. Ukitaka kujua lugha gani uitumie unapotaka kutawanya habari, taarifa, elimu, n.k. kwa Watanzania, nenda kwenye vituo vya mabasi, uwanja wa mpira, baa, saluni, vijiwe vya kahawa, mashambani, kampeni za kisiasa, n.k., tazama Watanzania wanatumia lugha gani sehemu hizo.

Kama Da Mija alivyosema, tunapaswa kuwaambia Kituo cha Sheria na Haki za Binadamu kuwa ni busara na heshima kwa taifa na utamaduni kujenga tovuti yao kwa Kiswahili. Haki za binadamu wanazotetea zinajumuisha pia haki za kitamaduni. Haki za kuwa na utamaduni wako, kuujua, na kuuheshimu.

Bonyeza hapa uone tovuti yao. Anuani yao ya barua pepe ni hii: lhrc@humanrights.or.tz

Na simu yao ni hii: 2773038, 277 3048

Bonyeza hapa usome moja ya makala zilizowahi kuandika kuhusu suala la kimombo kwenye tovuti za umma.

Mkutano wa wanablogu, changamoto, tufanye nini?

2005-12-13T09:04:00.000-08:00

Mkutano wenyewe ulifanyika tarehe 10 Desemba. Wanablogu toka pande mbalimbali za dunia walikutana katika makao makuu ya shirika la habari la Reuters (wakiwemo Paul Kihwelo wa kitivo cha sheria Chuo Kikuu Huria Tanzania, ambaye blogu yake itakuwa hewani karibuni na Fatma Karama). Mambo kadhaa yalijitokeza ambayo yanatuhusu wanablogu wa Kiswahili. Mawili makuu: 1. Jinsi gani ya kuongeza idadi ya blogu? 2. Je mradi wa Sauti za Dunia ufanye nini kuhusu blogu ambazo sio za kiingereza?

Ningependa tutazame hayo masuala mawili na kujadiliana kitu/mambo gani tunaweza kufanya. Tayari nimejadiliana kwa kifupi na Jeff na Paul. Mawazo yetu wote yanahitajika. Jambo mojawapo ambalo Jeff nami tumeligusia ni kuwa tunaweza kupeana changamoto: kila mwanablogu alete wanablogu wawili wapya...wawili tu...kwenye blogu za Kiswahili. Paul Kihwelo amezungumzia umuhimu wa sisi kukutana. Alizungumzia jambo hili kwa kirefu alipokutana na Ethan Zuckerman, mmoja wa waanzilishi wa Sauti za Dunia. Na anaporudi Tanzania atalifanyia kazi.

Wakati huo huo kuna "wiki" ambayo imeundwa kwa ajili ya kubunga bongo na kukusanya mawazo kuhusu nini cha kufanya ili kuimarisha mradi wa Sauti za Dunia na kupanua wigo wa blogu duniani. Unaweza kuchangia mawazo yako. Kuhusu suala la lugha na tafsiri bonyeza hapa. Kuhusu suala la kuongeza na kuvutia watu zaidi katika ulimwengu wa blogu, bonyeza hapa. Ukitaka kuona "wiki" nzima bonyeza hapa.

**Wiki: wiki ni aina ya teknolojia ambayo inaruhusu ukurasa wa kwenye tovuti kuhaririwa au kuandikwa na mtu yeyote bila haja ya kuwa na neno la siri au ufahamu wa lugha ya kompyuta kama "html." Teknolojia hii ndio tunayotumia katika kutengeneza kamusi elezo ya Kiswahili. Ukibonyeza hapa utaiona kamusi hiyo na unaweza kushiriki kuiandika. Pia kwa wale ambao nimewahi kuwagusia kuhusu mradi ule ninaosimamia wa kuandika katiba kwa kutumia "wiki," basi teknolojia yenyewe ni kama hii.

Rebecca MacKinnon, mmoja wa waanzilishi wa mradi wa Sauti za Dunia, ameandika muhtasari mzuri sana wa mkutano huo wa wanablogu. Tafadhali ukiwa na muda usome ili tusije kupitwa na mazungumzo yanayoendelea duniani kuhusu blogu. Bofya hapa usome muhtasari huo.

Na Huyu ndiye Kenyan Pundit

2005-12-13T08:59:00.000-08:00

Na huyu ndiye mwanablogu Ory wa blogu ya Kenyan Pundit akiwa kwenye mkutano wa wanablogu uliomalizika mwishoni mwa wiki nchini Uingereza. Ory ni kati ya wanablogu ambao kupitia blogu zao wanilitia hamasa ya kuanza kublogu. Moja ya kazi kubwa ambayo ameifanya karibuni kupitia blogu yake ni kuripoti zoezi la kura ya maoni ya katiba mpya nchini Kenya.

Ukitaka picha hiyo iwe kubwa zaidi, bonyeza juu yake.

"Uhuru" wa Tanzania na kichefuchefu cha Wimbo wa Taifa

2005-12-13T08:22:00.000-08:00

Fide alituma ujumbe wa barua pepe kwa watu kadhaa hivi karibuni akihoji mantiki ya kumtaka Mola awabariki viongozi wa Afrika. Nilipenda sana ujumbe wake ule nikaufanya kuwa ni sehemu ya makala yangu ya jumapili iliyopita katika gazeti la Mwananchi, nchini Tanzania. Katika makala ile nilijadili kwa kifupi sana jambo ambalo msomaji na rafiki yangu, Frank Massawe, ameuliza hapa kwenye blogu. Katika makala hiyo nimegusia pia tukio tulilofanya jeshini (mwanablogu Nkya akiwemo) la kuchora mstari ardhini na kutamka afande mmoja pale Ruvu aruke huo mstari kama ni mwanaume!
Ninaiweka makala hiyo hapa na pia katika kona ya makala zangu, upande wa kuume wa blogu hii, chini ya picha yangu. Bonyeza hapa uisome.

Waacheni Wenye Lugha Yao!

2005-12-13T07:36:00.000-08:00

Hii inanikumbusha enzi zile nikisoma gazeti la Uhuru.

Majuzi nilitangaza kuwa kuna mwanablogu mpya aliyekuja kwa nguvu na kutishia wale wote wanaotaka kujichukulia cheo cha u-malenga. Nikampiga dongo Kasri La Mwanazuo. Kama hukusoma tangazo hilo lisome kwa kubofya hapa.

Basi Kasri hakusita, akarudisha dongo kwangu na Mkwinda kwa shairi hili hapo chini:

Ndesanjo acha udhia, kidole ninyooshea

Gange umemgusia, vitisho kumtupia

Kasri limechimbia, mizizi imarishia

Itakuwa songombingo, kutaka libomolea.

Wazo la kulijengea, asili mbali anzia

Nikali bado tambua, Baba Mama ungania

Pumzi ilinambia, Kasri kwenda jengea,

Itakuwa songombingo, kutaka libomolea.

Mkwinda mwana fikia, Kasirini jifunzia

Fikira kutafunia, Fasihi kufahasia

Kisha weledi jazia, gange bora patilia

Itakuwa songombingo, Kasri libomolea.

Ndesanjo nanyamazia, karatasi kushikia

Kesho napaswa ketia, mtihani kufanyia

Nikisha kumalizia, Mkwinda ntamchapia

Kasri jumba la ghali, kicheko kubomolea!

*********************************************

Hakuishia hapo. Baada ya kuona Mkwinda kawa kimya akafyatua shairi jingine:

Sina ajizi fyatua, bomu nilolizindua

Awali nilidhania, muda bado kufikia

Kumbe mwanichungulia, kwa lengo kunilipua

Nataja hali hatari, Kasri kulilindia.

Ugaidi sikujua, waweza kunifikia

Hima sipendi jutia, tahadhali naanzia

Ijapo sitasemea, Walinzi naandalia

Hii ni hali hatari, Kasirini sogelea.

Nilisema nakimbia, kurasa kutazamia

Bado sijamalizia, ni mbili zilobakia

Moja itashika tama, leo napoifutia

Nikirudi hadithia, Kasri mtazamia.

Mkwinda u wapi kaka, utata umezulia

Umechupa kwa haraka, kisa watu nitishia

Tambua sijatishika, cheche ninakutemea

Kama wataka ingia, balaghashia vulia.

********************************************************

Mkwinda akasema isiwe tabu. Akaandika shairi fupi akitutisha kwa kalamu yake (mimi na Makene). Hili hapa:

Ya mja ada unene, nimepata makene,

Katu si vyema ujivune,kauli pasi mapene,

Kalamu iwe ni nene,andiko lionekane,

Ndesanjo nawe makene, kalamu vyema tumieni.

******************************

Mtembee Kasri la Mwanazuo kwa kubonyeza hapa na bofya hapa umtembelee Mkwinda.

Mwanablogu Mpya: Malenga na Wataalamu wa Kiswahili Kaeni Chonjo!

2005-12-10T22:51:00.000-08:00

Kasri la Mwanazuo kaa chonjo. Rashidi Mkwinda ni mwanablogu mpya wa Kiswahili ambaye anapenda sana lugha ya Kiswahili. Na pia ni mshairi anayependa kujibu wasomaji wake kwa mashairi. Tazama shairi lake hili:

Kilo chako ndicho, hicho sitarijie kisicho,
Katu sikodoe macho,ukadhani ndicho hicho,
Kwa macho utamanicho, kitakutoboa macho,
Epuka njia za chocho,si maisha pochopocho.

Blogu ya Mkwinda inaitwa Fasihi za Ufasaha. Bofya hapa umtembelee na pia kumkaribisha uwanjani.

Matumizi ya Bendera Kuashiria Lugha kwenye Tovuti

2005-12-10T20:06:00.000-08:00

Tovuti ya chama cha Chadema ilikuwa ina picha ya bendera ya Waingereza ikiashiria toleo la kiingereza la tovuti hiyo. Mwanablogu Nkya wa Pambazuko akahoji kuhusu matumizi ya bendera ya nchi nyingine kwenye tovuti ya chama cha siasa Tanzania. Bonyeza hapa usome Nkya alipoandika kuhusu bendera hiyo. Chadema wakakubaliana na Nkya na sasa wameondoa bendera hiyo.

Kuna makala inayoelezea jinsi ambavyo sio sahihi kutumia bendera katika tovuti kuashiria lugha fulani. Huyu ndugu anasema kuwa wakati mwingine tendo hili linaweza kuchukuliwa kuwa ni tusi hasa kama bendera inayotumiwa ni ile ya wakoloni. Bofya hapa usome makala hiyo.

Simu za Mkono na Intaneti Tanzania

2005-12-10T18:14:00.000-08:00

Wakati mkutano wa wanablogu ukiendelea (bonyeza hapa kuhusu mkutano huo) katika mjadala uliokuwa ukiendelea katika ukumbi wa majadiliano kwa njia ya Intaneti (kwa kutumia "Internet Relay Chat".....kuhusu "Internet Relay Chat" bonyeza hapa. ), Angelo Ambuldeniya aliniuliza juu ya upatikanaji wa huduma za Intaneti kwa kutumia simu za mkono nchini Tanzania. Wakati huo tulikuwa tunajadili juu ya blogu za mkononi iwapo hii ni moja ya njia za kuwawezesha watu wasio na mtandao wa Intaneti (ila wana simu za mkono) kublogu. Swali kuu lilikuwa: je ni namna gani tunaweza kuongeza blogu duniani hasa katika nchi ambazo wananchi wake wengi hawana kompyuta?

Nina swali kwa wale walioko Tanzania, je kuna kampuni ngapi kwa jumla ambazo zinawezesha watumiaji wa simu zake za mkono kutembelea mtandao wa kompyuta? Gharama yake je?

Mkutano wa Wanablogu Uingereza: Blogamundo kusaidia tafsiri

2005-12-10T08:48:00.000-08:00

Mjadala mzuri sana unaendelea hivi sasa kuhusu jinsi ya kufanya "Sauti za Dunia" kuwa kweli ni Sauti za Dunia. Suala kubwa ni kuhusu jinsi gani mradi wa Sauti ya Dunia utajumuisha lugha nyingine zaidi ya kiingereza. Je zianzishwe blogu chini ya mradi huu za lugha mbalimbali kama Kiswahili? Au kuwe na ukurasa maalum wa kutafsiri kwa lugha mbalimbali?

Pat Hall amekuwa akifikiria maswali kuhusu blogu na lugha kwa muda mrefu. Yeye na wenzake wanatengeneza programu ambayo itawezesha mambo yanayoandikwa katika blogu ya Sauti za Dunia kwa kiingereza kutafsiriwa kwa lugha nyingine. Tena unaweza utafsiri kitu toka kiingereza kwenda Kichina kisha Kiswahili! Bofya hapa uone tovuti ya mradi huo uitwao Blogamundo.

Kama nimekuacha hewani, ninazungumzia mkutano wa wanablogu unaoendelea jijini London. Bofya hapa kuhusu mkutano huo.

Kenyan Pundit anaongelea blogu za Kenya

2005-12-10T06:55:00.000-08:00

Mjadala unaondelea hivi sasa katika mkutano huu hapa ni kuhusu jinsi ya kujenga na kuimarisha blogu za nchi mbalimbali. Mwanablogu Ory, Kenyan Pundit, amemaliza kuongelea kuhusu blogu za Kenya zinavyoshamiri. Amezungumzia makazi ya blogu za Kenya kuwa ni moja ya mafanikio ya wanablogu wa Kenya. Bofya hapa uone makazi hayo.

Blogu za Tanzania, Wowowo, na Mkutano wa Uingereza

2005-12-10T06:26:00.000-08:00

Unajua bado siamini amini kuwa siko ndani ya jengo la Reuters nikihudhuria mkutano mkubwa kuhusu blogu. Siamini bado kuwa ndege niliyokuwa niende nayo ilikatisha safari kutokana na hali mbaya ya hewa. Kama nilitaka kung'ang'ania kwenda ingenipasa kuondoka leo na kuwasili Uingereza Jumapili (siku ambayo ndio nilikuwa niondoshe mguu toka hapo kwa Malikia Lizabeti). Huu mkono ulioleta hii nuksi, balaa, mkosi, kisirani, bahati mbaya na kadhalika lazima niutafute. Sijui niende kwa Mandondo Tanga au kwa niende Mlingotini, Bwagamoyo. Hapana, kipindi cha uchaguzi bei za Mlingotini ni kubwa sana sitaziweza. Sitaweza kushindana na pochi ya wagombea ubunge na urais.

Haya, ngoja niweke kejeli pembeni. Jeff Msangi ndiye mwanablogu pekee ambaye namuona akishiriki kwenye mkutano huu tokea Toronto, Canada kwa njia ya "Internet Relay Chat." Kaniuliza swali moja kuhusu idadi ya blogu za Watanzania. Hivi sasa kwa hesabu za haraka kuna blogu 42. Idadi hii inajumuisha blogu za Kiswahili, kiingereza, na zile za lugha zaidi ya moja. Lakini pia kuna blogu zile ambazo haziandikwi mara kwa mara. Halafu kuna blogu nne kuhusu Tanzania zinazoandikwa na Wamarekani walioko vijijini nchini Tanzania.

Chemi Che Mponda naona atazua balaa ndani ya blogu. Kaanzisha mjadala ambao najua utakuwa mtamu sana. Kaandika mada maalum kwa "wapenzi wa matako makubwa." Kanifanya nimkumbuke David Mailu, mwandishi wa Kenya ambaye vitabu vyake tukiwa wadogo tulikuwa tunavisoma huku tukijificha. Chemi anasema kuwa wowowo kubwa ni jambo la kujivunia sana na anatamani kuwa wowowo yake ingekuwa kubwa zaidi! Mija akatoa maoni akimuuliza kama ataandika juu ya matiti makubwa baada ya kuandika juu ya wowowo kubwa. Chemi anadai kuwa mada ya matiti makubwa inakuja. Bonyeza hapa umsome.

Mkutano wa Wanablogu Uingereza

2005-12-10T04:41:00.000-08:00

Bonyeza hapa uende kwenye blogu inayotuma habari na picha moja kwa moja toka kwenye ukumbi wa mkutano katika jengo la Reuters.

Balaa Bin Mkosi!

2005-12-10T04:13:00.000-08:00

Balaa. Mkosi. Kisirani. Bahati mbaya.
Haiwezekani. Mkono wa mtu. Kuna namna. Sio hivi hivi!!

Ni kwamba siko ndani ya ukumbi wa mkutano wa wanablogu Uingereza. Ndege niliyokuwa niondoke nayo haikuondoka kutokana na hali mbaya ya hewa. Nina huzuni kubwa. Nitaeleza zaidi hili baadaye kwani mkutano umeanza na ninaufuatilia mtandaoni. Kama hufahamu ninazungumzia mkutano gani basi bonyeza hapa utapata taarifa zote. Pia utapata taarifa jinsi ya kuhudhuria mtandaoni na kutoa maoni yako pia na jinsi ya kutazama kwa video ya mtandaoni.

Nitaandika mara kwa mara mambo yanayojadiliwa kwa wale ambao hataweza kujiunga kwa kutumia teknolojia ya IRC.

Nimepata ujumbe toka kwa mwanablogu Fatma Karama kuwa tayari yuko ukumbini hapo Uingereza. Mtanzania mwingine anayehudhuria ni Paul Kihwelo. Mshikaji Paul ni mkuu wa kitivo cha sheria katika Chuo Kikuu Huria Tanzania.

Baadaye jamani maana napitwa na mjadala.

Ukiingia IRC (kwa wanaoweza) unaweza kuingia: idhaa hii: #gvtrans
Au hii: #globalvoices

Mkutano wa Wanablogu Uingereza

2005-12-09T00:54:00.000-08:00

Jumamosi tarehe 10 ndio siku ya ule mkutano mkubwa unaokutanisha wanablogu toka pande zote za dunia. Majina ya wanablogu watakaodhuhuria unaweza kuyaona ukibofya hapa.

Nitaandika kuhusu mkutano huo moja kwa moja toka katika makao makuu ya shirika la habari la Reuters. Lakini pia unaweza kufuatilia mkutano huo kupitia video ya moja kwa moja ya mtandaoni kwa kubofya hapa. Au bonyeza hapa. Mjadala nitakaoshiriki mimi ambao utatazama maingiliano na mahusiano kati ya uandishi wa habari wa asili na blogu utakuwa ni saa tano u nusu kwa saa za London. Unaweza kujua itakuwa saa ngapi hapo ulipo kwa kubonyeza hapa. Lakini pia unaweza kushiriki kwa kuchangia mawazo kwa njia ya "Internet Relay Chat" (IRC). Kwa maelezo jinsi ya kushiriki kwa njia hii bofya hapa.

Halafu kuna kitabu cha picha ambacho kina baadhi ya picha wahudhuriaji. Bofya hapa uwaone.

Mkutano huo utakapomalizika, kwakuwa tutakuwa tumechoka, itabidi kujimwaga katika jiji la London ili kupumzisha mwili na akili. Ukitaka kufuatilia mapumziko yetu hayo bonyeza hapa.

Siku ya ijumaa baadhi ya wanablogu watakutana kwa chakula cha usiku. Kukutana huko kunafanikishwa kwa kutumia teknolojia ya "wiki." Bonyeza hapa uone.

Mkutano huu umeandaliwa na Kituo cha Intaneti na Jamii cha Berkman. Bonyeza hapa ukitaka kujua zaidi kuhusu kituo hiki. Wengi wa washiriki ni wanablogu wanaojihusisha kwa namna moja au nyingine na blogu ya Mradi wa Sauti za Dunia. Bonyeza hapa kuhusu mradi huo.

Siku ya Uhuru ni Kama Mchezo Fulani wa Kuigiza?

2005-12-09T00:24:00.000-08:00

Fidelis Tungaraza, Mti Mkubwa, ametupa tafakari kuhusu wimbo wetu wa taifa. Msome katika waraka niliouweka katika ujumbe nilioutuma kabla ya huu. Sasa katupa ujumbe mwingine ambao umeniacha nikishika tumbo kwa kicheko. Katika ujumbe wake anaonyesha jinsi ambavyo matukio ya kitaifa yalivyo kama vile mchezo fulani wa kuigiza usio na mbele wala nyuma. Ujumbe huo hapo chini:

KAMANDA: HIMA! HIMAAA!!!

ASKARI NA CHIPUKIZI WA CHAMA: TANZANIAAAA!!!!

KAMANDA: HIMA! HIMAAA!!!

ASKARI NA CHIPUKIZI WA CHAMA: TANZANIAAA!!!

KAMANDA: GWAR'DE! HESHIMA KWA JEMEDARI MKUU WA MAJESHI NA RAIS WA SERIKALI YA JAMHURI YA MUUNGANO WA TANZANIA, NA KWA WATANZANIA WOTE, HESHIMAAAA TOA!

ASKARI NA CHIPUKIZI WA CHAMA: WAH, WAH, WAH!

INAINGIA NYIMBO YA TAIFA IKIPIGWA NA BENDI ZA JWTZ, JKT, MAGEREZA, NA POLISI.

Kama namuona Marehemu Mzee Mayagilo akiimbisha bendi ya polisi.

Mungu Ibariki Afrika
WABARIKI VIONGOZI WAKE (Hapa ndipo kilipo kiini cha mgogoro wa nyimbo hii)

Nyimbo ya taifa imekwisha sasa inakuja hotuba toka kwa Mtukufu Rais wa Jamhuri ya Muungano ambaye pia ni Jemedari Mkuu wa Majeshi na Mwenyekiti wa Chama cha Mapinduzi, Mjumbe Tume Ya Waziri Mkuu Tony Blair, Mwakilishi wa Rais Bill Clinton kwenye asasi ya UKIMWI na mambo mengine mengine. Huko mikoani wakuu wa mikoa kina Nicodemus Banduka, Athumani Kabongo na wengineo nao wanatoa hotuba zao. Baada ya hapo sikuu imekwisha tunaendelea kama jana.

Mungu Wabariki Viongozi wa Afrika! Ati Nini??

2005-12-09T00:16:00.000-08:00

Wakati ambapo Tanzania haijawahi kutawaliwa, tunaambiwa kuwa tarehe kenda Desemba ni sikukuu ya uhuru wa Tanzania! Sasa katika kukumbuka siku hii, Mti Mkubwa (Fidelis Tungaraza), ambaye tunamfahamu kwa changamoto zake, anatupa tafakari kuhusu wimbo wetu wa taifa. Je ni kweli tunataka mungu awabariki viongozi wa Afrika kama tusemavyo tunapoimba wimbo huo? Soma aya toka kwa Fidelis. Nimezipata toka kwenye waraka pepe aliotuma kwa watu kadhaa akiwemo mwanablogu Da Mija. Nabandika hapo chini:

"Miye naupenda sana wimbo wa taifa wa Tanzania (Mungu Ibariki Afrika). Wimbo huu siye Watanzania tumeukopa toka Afrika ya Kusini. Nyimbo hii ni nzee sana ilitungwa kunako mwaka 1897 kwa hiyo una miaka takribani mia moja na kumi na moja! (111)! Muziki wa nyimbo hii ni utunzi wa Hayati Enoch Sentonga, ambapo maneno yake yalitungwa na Hayati Enoch Sentonga na baadaye yakaja kukarabatiwa na Mshairi Samuel Mqhayi. Wimbo hatujaukopa Watanzania tu na Wazambia nao na wazimbabwe hali kadhalika. Lakini sijui kwa sabau gani Wazimbabwe waliuacha wimbo na kuchukua mwingine.

Wimbo huu huwa unanipa na kunitoa raha pale unapofika kwenye mstari wa WABARIKI VIONGOZI WAKE! Ukifika hapo huwa unanikumbusha sura za viongozi walionuna wakiwa wamesimama pale mein stend, neshino stedium, huku askari wa vikosi vya ulinzi na usalama pamoja na chipukizi wa chama wakiwa wamekauka juani na saluti kali. Halafu na Watanzania wapenda amani na utulivu, wafanyakazi, wakulima na "wazururaji" wakiwa wametanda kwenye sehemu zingine za uwanja wakishiriki kwenye hiyo ghafla aidha kwa ridhaa zao au vinginevyo. Miujiza ya Tanzania Mei Dei au Saba Saba wanafunzi wa shule za msingi, sekondari na hai skuli wote wanashiriki kikamilifu!

Turudi kwenye Mungu Ibariki Afrika, hususani pale kwenye mstari wa WABARIKI VIONGOZI WAKE. Hapo nadhani ndipo Watanzania tulipopewa uwezo wa pekee wa kuweza kumtia kizunguzungu Mwenyezi MUNGU! Maanake Mwenyezi Mungu akiwatazama hao viongozi tunaomuomba awabariki Mwenyezi Mungu mwenyewe anapata kizunguzungu. Lakini dua letu siyo kama linaishia kwa viongozi wetu wa Tanzania pekee yake bali tunawaombea na majirani zetu kama Waganda wakati ule wakiwa na Idd Amin Dada, Malawi na Dr Hastings Kamuzu Banda, Zaire na Mobutu Sese Seko Kuku Mbwendu wa Zabanga, viongozi wazalendo wa Wahutu na Watutsi wa Rwanda na Burundi, kina Alphonso Dhlakama kiongozi wa Chama cha RENAMO cha Msumbiji. Dua zetu pia zilikuwa zinawaombea kina Eyadema, Omar Bongo, Paschal Lisouba, Jean Baptist Bokassa, Macias Nguema, Mfalme Hassan, Jaffar Nimeir, Omar Bashir, na Hassan Tourabi, John Voster, Tommy Ndabaningi Sithole, Abel Muzorewa, Morgan Tsivangirai, Jonas Savimbi, Gatsha Mongasuthu Buthelezi, na wengineo wote wamo kwenye dua hiyo ya WABARIKI VIONGOZI WAKE.

Kesho 09 Desemba Watanzania tutaimba tena MUNGU IBARIKI AFRIKA, WABARIKI VIONGOZI WAKE, ....Wakati tukiimba hivyo tutazame jirani yetu Kenya. Tumuombe Mwenyezi Mungu AWABARIKI VIONGOZI WAKE(kuna neno nimetaka kulisema lakini nimelimezea)."

Tuzo ya Majimaji Yaenda kwa Jaji Mwalusanya

2005-12-08T23:41:00.000-08:00

Jaji James Mwalusanya amepewa tuzo ya pekee ya Haki za Binadamu itolewayo na Kituo cha Haki za Binadamu Tanzania. Tuzo hiyo inaitwa Maji Maji Human Rights Award. Jaji Mwalusanya ni kati ya majaji ambao baadhi huwaita "majaji wanaharakati." Mwalusanya ni jaji ambaye masuala ya haki za binadamu yalikuwa yakimgusa sana na alijulikana kwa tabia yake ya kutoogopa kutoa maamuzi yanayoendana kinyume na matakwa ya serikali. Hii ndio sababu iliyokuwa ikipelekea mchungaji Christopher Mtikila kuwa na tabia ya kupeleka kesi zake Dodoma badala ya Dar Es Salaam. Jaji Mwalusanya alikuwa akifanya kazi Dodoma.

Moja ya kesi kubwa ambazo Mwalusanya aliwahi kutoa maamuzi yake ni ile ambayo alitamka kuwa hukumu ya kifo inayokubalika katika sheria za Tanzania ni kinyume na katiba na mikataba ya kimataifa ambayo Tanzania tumetia saini. Ni Mwalusanya huyu pia ambaye katika kesi iliyofunguliwa na Mtikila aliamua kuwa ni kinyume na katiba ya Tanzania kwa wananchi kutakiwa kuomba ruhusa kwa Mkuu wa Wilaya (yaani kinara wa CCM) na polisi (yaani mkono wa udhalimu wa wa-twawala) ili kufanya mkutano wa hadhara. Hukumu hiyo unaweza kuisoma kwa kubofya hapa. Ni Mwalusanya pia ambaye alitoa hukumu katika kesi nyingine ya Mtikila kuwa ni kinyume na katiba kwa Mtanzania kutumia pasipoti ili kutembelea Tanzania! (enzi zile za kutumia pasipoti kwenda Zanzibar). Pia ndiye aliyeamua kuwa ni halali na ni haki ya kikatiba kwa raia yeyote yule kugombea nafasi yoyote ya uongozi bila kuwa mwanachama wa chama chcochote. Hukumu hii iliwafanya watwawala kukimbilia bungeni kwenda kuipinga.

Pamoja na tangazo la tuzo hii na pia pongezi kwa Kituo cha Haki za Binadamu kutambua mchango wa Jaji Mwalusanya katika ujenzi wa demokrasia nchini Tanzania, ninatumia wasaa huu kuuliza swali ambalo linaweza kuwa limeshachosha baadhi yenu. Mimi halijanichosha. Kisa cha kuita tuzo hii Maji Maji Human Rights Award ni nini? Kwanini isingeitwa Tuzo ya Haki za Binadamu ya Majimaji? Au ikiitwa "award" ndio inakuwa na nguvu zaidi?

Dakika chache zilizopita nimetembelea tovuti ya Kituo cha Haki za Binadamu...kwanza jina lao hasa ni Center for Human Rights...nilitaka kutazama kama wamebadili lugha ya kigeni waliyokuwa wakiitumia. Wapi! Ugonjwa ule ule. Ukisoma malengo ya hawa wapigania haki (sijui kwanini hawapiganii haki za kitamaduni) utaona kuwa wanasema kuwa wanatetea na kuelimisha wanyonge na masikini kuhusu haki zao za msingi. Lakini wakati huo huo tovuti yao inatumia kiingereza tena cha mabomba makali makali. Wanafikiri Maimuna ataelewaje haki zake kama wanamwelimisha kwa lugha asiyoielewa? Halafu watabaki wakidai Watanzania hawajui haki zao...watazijuaje kama inabidi waende kwanza kwenye madarasa ya lugha za kigeni?

Pamoja na kuwaunga mkono katika jitihada zao za kutoa huduma za kisheria na elimu ya katiba kwa Watanzania, ningependa kuona wakitumia tovuti yao kuelimisha na kutoa msaada wa kisheria kwa Watanzania wa kawaida na sio Waingereza au Wakanada. Wafaye hivyo kwa kutumia lugha ambayo tunaitumia majumbani, mitaani, kwenye mabasi, sokoni, kwenye harusi, misiba, n.k. Lugha tunayoitumia asubuhi, mchana, jioni. Lugha hiyo ni Kiswahili.

Bofya hapa utembelee tovuti yao.

Usidharau Nguvu ya Blogu Kuleta Mabadiliko

2005-12-06T21:12:00.000-08:00

Pongeza za dhati zinamwendea mwanablogu Nkya wa Pambazuko. Hivi karibuni Nkya alitaka kujua bendera ya Uingereza inafanya nini kwenye tovuti ya Chadema? Wasomaji wake wakatoa maoni yao. Hazikupita siku mara bendera hiyo ikaondolewa. Bofya hapa usome aliyoandika na bofya hapa utazame tovuti hiyo ya Chadema bila bendera ya kule kwa Malikia Lizabeti.

Pongezi zinawaendea pia Chadema kwa kukubali mantiki na uzalendo vichukue nafasi.

Nafasi ya Kazi Katika Mradi wa Sauti za Dunia

2005-12-03T12:09:00.000-08:00

Kutokana na kupanuka kwa shughuli za mradi wa Sauti za Dunia, mradi huo umetangaza nafasi ya kazi ya mhariri mtendaji. Atakayeajiriwa kwa kazi hii hatahitajika kuhama anakoishi hivi sasa. Hii ni kazi utakayoifanya kupitia mtandao wa kompyuta. Bonyeza hapa usome wanatafuta mtu wa namna gani (kama unafahamu mtu atakayefaa unaweza kumtumia habari hii kwa kubonyeza kwenye picha ya bahasha pembeni mwa sehemu ya kutolea maoni).

Mkutano wa Wanablogu Uingereza Wiki Ijayo

2005-12-03T08:39:00.000-08:00

Ule mkutano mkubwa wa mradi wa Sauti za Dunia unaofanyika nchini Uingereza katika makao makuu ya shirika la habari la Reuters umeiva. Nimepangwa kushiriki katika mjadala kuhusu blogu na uandishi wa habari. Bonyeza hapa kwa taarifa za kina kuhusu mkutano huo. Katika mkutano huu kutakuwa na wanablogu wawili toka Tanzania. Mwingine ni mwanablogu pekee wa Tanzania anayeishi na kusoma Uingereza ambaye unaweza kumsoma hapa. Orodha ya watu wote wanaohudhuria bonyeza hapa utaiona. Pia ukibonyeza hapa utaona sura za wanaohudhuria.

Kwa wale ambao hawahudhuria mkutano huu, unaweza kufuatilia kwa kupitia video ya mtandaoni (matangazo ya moja kwa moja). Unahitahiji kuwa na iTunes, au programu zenye mp3. Urushaji utaanza saa nne asubuhi kwa saa za London siku ya jumamosi tarehe 10. Bonyeza hapa ili uweze kujua saa hiyo ni saa ngapi hapo ulipo. Bonyeza hapa kwa anuani ya kufuatilia video ya mtandaoni ya mkutano huo moja kwa moja.

Kwa wale ambao hawatakuwepo London bado kuna uwezekano wa kushiriki katika mkutano huu kwa kupitia programu ya Internet Relay Chat (IRC). Kwa maelezo ya jinsi ya kushiriki kwa

IRC, bonyeza hapa.

Kumbuka pia nitablogu mkutano huo moja kwa moja kupitia hapa Jikomboe.

Kama nilivyosema hapo juu mimi nitashiriki katika mjadala kuhusu blogu na uandishi wa habari. Nabandika hapa chini maelezo ya mjadala wenyewe na watu ambao nitakuwa nimekaa nao kwenye kiti moto:

SESSION TWO 11:30-1:00

Best of both worlds

Much is made of the “blogging vs. journalism” argument. We believe there can and must be room for both in this world, and that the world will be better for having both.

Led by Rebecca MacKinnon, with input from Jeff Ooi (Malaysia), Ndesanjo Macha (Tanzania), Dina Mehta (India), Georgia Popplewell (Trinidad & Tobago), David Sasaki (Americas Editor), Onnik Krikorian (Armenia), Ben Parmann (Eurasia Blog), Lisa Goldman (Israel), and Dean Wright (Reuters)

Mkutano huu umedhaminiwa na Kituo cha Intaneti na Jamii cha Berkman cha Chuo Kikuu cha Harvard na Shirika la Habari la Reuters.

Mwanablogu Mpya: Dan, Umeishia wapi?

2005-12-03T08:26:00.000-08:00

Dan Makundi ni mhandisi pale jijini Dasalama. Anablogu kwa kiingereza. Amekuwa kimya kidogo toka alivyoandika mara ya mwisho Novemba 8 mwaka huu. Bonyeza hapa umsome (ila tafuta kamusi kabisa kabisa!).

Padri Karugengo: Mwafrika Ni Mnafiki au Mjinga?

2005-12-01T17:30:00.000-08:00

Jana, katika barua pepe ambayo Mrisho Mpoto aliandika kwa watu kadhaa alisema kuwa Waafrika ni kama kituko vile. Tena ni wanafiki. Bonyeza hapa usome kuhusu barua hiyo kisha ndio uendelee na ujumbe wa leo toka kwa Padri Karugendo (ambaye makala zake zitarudi hapa kwenye blogu, pamoja na zangu, wiki hii).

Basi Padri Karugendo anauliza swali zuri sana. Soma waraka pepe wake aliotuma kwa watu wale wale Mrisho aliowatumia:

"Wanafiki au Wajinga. Mrisho Mpoto, anasema sisi niwanafiki, lakini mimi ninafikiri alitaka kusema sisini wajinga? Labda ninayaweka maneno haya midomonimwake, lakini ningeomba tujiulize juu ya unafiki naujinga - mnafiki na mjinga, ni nani wa kukwamisha maendeleo ya nchi yetu? Na kudai pesa mtu ili umjadili ni unafiki au ni ujinga? Mtu kuiuza nchi ni unafiki ama ni ujinga?"

Mbarikiwe,Padri Karugendo.

Siku ya "Umeme" Duniani

2005-12-01T17:00:00.000-08:00

Leo ni siku ya Ukimwi duniani. Tunachofanya ni kutafakari kuhusu ugonjwa huu. Hivi Ukimwi ni nini? Ulitoka wapi? Mbona haukuwepo zamani? Au kama ulikuwepo mbona haukutumaliza? Je dawa yake itakujapatikana? Je kwanini hauna dawa? Au kama dawa ipo mbona wengi hatujui?

Basi katika kukumbuka hii siku, mwanablogu Sokari Ekine wa blogu ya Black Looks, ambaye pia ni mhariri wa blogu za Kusini mwa Afrika wa mradi wa Sauti Za Dunia, anachambua wanablogu walivyoikumbuka hii siku. Uchambuzi huo uko katika jarida la Pambazuka. Bonyeza hapa umsome.

Sokari Ekine mwenyewe bonyeza hapa umsome.

Mrisho: Mwafrika ni Kama Kituko!

2005-11-30T15:22:00.000-08:00

Msanii wa nguvu na rafiki yangu wa karibu, Mrisho Mwana wa Mpoto, wa kundi la Parapanda, ambaye niliwahi kuandika habari kuhusu harusi yake ambapo "shampeni" ilikuwa ni maji ya madafu (bonyeza hapa uisome) kaandika ujumbe ambao umenichekesha ingawa aliyosema sio utani. Anasema kuwa Waafrika ni kama kituko vile. Usome. Naubandika hapa chini:

"Mwafrika nikama kituko maana wanaomba Funding kwa wazungu ili wajadili matatizo yao na jinsi ya kujikomboa toka utumwani sasa icho si kituko yaani mtu akupe pesa ili umjadili yeye alafu unachekelea. Huwezi kubisha .....(hapa Mrisho kataja jina la mtu ambalo nimelitoa)... Maana juzi tu tulikuwa zanzibar kujadili ujinga wetu mbele yao huku wakitulipa pesa na kulala sehemu nzuri huku tukiomba siku ziongezwe hata bila posho."

All the Best

Mrisho Mpoto

********************

Huyo ni Mrisho Mpoto, wewe unasemaje kuhusu kuomba fedha kwa wazungu ili tujadili jinsi ya kujikwamua toka kwenye makucha yao ya uchumi, fikra, siasa, na utamaduni tegemezi?

Vyombo vya Habari au Vyombo vya Uongo?

2005-11-30T10:32:00.000-08:00

NYONGEZA!!!!!: Nilipoandika habari hiyo hapo chini mapema leo sikuelezea jambo fulani muhimu sana. Ni kwamba serikali ya Marekani imetoa hela kwa kampuni ya Lincoln Group. Kampuni hii inachukua "habari" zilizoandikwa na wanajeshi wa Marekani kisha inazitafsiri kwa Kiarabu kisha inalipa magazeti ya Iraki ili iyachapishe kwa majina tofauti na yale ya askari wa Marekani walioandika. Na huu ndio uhuru, na hii ndio demokrasia ambayo Marekani inataka kusambaza duniani!

*******************************

Nina tabia ya kuviita vyombo vya habari, "vyombo vya uongo." Usidhani kuwa sina sababu za msingi. Sasa huu ni mfano mmoja. Kampuni iitwayo Lincoln Group imekuwa ikilipa wafanyakazi wake ili wajifanye kuwa ni waandishi wa habari na kuandika habari katika magazeti ya nchini Iraki. Habari hizo nia yake ni kuhadaa akili za Wairaki ili waamini kuwa Marekani ni mkombozi wao na sio mwizi wa mali yao ya asili. Yaani wanachofanya hawa jamaa ambao wanalipwa na serikali ya Marekani ni kupandikiza uzushi kwenye magazeti. Bonyeza hapa usome habari yenyewe.

Mwalimu Alikuwa ana uwezo wa kuona kuleeeeee...

2005-11-30T06:10:00.000-08:00

Kituo cha Kusini kina mradi wa tovuti ya kumbukumbu ya Mwalimu. Baadhi ya hotuba zake zinapatikana kwenye tovuti hiyo. Nimemaliza kuzisoma. Mwalimu alikuwa ana namna yake fulani ya kufikiria...ila katika yote ni ule uwezo wake wa kuona mbele kuleeeeeeeeee....wakati wa-twawala wengi tulionao hata leo hawaioni (sembuse kesho). Bonyeza hapa uzisome.

Kibaki: Mavi ya Kuku Nyie!

2005-11-27T19:01:00.000-08:00

Macharia Gaitho wa Daily Nation la Kenya anasema kuwa siku moja baada ya kambi ya Ndizi (iliyokuwa ikiunga mkono katiba mpya ya Kenya) na kambi ya Machungwa (iliyokuwa ikiipinga katiba hiyo) kufanya mkutano katika jiji la Nairobi, alipelekewa ujumbe wa maandishi wa simu ukisema kuwa shirika la uongo la CNN lilikuwa na masikitiko makubwa kwani lilikosa habari ya kutangaza kuhusu Kenya. Maana ya ujumbe huu ni kuwa kwakuwa shirika hilo hupenda kutangaza habari za vita na maaa zaidi ya zile za maendeleo na furaha, hakukuwa na habari nzuri maana walidhani kuwa siku kambi hizo mbili zilipofanya mkutano jijini Nairobi, lazima zingepigwa. Wapi.

Mashirika haya ya uongo yanapenda sana maafa. Tazama Liberia. Nchi hii wakati ikiwa kwenye vita ya wenyewe kwa wenyewe, vyombo vya habari vilijaa habari kuhusu nchi hiyo. Lakini hivi majuzi baada ya kufanya uchaguzi ambao ni kati ya chaguzi za amani ya juu kabisa duniani, hakuna vyombo vya habari vinavyotuambia habari hiyo. Katika uchaguzi huo wamemchagua Mama Ellen Johnson-Sirleaf kuwa Rais. Mwanamama huyu amemshinda mwanasoka wa zamani George Weah. Ingawa yeye ni rais wa kwanza mwanamke Afrika, yeye sio mwanamke wa kwanza kuongoza nchi barani Afrika. Malkia Zauditu wa Ethiopia aliongoza nchi hiyo toka 1916 hadi 1930. Pia mwanamama Ruth Perry aliwahi kuwa kiongozi wa nchi (sio rais) wa Liberia baada ya kuangushwa kwa Sajenti Samuel Doe na kufa kwa Rais Amos Sawyer. Perry alikuwa ni mwenyekiti wa Baraza la Taifa toka 1996 hadi 1997 alipomwachia madaraka mwizi na muuaji Charles Taylor baada ya "kushinda" uchaguzi.

Sielewi kwanini nimepitia njia ndefu namna hiyo hadi kufikia kwenye jambo nililotaka kusema. Niliyoandika hapo juu na ninayoandika hapa sasa hivi hayana uhusiano wa moja kwa moja. Nilifungua ukurasa huu ili niandike kuhusu Kibaki lakini mawazo mengine yakanijia. Sasa niko kwa Kibaki.

Nadhani Kibaki alipokuwa mdogo alikuwa ni matata sana kwa matani. Akina Moi nadhani walikuwa hawafungui mdomo kwa matani. Basi wakati wa kampeni zake za kutaka wananchi waunge mkono katiba iliyokuwa imfanye kuwa mfalme, aliwaita wale wanaoipinga kuwa ni wapumbavu. Ila kali kabisa ni pale aliposema kuwa wao ni "mavi ya kuku." Sijui huwa anatumia mdomo huu huu unaoshusha haya matani kula chakula na pia kusali au ana mdomo mwingine?

Blogu ya Mpya: Che Mponda na Materu

2005-11-25T17:22:00.000-08:00

Kuna blogu mpya ya ndugu Materu iitwayo Fikra Thabiti. Ili umsome bonyeza hapa. Pia aliyekuwa mwandishi wa gazeti la Daily News kwa muda mrefu, Chemi Che Mponda, kaanzisha blogu ya Kiswahili. Kutokana na shughuli utaona hajaweka mapya kwa muda ila anasema ataivalia njuga karibuni. Che Mponda, zaidi ya kuwa mwandishi wa habari, ni muigizaji wa filamu na michezo ya kuigiza. Ameshiriki kwenye filamu ya Tusamahe na Maangamizi. Bonyeza hapa usome blogu ya Chemi. Bonyeza hapa utembelee tovuti yake yenye habari zaidi kuhusu fiamu na michezo ya kuigiza aliyoshiriki.

Al Jazeera Wamwambia Joji Kichaka: Usitupige Mabomu

2005-11-24T19:44:00.000-08:00

Gazeti la Uingereza la Daily Mirror limetoboa kisa hiki: eti Joji Kichaka alitaka kupiga mabomu kituo cha luninga anachokichukia kupita kiasi cha Al Jazeera. Bonyeza hapa usome kisanga chenyewe. Sasa wafanyakazi wa Al Jazeera wameanzisha blogu kumtaka Kichaka asiwapige mabomu. Hata hivyo wamemwambia kuwa hawatishiki. Bonyeza hapa utembelee blogu yao.

Tunaotetea Utamaduni wa Mwafrika Tutembee Uchi?

2005-11-24T01:41:00.000-08:00

Nilisema ninavuta pumzi nizungumze kuhusu utamaduni. Utaona kuna wasomaji wameacha maoni wakishutumu wale tunaopinga tabia ya kudharau utamaduni wetu na kukimbilia wa wengine. Wameuliza eti mbona tunavaa viatu na nguo? Mmoja kasema kama tunatetea utamaduni kwanini tusirudi enzi za kuvaa ngozi? Wasomaji hawa nadhani hawafahamu kuwa jamii mbalimbali Afrika zilikuwa tayari zina viwanda vya nguo wakati weupe wakiwa wanaishi mapangoni na kula nyama za watu! Niliwahi kuandika makala nikizungumzia mada hii ya kuvaa nguo/viatu na kutetea utamaduni. Kichwa chake kilikuwa: Kama Unapenda Utamaduni Mbona Unavaa Nguo? Hapo chini nimeweka vipande kadhaa toka kwenye makala hyo. Ila unaweza kusoma makala nzima kwa kubonyeza hapa.

*********************************************

Vipande vyenyewe hivi hapa:

"Mara nyingi mtu unapozungumzia utamaduni wa Mtanzania au Mwafrika, inachukuliwa kuwa unazungumzia tu mambo ya kale. Kwa watu wengi utamaduni na ukale ni kitu kimoja. Watu wanaoamini hivyo huchulia kuwa utamaduni ni kitu cha zamani sana. Kitu kikuukuu. Kimezeeka. Kimetoka kwa mababu na mababu. Kwa maana hii watu wa leo tunarithi utamaduni tulioachiwa na mababu ila sisi haturithishi kizazi kijacho utamaduni mpya (unaotokana na kizazi chetu) bali ule tuliopokea toka kwa waliotutangulia.

Ukikutana na watu wanaofikiri kuwa utamaduni ni ukale kuna swali moja linalochekesha sana ambalo lazima wakuulize huku wakikutolea macho kama vile unafanya uhaini kutetea utamaduni wako: Kama unapenda utamaduni wa Mwafrika kwanini unavaa nguo? Kwanini unavaa viatu?"

****************************************

"Ukidhani kuwa ninaposema tupende utamaduni wetu ninamaanisha kuwa tufanye yote yaliyofanywa na mababu zetu utakuwa umefanya kosa kubwa sana. Kwani mababu zetu walikuwa ni miungu? Kwanini tuchukue kila walichofanya kama vile walikuwa hawana mapungufu? Mababu zetu ni binadamu kama sisi. Walikuwa na mazuri na mabaya pia. Je tukubali kukeketa wanawake maana ni urithi wetu? Hakuna sababu yoyote ya msingi ya kuendelea kukeketa wanawake hata kama tendo hili lilifanywa na mababu zetu."

**************************************************

"Kuna jambo linalonishangaza ninapokutana na wale wanaoniuliza, “Kama unatetea utamaduni mbona unavaa nguo?” Kwanini wanapozungumzia utamaduni wa watu weupe hawarudi nyuma na kuganda kwenye historia. Wanachukulia kuwa wanayofanya leo hii watu weupe ndio utamaduni wao, ila sisi Waafrika utamaduni wetu ni yale tuliyofanya wakati tukiwa tunatembea uchi. Utamaduni wa watu weupe ni yanayofanywa leo na wa kwetu ni yake ya zamani. Ni kitu gani kinachofanya kuvaa nguo kuwe ni utamaduni wa watu weupe ila sio Waafrika?

Mtazamo huu unaashiria kuwa kuna watu hawategemei Waafrika twende mbele maana itakuwa kinyume na utamaduni wetu! Mtazamo mbovu sana huu. Mbona hata hao watu weupe kuna kipindi katika historia yao ambacho waliishi mapangoni, walitembea uchi, walikula nyama mbichi, walikula nyama za watu, waliua wachawi hadharani, n.k. Watu wengi hawafahamu historia hii maana shuleni tunafundishwa historia yetu toka tukiwa tunatumia zana za mawe, tukiishi na kuchora picha mapangoni ila historia ya watu weupe inaanzia zama za mapinduzi ya viwanda. Kutokana na hili, watu wengi wanaona kuwa utamaduni wa mtu mweupe ni mambo ya kileo."

***************************************

"Hakuna jamii yoyote isiyokua, isiyobadilika, isiyochukua mapya, isiyotupa ya zamani, na isiyohifadhi yale ya zamani yanayofaa. Nipe mfano wa jamii kama hiyo. Hoja hii ndio ambayo inawapa tabu wanaotetea ukeketaji wa wanawake kwa madai kuwa ni utamaduni. Kwa uelewa wa zama zile za mababu, tendo hili lilionekana kuwa ni sahihi. Ila kwa uelewa wa mazingira tunayoishi leo tendo hili linaonekana kuwa sio sahihi."

Kama Kuna Siku Mabata Yanaipata...

2005-11-23T15:12:00.000-08:00

Kama kuna siku mabata hapa duniani yanapata ni hapo kesho. Kama kuna siku bata wanaliwa kwa wingi hapa duniani ni hapo kesho Wamarekani wanaposherehekea sikukuu ya "thanksgiving." Kesho ni siku ya kula bata kama vile sijui nini...nchi nzima itakula bata kwa mlo wa mchana. Bonyeza hapa usome kuhusu sikukuu hiyo.
**************************************************
Halafu: Navuta pumzi kisha niongelee mambo kadhaa ambayo wasomaji waliotoa maoni wamezungumzia hasa suala la utamaduni na kuiga.

Kenya: Wa Rangi ya Machungwa Washinda Lakini...

2005-11-23T07:45:00.000-08:00

Waliopiga kura kuitakaa katiba iliyokuwa imfanye rais wa Kenya kuwa kama mfalume wameshinda. Ila Rais wa Kenya, Mzee Mwai Kibaki amesema kuwa Wakenya wanapaswa kujua kuwa Kenya tayari ina katiba ambayo imekuwa ikitumika siku zote!

Umeelewa undani wa kauli yake hiyo?

Kura ya Maoni Kenya: Wana Machungwa Wanaongoza

2005-11-21T16:15:00.000-08:00

Wapiga kura wa upande wa machunga ambao unakataa katiba mpya inayomlimbikizia Rais madaraka wanaongoza. Wanaounga mkono katiba hiyo (wanaotumia alama ya ndizi) wanaongozwa na Rais Kibaki ambaye wakati akiwa nje ya madaraka alitaka Kenya iwe na katiba ambayo haitampa mtu mmoja madaraka makubwa. Lakini alipoingia madarakani...au kwenye utamu kama mnavyojua...anataka alimbikiziwe madaraka kama vile yeye ni Mungu. Wanaosema "Hapana" wanaongoza kwa asilimia 56.

Blogu ya Sauti za Dunia Yashinda!

2005-11-21T12:04:00.000-08:00

Ule mchuano wa blogu bora katika katika vigezo na lugha mbalimbali (Kiswahili hakimo!) umemalizika. Na kwa upande wa blogu za kiinglishi (kiingereza) blogu ya Mradi wa Sauti za Dunia imeshinda. Shukrani zinakwenda kwa waliopiga kura. Bonyeza hapa uone tangazo la ushindi huo. Bonyeza hapa uone blogu zote zilizoshinda.

Kizazi cha Watumwa Wapya!

2005-11-20T16:00:00.000-08:00

Mjadala kuhusu muziki wa "kizazi kipya" umepamba moto. Jeff na Ramadhani wameuanzisha. Na wasomaji wao wameudaka. Maswali kadhaa bado yanaelea hewani. Hivi "kizazi kipya" ndio akina nani? Na Bongo Flava ndio nini hasa?

Ukitazama kizazi tunachokiita kipya. Ukaangalia tabia, mwenendo, fikra, na njozi zake utakubaliana nami (kama huwa unapenda kuita beleshi kuwa ni beleshi) kuwa jina sahihi la "kizazi kipya" ni "watumwa wapya."

Watumwa wa zamani walidakwa kifikra, kitamaduni, na kiroho katika wimbi la ukoloni, safari za “wavumbuzi,” na kazi za wasambaza "ustaarabu" (wamisionari). Leo hii wimbi linalokumba kizazi kipya cha watumwa wapya ni wimbi la utandawizi. Utandawizi ndio ukoloni mpya. Wimbi hili linasukumwa na falsafa na itikadi za soko na ulaji. Soko lenyewe sio soko kama la Kariakoo au Kiboriloni. Nitamwachia Nkya wa Pambazuko achambue zaidi juu ya hii dhana ya soko. Kwa kifupi dhana ya soko katika ubepari haina maana mahali pa kuuza na kununua. Na ninaposema ulaji simaanishi ulaji kama ule wa kula ugali na kisamvu. Kwa kilugha chao wanaita "consumerism." Katiba ubepari dubwana hili ulaji (consumerism) ndio ibada.

Zamani zile waliotutangulia walitekwa kwa njia mbalimbali, baadhi zikiwa za kinyama (viboko, bundiki, vifungo), nyingine vitisho (utakwenda motoni usipoamini dini yetu), elimu, n.k. Leo hii mabwana wa utumwa wala hawana haja ya kuja na viboko na au kutuma watu wao na biblia na kurani kutuhadaa tukatae tamaduni zetu. Mazingira yamebadilika na mbinu zimebadilika. Lakini pia ziko nyingine zimebaki vile vile au kubadilika kidogo. Vitukuu wa wale waliotia minyororo fikra za mababu zetu ndio hivi sasa wanakaza pingu katika akili za hawa tunaowaita "kizazi kipya." Wanatumia tamaduni maarufu (kilugha chao wanaita pop culture) na vyombo vya uongo kama MTV. Wanatumia picha za wanamuziki wakiwa wamevaa nguo za aina fulani kuwafanya watumwa wapya wadhani kuwa ili wawe wanamuziki wakubwa wanapaswa kuvaa nguo kama hizo, mikufu, na pia kuwa na majina kama Crazy G na hata kubadili namna ya kutembea. Wanatumia majarida. Wanatumia filamu na muziki. Wanatumia redio za FM na Ma-DJ ambao ndio vinara wa utumwa mpya. Wanatumia vipindi vya luninga kama Big Brother. Wanatumia mashindano kama Miss Tanzania. Wanatumia mikufu ya dhahabu (mingine ikiwa ni ya msalaba). Wanatumia mapicha makubwa ya ukutani ya watu kama akina 50 Cent.

Unajua wengi tunaona utamaduni kuwa ni kitu cha mchezo mchezo. Hasa tunapodhani kuwa utamaduni ni ngoma za kukata kiuno, vinyago vya wamakonde, ngonjera, na nguo za batiki. Utamaduni ni rasilimali. Watu wakizimikia utamaduni wako watazimikia pia na bidhaa zako (hadi bendera ya nchi yako wataivaa). Unakuta kuna nchi zinatambua hili na zinafanya kila liwezekanalo kulinda utamaduni wao. Wanatumia sera, sheria, elimu, n.k. kutimiza azma hiyo. Nchi kama Ufaransa zina idadi maalumu ya sinema za Marekani zinazoruhusiwa kuonyeshwa katika majumba ya sinema nchini humo. Nia yake ni kulinda soko la watengeneza sinema wa ndani. Sheria ya mambo ya Intaneti Ufaransa inasema kuwa tovuti yoyote ile ya Ufaransa lazima iwe na lugha ya Kifaransa. Inaweza kuwa kwa Kiingereza au Kijerumani lakini lazima kuwe na toleo la Kifaransa.

Lakini pia utamaduni unaweza kuwa mpambano. Ni mpambano wa mitazamo. Mfano mzuri wa hili ni ugaidi. Ugaidi una sura nyingi. Upande mmoja wa sura ya ugaidi ni utamaduni. Unaweza kutazama ugaidi kama mgongano wa mitazamo ya kitamaduni kuhusu demokrasia, wema, ubaya, historia, n.k.

Nirudi kwenye hoja ya msingi. Wakati tunapotazama kundi tunaloliita "kizazi kipya," mimi ninachoona ni kizazi cha watumwa wapya. Tena watumwa kwa maana mbili. Kwanza, watumwa wa kifikra na kitamaduni. Pili, watumwa kiuchumi, kwa maana ya kuwa katika nchi yao bila uwezo wa kumiliki njia kuu za uchumi au kuwa na uwezo wa kutoa maamuzi makuu kuhusu uendeshwaji wa nchi.

Wa-twawala wanapenda sana kizazi hiki kinapotumia muda mwingi "kujirusha" na Bongo Flava au kuketi mbele ya luninga wakitazama Big Brother wakati nchi keki ya nchi inamalizwa. Kwa akili za kizazi hiki cha watumwa wapya, kitendo cha kuwa na luninga zinazoonyesha Big Brother, redio za FM za kupiga miziki yao, luninga za kuonyesha video zao, na majengo marefu marefu yanayojengwa mjini ambayo wanayatumia katika kutengeneza video zao za muziki, bila kusahau hoteli za kifahari ambazo nazo wanazitumia kutengeneza video hizo...mambo haya kwao ni alama ya maendeleo makubwa ya nchi. Na nchi kwao huwa ni mjini.

Nitablogu Toka Uingereza Mwezi Ujao

2005-11-19T16:26:00.000-08:00

Kama kuna mtu ana mpango wa kujilipua ndani ya treni au mabasi pale London kwa Malikia Lizabeti, namshauri asithubutu kufanya hivyo mwezi ujao. Mwezi ujao nitakuwa yaliyo makao makuu ya shirika la habari la Reuters, Canary Wharf, London. Nitakuwa hapo kwenye mkutano wa pili wa kila mwaka wa Mradi wa Sauti za Dunia. Mradi wa Sauti za dunia uko chini ya Kituo cha Berkman cha Intaneti na Jamii katika chuo kikuu cha Harvard. Habari zaidi kuhusu mradi wa Sauti za Dunia ulivyoanza na pia kuhusu mkutano wa London mwezi ujao na watu wanaohudhuria, bonyeza hapa. Utaona kuwa kati ya wanaohudhuria ni wanablogu wawili mahiri wa Kenya, Kenyan Pundit na Mshairi. Mshairi huandika habari kuhusu wanablogu wanawake wa Afrika kila jumatatu katika blogu ya Sauti za Dunia.

Kwahiyo wasomaji wangu, ndugu, na marafiki wa Uingereza, tuwasiliane ili tuweze kunywa chai na kupiga gumzo (Masawe, Maruma, Kibwana, Mgosi, Theodore, Freddy, Neema (JALO!!!) ...mpo?).

Blogu mpya toka Tanzania ya Kiswahili na Kiingereza

2005-11-19T16:18:00.000-08:00

Ndugu Chris Bwalya yuko Arusha. Anablogu kwa Kiswahili na Kiingereza. Bonyeza hapa umsome. Blogu yake haipokei maoni. Nadhani atabadili ili kuruhusu watu kutoa maoni. Nadhani kutakuwa na mijadala mikali kutokana na masuala ambayo anazungumzia. Anaandika, pamoja na mambo mengine, kuhusu ukristo, biblia, yesu, n.k.

Muziki wa Watumwa Wapya?

2005-11-19T15:53:00.000-08:00

Ramadhani Msangi ambaye hivi karibu alianza kututaka tuanze kuzungumza badala ya kusema, ameendeleza mjadala ambao Jeff Msangi aliuzungumzia na kuzua cheche. Kwanza aliandika haya, mjadala ukaendelea hapa na hapa.

Hebu bonyeza hapa uende kwa Ndugu Msangi umsome. Kisha soma maoni motomoto ya wasomaji na pia ongeza yako.

****************************************************

Wakati huo huo....

Mapema leo wakati nikiipitia blogu mpya ya ndugu Nyembo nilikutana na hoja yake ya agano jipya na la kale. Agano la Kale ndio lile ambalo tumeambiwa kuwa hakuna anayejua liko wapi...yaani mkataba wa muungano wa Tanganyika na Zanzibar. Nimependa aliposema haya, "Kuipaka rangi Manowari si njia sahihi ya kuzuia maji kupenya..."

Pigia Kura Mradi wa Sauti za Dunia (Global Voices)

2005-11-19T14:34:00.000-08:00

Tarehe 20 mwezi huu ndio mwisho wa kupigia kura blogu bora kwa ajili ya Tuzo ya Blogu Bora. Mradi wa Sauti za Dunia (Global Voices) ni miongoni mwa blogu zilizo katika mchuano huo kwa upande wa lugha ya Kiingereza. Bonyeza hapa uwapigie kura. Ukifika hapo tafuta lilipo kundi la blogu za kiingereza. Piga kura yako.

Mradi wa Sauti za Dunia umetoa nafasi kila wiki kwa ajili ya muhtasari wa blogu za Kiswahili. Kulikuwa na uwezekano wa kuweka eneo ambalo wanablogu wa Kiswahili wangekuwa na ukurasa wao katika blogu ya mradi huo ila kukawa na hoja kuwa ukifanya hivyo itabidi utoe ukurasa kwa kila lugha. Kwa kifupi, mradi huu unaheshimu mno kazi zinazofanywa na wanablogu wa Kiswahili. Na kazi hiyo ni kuondoa ukoloni mamboleo mtandaoni na kupanua wigo wa lugha zinatotumika katika mijadala kwenye Intaneti. Sababu hii ndio inanifanya kuwataka mupige kura zenu kwa ajili ya Sauti za Dunia. Basi bonyeza hapa. Kura inachukua nusu dakika.

Mwanablogu Mwingine Aingia Uwanjani

2005-11-18T06:20:00.000-08:00

Bwana Nyembo kajiuliza kwanini naye asiamue kuwa na blogu yake ili kutoa mawazo yake mtandaoni? Huyu ni mwabablogu mpya wa Kiswahili. Kanifurahisha mahali fulani ambapo kabadili msemo wa Kiswahili usemao "Asiyekubali kushindwa sio mshindani." Yeye anasema kuwa kule Zanzibar, "Asiyekubali kushindwa ni shujaa!" Bonyeza hapa usome blogu yake na kumkaribisha.

Kenya: Sakata la Kura ya Maoni

2005-11-16T04:21:00.000-08:00

Kundi moja linalojiita vuguvugu la Njano lilikwenda mahakamani likitaka zoezi la kupiga kura ya maoni ya "ndiyo" au "hapana" kuhusu katiba mpya nchini Kenya lisimamishwe. Kundi hili lilidai kuwa bunge lilipounda sheria ya kutengeneza katiba mpya lilijichukulia mamlaka ambayo yako mikononi mwa wananchi. Pia likadai kuwa tume ya uchaguzi ya Kenya haina haki kisheria kusimamia zoezi hilo maana tume hii imepewa wajibu wa kusimamia uchaguzi wa wabunge na rais na sio kura ya maoni kuhusu katiba. Wanasheria wa kundi hili walidai kuwa kesi hii pengine ni kesi ya pili kwa ukubwa nchini Kenya ukiachilia mbali ile ya shujaa Dedan Kimathi. Jana Mahakama Kuu nchini Kenya imeamua kuwa zoezi hilo litaendelea. Bonyeza hapa usome habari hiyo.

Wakati huo huo jamaa wa Kenya National Commission of Human Rights ambao wanafuatilia kwa karibu kampeni za kura hii ya maoni, wana "orodha ya aibu" katika tovuti yao. Orodha hii inaonyesha matumizi mabovu ya mali ya umma na kauli za uchochezi toka kwa waongo na wezi wanaojiita wanasiasa nchini humo. Bonyeza hapa utazame orodha hiyo.

Mafisadi wale wale, Chama kile kile, uozo ule ule...

2005-11-14T16:44:00.000-08:00

Chama cha Demokrasia na Maendeleo (CHADEMA) kinafanya kampeni kwa kutumia barua pepe. Nimefurahi kujua hili maana haya ndio kati ya mambo ninayotazama kwa karibu (kwasababu za kitaaluma). Ninaamanisha matumizi ya zana mpya za mawasiliano katika kampeni za urais na ubunge.

Kuna mistari ambayo iko katika barua pepe yao ambayo nimeona niwagawieni kidogo (iwapo hujapata barua pepe hiyo). Nabandika hapo chini mistari hiyo:

Maendeleo ya Kweli
hayawezi kuletwana
Mafisadi wale wale
wa Chama kile kile
chenye Uoza ule ule
Wakiendeleza yale yale
eti kwa Kasi mpya,
Nguvu mpya
na Ari mpya.

Kukataa Kutawaliwa na Wezi ni Wajibu wa Kikatiba na Kiroho

2005-11-13T15:13:00.000-08:00

Naendeleza mjadala nilioandika jana ulioitwa: Tatizo ni Wa-twawala au Watawaliwa? Kama hukuusoma bonyeza hapa uusome kisha urudi hapa ndipo uendelee.

*********************************

Kenya itazameni. Kuna masomo chungu nzima pale. Unaona tunavyoonyeshwa kuwa kuna uwezekano kuwa wapinzani na wa-twawala hawana tofauti zaidi ya kuwa upande mmoja uko madarakani na upande mwingine unataka kuyachukua. Wapinzani watapinga mambo yote yanayofanywa na walioko madarakani. Lakini wakiingia madarakani watayafanya yote waliyokuwa wakiyapinga na hata mabaya zaidi. Na wale waliokuwa madarakani wataanza kupinga mambo ambayo nao walipokuwa madarakani waliyafanya. Kumbuka Kaunda alivyotiwa ndani na sheria ambayo alikuwa yeye mwenyewe akiitumia. Akadai kuwa sheria ya kutia watu kizuizini ni kinyume na haki za binadamu. Yaani haki hizo anaziona pale yeye ndiye anapokuwa anakandamizwa.

Pale Kenya waliokuwa wakiiunga mkono katiba wakati wakiwa wapinzani, wameikataa walipoingia madarakani. Waliokuwa wakiikataa wakati wakiwa madarakani sasa wanaikubali. Yote hii ni mchezo wa kuhadaa wananchi kwa nia ya kushika madaraka. Midomo ya wanasiasa ni bomba la uongo. Jana niligusia suala la wanasiasa wanaohama vyama vyao baada ya kutochaguliwa kugombea uongozi wakidai kuwa vyama hivyo havifai. Vyama wanavyohamia vikija kuacha kuwapa nafasi za kugombea uongozi wataondoka wakidai kuwa navyo havifai. Wewe mtu umekuwa kwenye chama toka ukiwa kijana, leo hii umezeeka unakuja kudai eti chama hicho hakifai kuongoza. Na unasema hayo mara tu baada ya kuchujwa kwenye kura ya maoni.

Au tazama kiongozi wa chama fulani anayelalamika juu ya viongozi wasiotaka kuachia madaraka au marais wanaobadili katiba ili waendelee kuwa madarakani wakati yeye mwenyewe hayo madaraka ndani ya chama chake hajayaachia. Ni nini kinakufanya wewe uwe na haki ya kuwa mwenyekiti wa kudumu wa chama chako (au cheo kingine cha "maisha" ndani ya chama chako) na wakati mwingine mgombea urais wa maisha, lakini mpinzani wako hana haki ya kung'ang'ania madaraka?

Jana nilisema kuwa tabaka la wa-twawala limefanikiwa kutufanya tuamini kuwa huu mfumo wa ulaji na ukandamizaji wanaouita "demokrasia" ndio njia pekee ambayo binadamu wanaweza kutumia kujenga taifa. Tazama bunge la Kenya kwa dakika chache. Bunge hili ni upenyo wa kujitajirisha na kuipora nchi. Mwezi uliopita bunge nchini Kenya kwa dakika 30 liliruhusu wizara 18 kuchukua zaidi ya shilingi za Kenya bilioni 100 toka kwenye mfuko maalum. Kwa nusu saa shilingi bilioni 100 za nchi masikini kama Kenya zimeyeyuka. Kura hiyo ilipitishwa na wabunge wangapi unajua? 22!

Sisi wananchi wa kawaida, tabaka la waliwao, tuna uwezo wa kukataa kunyonywa na kudanganywa. Tuna wajibu wa kikatiba na hata kiroho (kama unaamini kuna kitu kama roho) kukataa kuwa chini ya hili tabaka dogo la wezi na wauza nchi. Kuna sababu za kutotimiza wajibu huu?

Weusi tumetoka Milima ya Mbalamwezi

2005-11-12T18:51:00.000-08:00

Lile kundi la Midnite ambalo nimelitaja mapema leo (bonyeza hapa usome nilipowataja) linaendelea kutumbuiza pembeni yangu. Ule wimbo wanaosema: "Ishi maisha upendayo, pena maisha unayoishi" kuna mahali wanasema,"Watu weusi ni Wakushi tuliotoka milima ya mbalamwezi...mlima Kilimanjaro, mlima Ruwenzori, mlima Kibo..."

Tafadhali usiache kusoma niliyoandika hapo chini nikijadili kuhusu watawaliwa na wa-twawala.

TATIZO NI WA-TWAWALA AU WATAWALIWA?

2005-11-12T17:25:00.000-08:00

Tatizo kubwa kabisa Tanzania na pengine bara zima la Afrika watu wengi hudhani kuwa ni wa-twawala. Hapana. Tatizo namba moja ni watawaliwa. Wao ndio tatizo kubwa kuliko wanaowatawala. Watawaliwa ni wengi lakini wanakubali kunyonywa na kudanganywa na kundi dogo la watu fulani (wengi wakiwa ni wanaume).

Lakini kundi hili dogo nalo linajua kuwa udogo wake unaweza kuwatia hatarini kwahiyo linaunda vyombo kama polisi, magereza, sheria, mahakama, n.k. Vyombo vyote hivi kazi yake ni kuwalinda. Unadhani kazi ya FFU ni nini? Kazi yake ni kuzuia wananchi kuamka na kuleta mabadiliko. Wananchi wakitaka kutoa madai hadharani au kwenda kuwafuata huko wanakokaa, FFU kazi yao ni kuzuia.

Kila siku polisi wanakamata watawaliwa kwa madai ya uvunjaji sheria lakini huoni hata siku moja polisi hao wakikamata au kupiga mabomu ya machozi watawala. Ina maana kuwa watawala Tanzania au Afrika hawaibi? Hawaui? Hawavunji sheria? Au sheria huwa zinavunjwa na watawaliwa tu? Watawala wakivunja sheria ni sawa. Watawala wetu wanaiba. Wanaua. Wanatesa. Wanatumia vyombo nilivyokutajia.

Kama wahalifu halisi walikuwa ndio wanakamatwa, watawala wengi walioko madarakani wangetakiwa kuwa jela kwa miaka mingi sana.

Kundi hili dogo linapotumia vyombo vta dola kuwaweka ninyi mlio wengi chini ya himaya yake, wanatumia mfumo wa elimu na vyombo vya habari kukuhadaa uamini kuwa bila wao jamii haitakalika. Wanakufanya udhani kuwa maendeleo yako wao ndio watayaleta. Unakutana nao wakati wa kampeni wanasema kuwa watawaleteeni shule, maji, elimu, n.k. Ahadi zinazotolewa na wagombea wa nafasi mbalimbali za uongozi zingekuwa zinatekelezwa, Tanzania ingekuwa nchi ya kuigwa na dunia nzima.

Kukiwa na jamii ambayo inadhani kuwa maendeleo atayaleta mtu mmoja ambaye kazi yake mwaka mzima sio kuzalisha kitu bali kujaribu kukushawishi umpe kura, jamii hiyo inapaswa kuzinduka mapema.

Wa-twawala wakishatupata hapo kwenye imani kuwa bila mfumo wa utawala ambao unawapa wao (wachache) nguvu kubwa zaidi yetu (tulio wengi) nchi haitapata maendeleo, wanatukamata kwenye imani nyingine potofu. Imani hiyo ni kuwa bila polisi, magereza, mahakama, sheria, wanajeshi, n.k. jamii haitakalika. Watu watauana na kuibiana.

Kama ni kweli kuwa polisi, mahakama, magereza n.k. kazi yake ni kujenga jamii isiyo na uhalifu, basi nchi zenye polisi wengi na wenye dhana za kisasa kama Marekani, mfumo wa mahakama uliokomaa, magereza yenye ulinzi mkali zingekuwa hazina uhalifu. Pengine unaweza kudhani nimepungukiwa nikisema kuwa kazi ya polisi sio kuondoa uhalifu na kuhakikisha jamii inaishi kwa amani. Nadhani unapaswa uokoke kwanza ndipo ukubaliana nami. Kuokoka kwenyewe sio kama kwa Askofu Kakobe. Kuokoka kwa tofauti.

Usiniambie kuwa na mahakama unadhani kazi yake ni kutoa haki. Kazi yake ni kulinda haki ya mwenye nacho dhidi ya asiyenacho. Haki ya wa-twawala dhidi ya watawaliwa. Niambie, kuna wa-twawala magerezani? Kuna wenye nacho magerezani? Magerezani wengi ni wale wenzetu wenye kuvaa malapa. Je ina maana kuwa wavunja sheria ni watawaliwa tu? Kama unafikiria kama mimi utakubaliana nami kuwa walioko mahakamani, polisi, wanaopitisha hizo sheria pengine ndio walitakiwa kujaza magereza kama haki ingekuwa inatendeka.

Kundi hili dogo la wa-twawala limefanikiwa kwenye jambo moja kubwa sana. Wameweza kutufanya tuamini kuwa hata kama hatuwataki hakuna njia ya kuwaondoa kwenye usukani. Wanatumia sheria kadhaa kutisha watu kuandika maoni yao kama haya ninayoandika hapa. Sheria hizo zinawapa nguvu za kutia watu ndani wanaoelimisha umma juu ya mfumo wa kibabiloni unaonyoya damu ya watawaliwa. Wanaweka sheria ambazo inakuwa vigumu wewe kuungana na wenzako ii kuwaondoa kwenye usukani.

Napenda kukuhakikishia kuwa mfumo huu wa kibabiloni, mfumo wa kihaini unaoneemesha tabaka la wa-twawala huku maelfu ya wananchi wakiwateseka kwa tabu na umasikini uliokithiri, unaweza kuondolewa kwa sayansi ndogo sana. Sio tu unaweza kung'olewa, bali unapaswa kung'olewa.

Usiutii.

Rege, katiba ya Kenya, wanasiasa wanavyotuchezea

2005-11-12T09:15:00.000-08:00

Siku hizi nimekuwa nyuma sana katika masuala ya muziki wa hisia, Rege. Siwezi kuamini kuwa sikuwa nawafahamu jamaa wa Midnite. Jamaa mmoja alinisikilisha muziki wao hivi majuzi. Nimewafia kabisa. Nalala na kuamka nikiwasikiliza. Kwanza muimbaji wao ana sauti ya pekee sana. Na anajua jinsi ya kuitumua sauti yake. Ukiachilia mbali sauti, ujumbe wa nyimbo za Midnite unanigusa sana. Dakika hii wanaimba wimbo mmoja wanasema:

Penda maisha unayoishi

Ishi maisha unayoyapenda.

Wimbo mwingine unaonimaliza ni ule ambao anazungumzia luninga kuwa ni chombo cha uongo. Anatumia mchezo wa maneno ambao Marasta wanapenda kuutumia kutoa ujumbe wao. Kwa mfano, "television" anasema ni "tell a lie vision." Ni mchezo huu wa maneno ambao aliutumia Peter Tosh alipokuwa akiuita mfumo wa siasa na utamaduni wa kibabiloni "shit-stem" kutokana na neno la kiingereza "system." Bonyeza hapa kwenda tovuti ya Midnite.

Tuachane na Midnite. Sijui kama unafuatilia kampeni za kura ya maoni kuhusu katiba kule Kenya. Nadhani zoezi hili kwa ujumla linatufunza mengi kuhusu uundaji wa katiba ya watu na pia kutuonyesha wanasiasa wanavyotuchezea. Utaona kuwa wale wanasiasa waliokuwa wakiipinga katiba mpya wakati wakiwa madarakani, ndio hao wanaoiunga mkono sasa wakiwa nje ya madaraka. Na wale waliokuwa wakiiunga mkono wakati wakiwa nje ya mduara wa ulaji, sasa wanaipinga kwakuwa ulaji wao utakuwa mashakani. Haya ni mafunzo ya bure lakini wakati mwingine huwa yanatupita.

Umeona hata Tanzania wale wanasiasa ambao wamekosa nafasi za kugombea ubunge kwenye vyama vyao wamehamia vyama vingine wakidai kuwa vyama vyao vya zamani havifai. Wamekuwemo kwenye vyama hivyo hadi dakika ya mwisho (walipokosa nafasi za kugombea) ndio wakagundua kuwa vyama hivyo si lolote/chochote? Wengine wamekuwa wanachama wa vyama vyao vya zamani karibu maisha yao yote. Kama miaka yote hiyo walishindwa kuona ukweli ambao wengine tumekuwa tunauona kila siku, ni vipi tunaweza kuwaamini kuwa wanaweza kuwa viongozi wazuri. Kama inachukua miaka mingi namna hiyo kuona jambo la wazi namna hiyo, kwanini tuwape dhamana ya kutuongoza? Tusipojenga utamaduni wa kuwauliza maswali magumu wanasiasa kama hawa watakuwa wanatuchezea kama wanasesere. Watatuchezea na baadaye wakishalewa madaraka tukiwauliza maswali magumu wataanza kutumia watwana wao (polisi/wanajeshi) kututia vilema, kutuunga na hata kutuua.

Kuhusu kura ya maoni kule Kenya, mwanablogu Kenya Pundit anafuatilia kwa karibu sana zoezi hili. Bonyeza hapa umsome.

Yanayotokea Ethiopia je?

2005-11-10T03:24:00.000-08:00

Sijui kama wandugu mnafuatilia yanayotokea kule Ethiopia. Bara letu litavuja damu hadi lini? Kumbuka Mwizi Mkuu, samahani, Waziri Mkuu wa Ethiopia alikuwa ni miongoni mwa wa-twawala wa Afrika waliokaribisha kule Usoti kupiga picha za pamoja na wa-twawala wa Kundi la Nchi Nane (G8). Mkapa naye alikuwemo. Eti hawa ndio wa-twawala toka Afrika vipenzi vya akina Joji Kichaka na timu yake. Bonyeza hapa usome kwa kina wanablogu wanavyotupasha maafa yanayotokana na maguvu ya dola.

Ewe mwanamuziki wa Tanzania...wewe ni balozi wa nchi yako

2005-11-07T05:48:00.000-08:00

Niliweka barua toka kwa msanii Ferdinando Paul. Pia niliweka beti alizoandika. Bonyeza hapa utasoma barua yake ni beti yake. Sasa ametokea msomaji amempa changamoto kupitia sehemu ya maoni. Changamoto hiyo naiweka hapo chini:

Msanii jina Ferdinando Paul, unatoa HI, msanii wa ku-RAP, unasema ..... mambo TIGHT, ....unatoa VESI, mh... makubwa. Huyo ndo msanii wa Tanzania, kioo cha kuendeleza na siyo kupotosha jamii, balozi wa nchi popote duniani. Kitu kidogo tu, iweje U-rap? wakati tuna makabila zaidi ya 120 nchini yenye utajiri wa sanaa mbalimbali na ya hali ya juu, na huko ulikonuukuu rap pia wanalijua hilo. Sasa ukienda nje na ukacheza rap utadai kupiga muziki wa Tanzania au. Maisha Dasalama siyo jehanamu, wapi ni peponi? Arusha, Mza, Tanga, eh.. au unalinganisha na wapi?. Nadhani Dar siyo mahala pa rap ila pa mahadhi ya madogoli, sindimba, bhughobhoghobho, mdumange, n.k. Pia ni kwa wale waliyeko hapo na si kwingineko kwa mwili, akili na fikra zao. Hivi hi, mambo tight na vesi ndiyo nini? ... msanii, balozi wa nchi!!!!!. Hongera Kingwendu, Saida Karoli .....

*********************************

Changamoto hii inanipeleka kwenye mjadala mzito alioanzisha Jeff Msangi. Kwanza aliandika makala ambao ukibonyeza hapa utaisoma. Alipoandika makala hiyo mjadala ukaanza. Bonyeza hapa uusome. Mjadala haukuishia hapo. Uliendelea. Bonyeza hapa usome muendelezo wa mjadala huo.

Jimbo la Rais Si Nchi Nzima?

2005-11-07T04:03:00.000-08:00

Mtumishi wa sirikali kaniandikia waraka huu ambao unaonyesha matatizo yaliyoko katika mfumo wetu wa wizi wa kura (ambao tunauita mfumo wa uchaguzi). Barua yake hiyo hapo chini:

Mimi ni mtumishi wa Umma. Eneo langu la kazi ni kanda ya magharibi yenye mikoa ya Kigoma na Tabora. Tume ilitangaza kuwa kama italazimu watu wawe wamebadili vituo vyao mwisho mwezi Julai. Ghafla imezuka kazi inayonitaka kuja Kigoma kwa wiki kadhaa. Nimechukua kadi yangu ya kupiga kura. Kwa tafakuri tu ya kawaida nikajua sitaweza kuchagua wabunge au madiwani nikiwa Kigoma. Nikajua nitachagua Raisi kwa vile yeye jimbo lake la uchaguzi ni Tanzania nzima. Jana Tume ya Taifa ya Uchaguzi imetangaza kuwa kama hutakuwa kituoni kwako huruhusiwi kupiga kura hata ya Raisi. Jambo hili limenishangaza na kunisikitisha sana. Iweje uwe ndani ya Taifa lako, ukiwa na haki zote za kupiga kura uzuiwe? La ajabu serikali yenyewe ndio imetutuma huku tuliko na sio kwa mapenzi yetu. Vipi Ndesanjo, wewe utapiga kura? Kama la mbona hujatoa kauli? (Gumzo?)

Hali ya Kisiasa Zanzibar Hainishangazi

2005-11-07T04:01:00.000-08:00

Hivi yaliyotokea, yanayotokea na yatakayoendelea kutokea Zanzibar yananishangaza? Hapana. Wa-twawala ndio watunga sheria za uchaguzi, ndio wasimamizi, ndio wanaolala na masanduku ya kura, ndio wenye jeshi na bunduki na mabomu ya machozi, ndio walioshika utamu. Wameuonja utamu kwanini wasichonge mzinga?

Halafu tazama hawa watu wanaoitwa waangalizi wa uchaguzi. Chama twa-wala na wapinzani husubiri ripoti za waangalizi hawa midomo wazi. Tena wakiwa ni wazungu watu ndio huwasikiliza kwa makini zaidi. Wazungu hawa wakipiga kura kwenye nchi zao sijui ni akina nani huwa wanasimamia uchaguzi wao. Labda mtaniambia kuwa chaguzi zao huwa ni huru na haki kwahiyo hakuna sababu ya kuwa na waangalizi. Joji Kichaka tunajua mwizi wa kura. Uchaguzi wa mwanzo utata ulijitokeza akatangazwa kuwa rais sio kwakuwa kapata kura nyingi za wananchi bali majaji watano kati ta tisa. Majaji hawa watano wa mahakama kuu ndio waliamua kuwa Kichaka eti kashinda.

Nimemtaja Kichaka nikakumbuka kisa hiki. Juzi alikuwa akihudhuria mkutano kule Argentina. Kiboko yake, Hugo Chavez (rais wa Venezuela), ambaye humwita Kichaka gaidi, akaulizwa akikutana na Joji atamwambia nini? Chavez akasema alikuwa amepanga kujificha sehemu kisha amshtue "we!" Kisha amtazame Joji kisigino kikigusa kisogo anapotoka mkuku.

Kuna hili suala la polisi na wanajeshi kujaa barabarani kule Zanzibar. Jambo hili litakushangaza iwapo unadhani kuwa kazi ya vyombo hivi ni kulinda usalama wa wananchi. Wanajeshi na polisi kazi yao ni kulinda usalama wa wa-twawala na jamaa na marafiki zao (yaani matajiri wenzao). Askari ni msukule unaojenga ukuta kati ya wananchi wanaodai haki zao na wa-twawala wezi wenye kiburi na dharau. Baadhi ya askari hawa wanaobeba bendera nyekundu na mitutu ni wale wanaoishi kwenye nyumba za mabati. Huwezi amini. Wanawapiga binadamu wenzao na hata vikongwe kisa eti wanatiii amri. Fela akaimba, "Zombie oooh, Zombie" (Msukule ooh, Msukule). Akaendelea kuimba:

Zombie nah go go unless you tell him to go

Zombie nah go stop unless you tell him to stop

(Msukule haendi hadi umwambie nenda

(Msukule hasimami hadi umwambie simama)

Ndio walivyo askari hawa wanaotutia ngeu na vilemwa tunapodai haki na usawa. Eti walinda usalama, usalama gani wanalinda huku wakiwapa majambazi silaha na wakati mwingine wakiwa ndio majambazi? Siku zinavyokwenda usalama nchini unatuaga huku askari hawa wakiendelea kujaza vitambi. Tukijiunga na wenzetu tukitaka kuandamana kama katiba inavyoturuhusu mara ghafla unaona wale askari wa kuanzisha (sio kuzuia) fujo wanakuja. Sijui kwanini huwa hatuwaoni siku za matembezi ya "mshikamano."

Yaliyotokea, yanayotokea, na yatakayoendelea kutokea Zanzibar hayanishangazi. Ukipanda mahindi huvuni ngano bali mahindi. Na wakati wa kuvuna wala haujafika.

Zanzibar: Damu Zaidi Itamwagika?

2005-11-07T03:16:00.000-08:00

Mijadala mizito inaendelea mtandaoni kuhusu mchezo wa kura uliofanyika kule Zanzibar. Soma baadhi ya maoni ya wananchi. Nimetumiwa na bwana mmoja aliyeko Florida.

From: Anonymous-234 <zenj@zanzinet.org>
Reply To: zanzinet@zanzinet.org
To: ZANZINET <zanzinet@zanzinet.org>
Subject: Re: [Zanzinet]Hali halisi ya nchi yetuSent:
Wednesday, November 2, 2005 11:39 AM
Hakuna solution yoyote ndugu yangu kwa Zanzibar zaidiya kuchukua picha ya wapalestina na sisi. Hakuna jinsikwa sasa na mipango yote itakayofanyika itaishiakwenye unafiki tu na kubabaishwa na wakoloni wa CCM.Muafaka wa pili haukusaidia na matokeo yake Mkapaameshairubuni AU, SADCC na Afrika mashariki yote iwezekuside nae na kuona Uppinzani ndio wa kulaumiwa.Angalia ripoti zao kuhusu tathmini ya Uchaguzi,wanaipigia debe CCM na kuifanya CUF kuonekana kitukoduniani. Maji yameshamwagika, na kwa mtindo huu hatuponi.Masikini wazee wetu waliishi katika ukoloni na sisitumeendelea na Ukoloni tena thakili kuliko huo hapokabla.Hivi karibuni utasikia kua Chama cha CUFkinaorodheshwa katika vyama vyenye msimamo mkali nahili ndio lengo. Watajidai kuipatia Wizara za uongokatika serikali ya wizi na wakijua kua CUF haitakubalina hapo ndipo watakapozidi kuipaka katika Jumuiya zakimataifa. Yaani hapo pana mbinu za kiaina kutumalizaWazanzibari, na hakuna kitakacholeta watu mezanikatika kweli na haki, ila itakapodhihirika wazi kuasasa ni kweli na nchi haitawaliki. M.Mungu tusaidiekuondokana na udhalimu huu, tutaabaniiiiiiiiiii!
khamis mustapha

<k_falla2000@yahoo.com> wrote: Jamani hivi kweli kumwaga damu ndiyo solution yamatatizo yaliyokuwapo zanzibar, Hatuoni kamatunaongeza matatizo ambayo hatuweza kuya solve milele:Wacha na tuangalie Damu imemwagika miaka 40 nyuma naeffect yake inaoneka mpaka sasa ijapokuwa tumejidahidikutaka kuifuta lakini wapi bado tunaendelea kuathirikanayo.Mtu asifikirie kama mimi ni pro CCM kwa kuandikamaoni yangu hayo ( mimi nataka kama leo CCM iondokemadarakani hata kama kwenye ndoto) lakini nikoconcerned na ile hali halisi tuliyokuwa nayo palenyumbani.Sasa itakuwa busara zaidi tukikaa na kutafutasolution nyengine na siyo umwagaji wa damu bye

BARKE JUWEID <barkejuweid@yahoo.com> wrote: Asalaam Aleikum Wajumbe, Baada ya kuzingatia haya yote yanayoendeleakwetu nimekuja na kupata jibu hili lisemwalo na wanaCCM,nalo ni kuwa WAO WAMEMWAGA DAMU KUIPATA NCHI,KWAHIYO KUITOWA PIA ITABIDI WAITOWE KWA NJIA HIYO HIYO YAKUMWAGA DAMU,SIO KWA NJIA YA VIKARATASI. Kutokana na hayo basi nduguzanguni hata kamatutafanya chaguzi 100 nchi haitopatikana. Serikali wanayo wao,Polisi wao,Jeshilao,tutaipataje kwa njia ya vikaratasi ? Kilichokuwepo sasa ni kuwaunga mkono na lughahiyo hiyo ya umwagaji wa damu. Sisi hatuna polisi,wala jeshi wa kutusaidiakuimwaga hiyo damu,kwahiyo itatubidi tutumie mikonoyetu na uwezo wowote tulionao kujibu lugha hiyo yaumwagaji wa damu kwa kuwasaka mmoja mmoja nakuwapunguza,kila mwezi tunakwenda na mmoja,tukitimizamwaka na 12 tumeshawapeleka nafikiri hii lugha yakumwaga damu itapungua na labda hapo ndio itakuja hiyofikra ya kukaa pamoja sote kama Wazanzibari na kuiokoanchi yetu. Najuwa kutazuka watu humu ukumbini na kupingahaya kwa vizingiti vya dini,lakini haya yanayotokea nayatayofuatia katika nchi yetu haiwezekani kwa namnayoyote kuiokoa. Namalizia hapa kungoja fikra na mawazo yenuwajumbe ili tuendelee kuchangia haya.

Mfuko Maalumu kwa Watengeneza Filamu

2005-11-06T12:00:00.000-08:00

Kama wewe ni mtengeneza filamu au unafahamu watengeneza filamu, shirika la ITVS (Independent Television Service) limetangaza mfuko maalum kwa ajili ya filamu ambazo zitaelimisha Wamarekani kuhusu tamaduni na jamii mbalimbali duniani. Mwisho wa kuomba kudhaminiwa na mfuko huo ni Januari 20 mwaka ujao. Babu Kadja kazi kwako.
Bonyeza hapa kwa taarifa kamili za jinsi ya kuomba.